سونىڭ ءبىرى – جارسۋات اۋىلىندا سالىنعان 108 ورىندىق جاڭا مەكتەپ. ول وڭىردەگى «قاراشىعاناق پەترولەۋم وپەرەيتينگ ب.ۆ.» كومپانياسىنىڭ تاپسىرىسىمەن, ءوڭىردىڭ ينفراقۇرىلىمىن دامىتۋعا ارنالعان الەۋمەتتىك ينۆەستيتسيا ارقىلى جۇزەگە استى. كومپانيا ديرەكتورىنىڭ ورىنباسارى مۇحتار مانكەەۆتىڭ ايتۋىنشا, بۇل كەيىنگى ەكى جىلدا كومپانيانىڭ شالعاي اۋىلداردا سالعان ون بەسىنشى مەكتەبى ەكەن. مەكتەپتىڭ قۇرىلىس-مونتاج جۇمىسىن مەردىگەر «قالدىعايتى» جشس جۇرگىزدى.
ءبورلى اۋدانىندا تاعى دا بىرنەشە عيمارات – قاراعاندىدا فەلدشەرلىك-اكۋشەرلىك پۋنكت, اقسۋ اۋىلدىق وكرۋگىنە قاراستى جاڭاقونىس اۋىلىندا مەديتسينالىق پۋنكت اشىلدى. اۋىل تۇرعىندارىن قۋانىشقا بولەگەن الەۋمەتتىك نىسانداردىڭ اشىلۋ سالتاناتىنا وبلىس اكىمى ناريمان تورەعاليەۆ, ورىنباسارى باقىتجان نارىنبەتوۆ, اۋدان باسشىلارى قاتىستى.
قوس مەديتسينالىق نىسان دا «اۋىلدا دەنساۋلىق ساقتاۋدى جاڭعىرتۋ» قاناتقاقتى ۇلتتىق جوباسى اياسىندا سالىنعان. وبلىس اكىمى اۋىلدىق جەرلەردە مەديتسينالىق كومەك كورسەتۋ ساپاسىن ارتتىرۋ ماقساتىندا قولعا الىنعان بۇل جوبا بولاشاقتا دا جالعاساتىنىن, قاراقۇدىق, جاڭاقونىس, وبلاۆكا, اقسۋ, اقبۇلاق اۋىلدارىندا دا مەديتسينالىق پۋنكتتەر سالۋ قاراستىرىلعانىن ايتتى.
سالتاناتتى ءىس-شارا بارىسىندا اقسۋ, كەڭتۇبەك, پريۋرالنوە, بۋماكول, ۋسپەنوۆكا, قاراعاندى اۋىلدارىنىڭ مەديتسينا قىزمەتكەرلەرىنە جاڭا جەدەل جاردەم كولىكتەرىنىڭ كىلتى تابىستالدى.
باتىس قازاقستان وبلىسى
