اسۋ الەمدەگى ەڭ بەلدى پروموۋشەندە وتە جاقسى ونەر كورسەتىپ ءجۇر. UFC-مەن بىلتىر عانا كەلىسىمشارتقا وتىرعان 30 جاستاعى فايتەر سول كەزدەن بەرى ءۇش كەزدەسۋ وتكىزىپ, بارلىعىندا جەڭىسكە جەتتى. كۇنى كەشە عانا ول اتالعان ۇيىمنىڭ رەيتينگىندە جەتىنشى ورىندا تۇرعان برازيليانىڭ وتە تاجىريبەلى سپورتشىسى ماتەۋس نيكولاۋمەن (19-4-1) كۇش سىناستى. بۇل باسەكەنى الماباەۆ مەرزىمىنەن بۇرىن اياقتاي الماسا دا, ءار راۋند سايىن ۇستەمدىگىن كورسەتتى. ايقاس اياقتالعاننان كەيىن بارلىق تورەشى قانداسىمىزدىڭ مىقتىلىعىن ءبىراۋىزدان مويىندادى.
UFC رەيتينگىندە وسىعان دەيىن 14-ورىندا تۇرعان اسۋ الماباەۆ سوڭعى جەڭىسىنەن كەيىن بىردەن جەتى ساتىعا جوعارىلادى. قازىر «زۇلپىقار» (اسۋدىڭ جاناما ەسىمى) جەتىنشى ورىندا. بۇل سالماقتىڭ چەمپيوندىق ءتاجى برازيليالىق الەكساندر «ادام جەگىش» پانتوجاعا تيەسىلى. ۇزدىك ۇشتىكتىڭ قاتارىندا امەريكالىق برەندون «جانالعىش بالاقاي» رويۆەل, مەكسيكالىق برەندون «دورەكى جىگىت» مورەنو, يراكتىق ءامىر «حانزادا» البازي سىندى ساڭلاقتار بار. ەگەر اسۋ الداعى ەكى-ءۇش جەكپە-جەكتە جەڭىسكە جەتسە, وندا جوعارىدا ەسىمدەرى اتالعان جامپوزداردىڭ ءبىرىن ورنىنان ىعىستارىپ, التىن بەلبەۋگە ءبىر تابان جاقىنداي تۇسەدى.
