ءىس-شارادا ءسوز العان مينيستر ع.بەيسەمباەۆ اۋەلى بارشا قاتىسۋشىنى, ەلىمىزدىڭ پەداگوگتەرىن ۇلتتىق مەرەكەمەن قۇتتىقتاپ, سالا قىزمەتكەرلەرىنىڭ جۇمىسىنا جەمىس, ەڭبەگىنە تابىس تىلەدى. وسىعان قوسا مينيستر قوعامداعى ۇستاز ءرولىنىڭ ماڭىزىن اتاپ ءوتتى. ونىڭ ايتۋىنشا, جىل سايىن ەلىمىزدىڭ پەداگوگتەرى حالىقارالىق دەڭگەيدە جوعارى كورسەتكىشتەرگە قول جەتكىزىپ ءجۇر. مىسالى, بيىل ءبىزدىڭ وقۋشىلار الەمدىك بەدەلدى پاندىك وليمپيادالاردا 26 (سول جۇلدەلەردىڭ ەكەۋى – التىن) مەدال جەڭىپ الدى, ال بۇل – مۇعالىمدەردىڭ ەڭبەگى.
«پرەزيدەنت قاسىم-جومارت توقاەۆ پەداگوگتەردىڭ ءبىرىنشى سەزىندە «ۇلت كەلبەتى – ۇستاز, ۇستاز قانداي بولسا, مەملەكەت سونداي بولادى» دەگەن قاناتتى ءسوزدى العا تارتتى. ءتورت جىلدىڭ ىشىندە مۇعالىمدەردىڭ ايلىعى 100 پايىزعا ءوستى. الەمدەگى ەڭ بەدەلدى 7 حالىقارالىق پاندىك وليمپيادا جەڭىمپازدارىن دايىنداعان ۇستازدارعا قوماقتى سىياقى دا قاراستىرىلدى. ال 2012 جىلدان باستاپ وتكىزىلىپ كەلە جاتقان «ۇزدىك پەداگوگ» بايقاۋىنىڭ جەڭىمپازدارىنا 1000 ايلىق ەسەپتىك كورسەتكىش (3,6 ملن تەڭگەدەن اسا) كولەمىندە سىياقى تاعايىندالعان. بۇل قولداۋلاردىڭ بارلىعى ۇستازداردىڭ ەل يگىلىگىنە, ادام كاپيتالىن قالىپتاستىرۋعا جانە وسكەلەڭ ۇرپاقتى تاربيەلەۋگە قوسقان ولشەۋسىز ادال ەڭبەگىنىڭ مەملەكەت تاراپىنان لايىقتى باعالاناتىنىن جانە پەداگوگ مارتەبەسىن كوتەرۋدىڭ جاڭا كەزەڭىن ايعاقتايدى. ساپالى ءبىلىم – مەملەكەتىمىزدىڭ تابىستى بولاشاعىنىڭ نەگىزى. ءبىز, ۇستازدار, ەلىمىزدىڭ وڭ ءيميدجىن ناسيحاتتايتىن, سانالى دا تولەرانتتى زاماناۋي ۇرپاق قالىپتاستىرۋدىڭ قوزعاۋشى كۇشىنە اينالۋعا ءتيىسپىز», دەدى ع.بەيسەمباەۆ.
جاۋاپتى مينيسترلىككە قاراستى ورتا ءبىلىم كوميتەتىنىڭ توراعاسى قانىبەك جۇماشەۆ كەيىنگى كەزدە «ۇزدىك پەداگوگ» بايقاۋىنا قىزىعۋشىلىقتىڭ ارتقانىن ايتتى.
