قازاقستان جازۋشىلار وداعىنىڭ اتىراۋ وبلىسى بويىنشا وكىلى ءاليا داۋلەتباەۆانىڭ ايتۋىنشا, «اتىراۋ تولقىندارى» دەپ اتالاتىن جوباعا جەرگىلىكتى اكىمدىك قولداۋ ءبىلدىرىپ وتىر. قىركۇيەك ايىندا ۇلت رۋحانياتىن بايىتۋعا مول ۇلەس قوسقان ون قالامگەردىڭ اۋديوكىتابى شىققان.
بۇل جوبا اياسىندا بەلگىلى اقىن-جازۋشىلاردىڭ تۋىندىلارى اۋديوكىتاپ تۇرىندە ياندەكس پورتالىنىڭ «ياندەكس-كىتاپتار» پلاتفورماسىنا جۇكتەلەدى. اتالعان پورتالمەن 5 جىلعا كەلىسىمشارت جاسالىپتى.
«جىل سوڭىنا دەيىن 30-عا جۋىق اۋديوكىتاپتى «ياندەكس-كىتاپتار» پلاتفورماسىنا جۇكتەۋ كوزدەلىپ وتىر. اۋديوكىتاپقا قالامگەرلەردىڭ ەڭ تاڭداۋلى تۋىندىلارى ىرىكتەلدى. ونىڭ ىشىندە XV عاسىرداعى جورىق جىراۋى قازتۋعان ءسۇيىنىش ۇلىنىڭ, الداسپان جىردىڭ اقبەرەنى ماحامبەت وتەمىس ۇلىنىڭ, زار زامان اقىنى مۇرات موڭكە ۇلىنىڭ شىعارمالارى بار. بۇل لەكتە ومىردەن ەرتە وتكەن مارات وتاراليەۆتىڭ, پوەزياداعى وزىندىك ۇنىمەن ەل جادىنا جاتتالعان فاريزا وڭعارسىنوۆانىڭ تۋىندىلارىنىڭ اۋديونۇسقاسى جازىلدى. ەكىنشى دۇنيەجۇزىلىك سوعىستان كەيىن اقشا بۇلت اقىن اتانعان ءابۋ سارسەنباەۆ, «جامان جاۋتىك» رومانىمەن وقىرمان ىقىلاسىن اۋدارعان ەسەنجول دومباەۆ قالدىرعان تۋىندىلاردىڭ اۋديوكىتابى وقىرمان ىقىلاسىن تۋدىراتىنى داۋسىز», دەيدى ءاليا داۋلەتباەۆا.
سونداي-اق ونەر زەرتتەۋشىسى, كومپوزيتور, قازاقستاننىڭ ەڭبەك ەرى يليا جاقانوۆتىڭ, تانىمال قالامگەر مارات ءماجيتوۆتىڭ, قازاقستان جازۋشىلار وداعىنىڭ باسقارما توراعاسى مەرەكە قۇلكەنوۆتىڭ, نۇرلان قامي شىعارمالارىنىڭ اۋديونۇسقاسى كاسىبي ستۋديادا جازىلعان. باردتىق ونەردى كەڭىنەن ناسيحاتتاعان تابىلدى دوسىموۆ پەن جاس قالامگەر باقىتگۇل سارمەكوۆانىڭ شىعارمالارىنىڭ اۋديونۇسقاسى بار.
«اۋديوكىتاپقا تەك كوركەم شىعارمالاردى ەنگىزۋمەن شەكتەلمەيمىز. الداعى ۋاقىتتا پۋبليتسيستيكالىق, تانىمدىق تۋىندىلارعا نازار اۋدارىلادى. اۋديونۇسقاداعى وسىنداي شىعارمالاردى وقىرمانعا ۇسىنۋدى جوسپارلاپ وتىرمىز», دەدى ءا.داۋلەتباەۆا.
اتىراۋ وبلىسى
