بۇگىنگى تاڭدا UFC-دەگى ورتا سالماقتىڭ التىن بەلبەۋىن بەلال مۇحامماد يەلەنىپ وتىر. بيىل جازدا ول انگليانىڭ مانچەستەر قالاسىندا ۇيىمداستىرىلعان جارىستا جەرگىلىكتى فايتەر لەون ەدۆارستى جەڭگەن سوڭ وسى مارتەبەسى اسا جوعارى اتاققا قول جەتكىزدى. ەندى ارادا بەس ايعا جۋىق ۋاقىت وتكەن سوڭ شاۆقات راحمونوۆتىڭ چەمپيوندى تۇعىردان تايدىرۋى ابدەن مۇمكىن. قازىرگى كەزدە كوپشىلىكتىڭ پىكىرى وسىعان سايادى.
ارالاس جەكپە-جەكتى 2012 جىلدان بەرى سەرىك ەتىپ كەلە جاتقان 36 جاستاعى اقش-تىڭ چيكاگو قالاسىندا تۋىپ-وسكەن پالەستينالىق سپورتشى ءوز كارەراسىندا 28 مارتە وكتاگونعا شىعىپ, 24 رەت جەڭىسكە جەتتى. ءۇش كەزدەسۋدە ۇتىلىپ, تاعى ءبىر باسەكەنىڭ ناتيجەسى ەسەپكە الىنبادى. سول سايىستاردىڭ تەك التاۋىن عانا مۇحامماد ايقىن باسىمدىقپەن اياقتادى. تارقاتىپ ايتساق, بەس قارسىلاسىن نوكاۋتقا جىبەرسە, تاعى بىرەۋىن «قىلقىندىرۋ» ادىسىمەن ۇتتى. قالعان 18 جەكپە-جەكتىڭ شەشىمىن تورەشىلەر شىعاردى. ياعني بەلالدى «پانچەر» دەپ ايتۋ قيىن. سونىمەن قوسا ول ءوزى دە ءبىر رەت نوكاۋتقا ءتۇستى. 2016 جىلدىڭ كۇزىندە نيۋ-يوركتە ۇيىمداستىرىلعان تۋرنيردە برازيليالىق ۆيسەنتە لۋكەنىڭ ونى ءبىرىنشى راۋندتا ۇرىپ جىققانى ەسىمىزدە. ال الان دجۋبان مەن نيل دجەففتەن پالەستينانىڭ وكىلى ۇپاي سانىمەن ۇتىلدى. ءدال سول دجەففتى ءبىزدىڭ راحمونوۆ بىلتىر كوكتەمدە «قىلعىندىرىپ» تاستاعان بولاتىن.
دەسەك تە الداعى جارىستا شاۆقاتقا جەڭىس وڭايلىقپەن كەلەدى دەپ ايتۋ قيىن. UFC-دە سەگىز جىل جۇدىرىقتاسىپ, 18 جەكپە-جەك وتكىزگەن بەلال مۇحامماد ابدەن ىسىلعان ساقا سپورتشى. سول ارالىقتا ول لايمان گۋد, ديەگو ليما, دەميان مايا, ستيۆ تومپسون, ۆيسەنتە لۋكە, شون برەدي, گيلبەرت بەرنس سىندى مارقاسقالاردى جەڭدى. مۇحامماد قارسى كەلگەنىن قوعاداي جاپىرماسا دا, ونىڭ باتىلدىعى مەن شىدامدىلىعى, توزىمدىگى مەن تاباندىلىعىنا تاڭدانباۋ مۇمكىن ەمەس. ءار باسەكەدە ساۋاتتى تاكتيكا ۇستانا بىلەدى, كوبىنە-كوپ تاۋەكەلگە بارمايدى. فۋنكتسيونالدىق دايارلىعى وتە جاقسى. ول ءاربىر كەزدەسۋدە قارسىلاستارىن دىڭكەلەتىپ بارىپ ۇتادى. سوعان دا باسا نازار اۋدارعان ءجون.
ال شاۆقاتتىڭ ءجونى بولەك. تاياۋ كۇندەرى 30 جاسقا تولعالى وتىرعان قازاقتىڭ قايسار ۇلى 18 جەكپە-جەكتىڭ بارلىعىندا ايقىن باسىمدىق تانىتتى. سەگىز قارسىلاسىن «قىلعىندىرۋ», «اۋىرتۋ» تاسىلدەرىمەن ۇتتى. 10 باسەكەلەسىن اۋىر سوققىلاردىڭ استىنا الىپ, ولارعا «قيىر شىعىستىڭ قايدا ەكەنىن» كورسەتتى. «نوماد» توعىز باسەكەنى ءبىرىنشى, جەتى كەزدەسۋدى ەكىنشى راۋندتاردا اياقتادى. تەك تاجىك فارۋددين وديلوۆ (2018 جىل) پەن امەريكالىق دجەفف نيل (2023 جىل) عانا ءۇشىنشى راۋندقا دەيىن شىدادى. بىراق راحمونوۆ بىردە-ءبىر جەكپە-جەكتى سوڭىنا دەيىن سوزعان ەمەس. مىنە, وسى جايتتار شاۆقاتتىڭ بەدەلىن شارىقتاتىپ تۇر.
سونىمەن, 7 جەلتوقساندا كۇللى الەم جانكۇيەرلەرىنىڭ نازارى لاس-ۆەگاسقا اۋادى. اسىرەسە حالقىمىزعا بۇل ەرەكشە كۇن. بۇعان دەيىن قازاقتىڭ ءور مىنەزدى ورەندەرى تالاي بەلدى پروموۋشەندەردىڭ التىن بەلبەۋلەرىن يەلەنگەنىن جۇرت جاقسى بىلەدى. ال ارالاس جەكپە-جەك الەمىندەگى ەڭ بيىك شىڭ – UFC ەكەنى داۋسىز. ازىرگە بۇل بەلەس بىزگە باعىنعان جوق. ەگەر شاۆقات راحمونوۆ الىستاعى امەريكادا اتوي سالىپ, چەمپيوندىق ءتاجدى يەلەنسە, وندا الاش جۇرتىنىڭ تالاي جىلعى ارمانى ورىندالىپ, قازاقتىڭ جىگىتتەرى وزدەرىنىڭ مىقتىلىعىن تۇبەگەيلى مويىنداتادى.