«ۇزدىك پەداگوگ» بايقاۋىنا كەيىنگى كەزدە قىزىعۋشىلىق ارتقان. قاتىسۋشىلار اراسىندا پەداگوگ-شەبەر, پەداگوگ-زەرتتەۋشى سەكىلدى ەڭ جوعارى ساناتى بار مامانداردى كوپ كەزدەستىرەمىز. بيىل 1 700-دەن اسا قاتىسۋشى باق سىناپ, 64 ادام جەڭىمپاز اتانىپ وتىر, كەي وڭىرلەردەن 4 ادامنان, كەيبىر وبلىستاردان 1 ادامنان دارالانىپ شىقتى. قوماقتى سىياقىسى بار مۇنداي بايقاۋ پەداگوگتەردى ىنتالاندىرىپ, جۇمىسىنا دەگەن قۇلشىنىسىن ارتتىرا تۇسەدى», دەدى ق.جۇماشەۆ.
كوميتەت باسشىسىنىڭ ايتۋىنا قاراعاندا, اتالعان بايقاۋدى وتكىزۋدىڭ اشىقتىعى مەن ادىلدىگىن قامتاماسىز ەتۋ ماقساتىندا ارناۋلى پلاتفورما جاسالعان. قاتىسۋشىلار سول پلاتفورمادا قاجەتتى قۇجاتتارىن, جەتىستىكتەرىن دەرەك رەتىندە تولتىرىپ, وزدەرىنىڭ جۇمىس ورنىنان ارنايى ءبىر رۇقسات الماي-اق ءوز ەركىمەن ءوتىنىم بەرە الادى. بايقاۋعا بالاباقشا, مەكتەپ, كوللەدج, ارنايى ءبىلىم, قوسىمشا ءبىلىم قىزمەتكەرلەرى دە قاتىسادى. سايىس اۋەلى اۋداندىق, سودان سوڭ وبلىستىق دەڭگەيدە ءوتىپ, وڭىردە وزا شاپقاندار رەسپۋبليكالىق دەڭگەيگە ءوتىپ, ىرىكتەلگەندەرى استاناعا كەلىپ تاۋەلسىز ساراپشىلار الدىندا اشىق ساباق وتكىزەدى. بايقاۋ اياسىندا ءار قاتىسۋشىنىڭ ءبىلىم سالاسىن دامىتۋعا قوسقان ۇلەسى, پەداگوگ قىزمەتىنىڭ تيىمدىلىگى, ونىڭ كاسىبي شەبەرلىگى ەسكەرىلەدى. رەسپۋبليكالىق بايقاۋ كوميسسيانىڭ قۇرامىنا ۇكىمەتتىك ەمەس ۇيىم, اتا-انالار قوعامىنىڭ, ءبىلىم جانە عىلىم قىزمەتكەرلەرىنىڭ قازاقستان سالالىق كاسىپوداعىنىڭ وكىلدەرى, جۋرناليستەر, بەلسەندى پەداگوگتەر كىرەدى.
گۇلنار جالعاسقىزى بيىلعى «ۇزدىك پەداگوگ» بايقاۋىنىڭ جەڭىمپازى اتاندى. ول اقتوبە وبلىسى ش.بەرسيەۆ اتىنداعى جوعارى اگرارلىق-تەحنيكالىق كوللەدجىنىڭ ارنايى ءپان وقىتۋشىسى بولىپ جۇمىس ىستەيدى. 22 جىل ەڭبەك ءوتىلى بار پەداگوگ سايىس كەزىندە قيىندىق بولعانىن, سودان سۇرىنبەۋگە ۇجىمىنىڭ سەنىمى سەپ بولعانىن ايتادى.
«جاستارعا ساپالى ءبىلىم بەرۋدە ايانباي ەڭبەك ەتىپ كەلە جاتقانىمدى ۇلكەن ابىروي سانايمىن. بۇل بايقاۋعا ءبىرىنشى رەت قاتىستىم, ءسوز جوق, قيىندىق بولدى. بىراق ەڭبەگىمنىڭ ەلەنىپ, جۇمىسىمنىڭ جەمىسىن كورىپ وتىرعانىم سول توككەن تەردىڭ ناتيجەسى دەپ بىلەمىن. بەدەلدى پەداگوگتەر دوداسى قاتىسۋشىدان ۇزدىك جۇمىستى تالاپ ەتەدى, جەتىستىكتەردىڭ بولۋى جەتكىلىكسىز, مۇندا وقۋلىقتار جازۋ سەكىلدى عىلىمي ىزدەنىسكە باسىمدىق بەرىلەدى. شىنى كەرەك, «ۇزدىك پەداگوگ» بايقاۋىنىڭ جىل سايىن ءوتىپ جاتقانىن بىلەمىن. الايدا ءوز ەركىممەن قاتىسۋعا باتپاي, ءوزىمدى ءالى دە دامىتىپ, جۇمىسىمدى شيراتۋىم كەرەك دەپ ويلاپ ءجۇردىم. ۇجىمىم ءۇمىت ارتىپ, سەنىم ارقالاتقاندىقتان, بەلدى بەكەم بۋىپ, بايگەنى بەرمەۋگە تىرىستىم», دەيدى گ.جالعاسقىزى.
ال مەرەكە كەنجەبەكوۆا جامبىل وبلىسى شۋ قالاسىنان كەلىپ «ۇزدىك پەداگوگ» اتاندى. ول اتالعان قالادا ورنالاسقان ساكەن سەيفۋللين اتىنداعى قازاق ورتا مەكتەبىندە بيولوگيا پانىنەن ساباق بەرەدى. 32 جىل بويى ءبىلىم سالاسىندا تابان اۋدارماي جۇمىس ىستەپ كەلە جاتقان پەداگوگ.
«وقۋشىلارى جاقسى جەتىستىكتەرىمەن بيىكتەردەن كورىنسە, ادامي تۇلعا رەتىندە قالىپتاسسا, مۇعالىم ميسسياسىنىڭ ورىندالعانى, ەڭ باستىسى ەڭبەگىنىڭ وتەۋى, باعالانعانى دەپ بىلەمىن. بۇل سايىسقا ەكى جىل دايىندالدىم. جارىستىڭ ەرەكشەلىگى بارلىق ءوزىڭىزدىڭ جەتىستىگىڭىزدى بەرىلگەن قوسىمشالار بويىنشا جۇيەلى دايىنداپ وتىرساڭىز, سايتتا جۇمىستارىڭىزعا ءادىل باعالانعان ۇپايلار اشىق شىعىپ تۇرادى. وتىز جىلدان اسا ۋاقىت بويى حالىقارالىق ءپان وليمپيادالارىنىڭ جۇلدەگەرلەرىن, عىلىمي جوبا بويىنشا ۇزدىكتەردى دايىنداعان, وسىعان قوسا ون جىلدان بەرى شەبەر-پەداگوگ ساناتىمەن ءوزىمدى كورسەتە ءجۇرىپ, ۇلتتىق تەستىلەۋ ورتالىعىنىڭ ساراپشىسى رەتىندە اتقارعان ەڭبەگىم ەلەنىپ, جاقىندا مۇعالىمدەر كۇنىندە ى.التىنسارين توسبەلگىسىن يەلەنگەن ەدىم. مۇنىڭ ءبارى ءبىزدى ىنتالاندىرادى. ال بايقاۋعا جاستاردى شابىتتاندىرىپ, مۇعالىم ماماندىعىنا قىزىعۋشىلىعىن ارتتىرۋ ءۇشىن قاتىستىم. بۇل جولدا جەتىستىكتىڭ شىڭى – ارتىڭنان ءىز قالدىرىپ, وزىڭنەن كەيىنگى ارىپتەستەرىڭدى جاناشىرلىقپەن تاربيەلەگەنىڭ, ولارعا جاقسى ۇلگى بولا بىلگەنىڭ», دەدى م.كەنجەبەكوۆا.
رەسپۋبليكا كۇنىنە ارنالعان سالتاناتتى ءىس-شارادا وقۋ-اعارتۋ جۇيەسىنىڭ بىرقاتار قىزمەتكەرلەرىنە «ەرەن ەڭبەگى ءۇشىن», «ەڭبەك ارداگەرى» مەدالدەرى, «ى. التىنسارين», ء«بىلىم بەرۋ ءىسىنىڭ قۇرمەتتى قىزمەتكەرى» توسبەلگىلەرى جانە باسقا دا مينيسترلىكتىڭ ناگرادالارى تاپسىرىلدى.
