فوتو: اشىق دەرەككوز
«قالادا ءومىر ءسۇرۋ ساپاسى كوپتەگەن فاكتورعا بايلانىستى. وسى ماسەلەدە تىرشىلىكتى قامتاماسىز ەتۋ نىساندارىنىڭ جۇمىسى ماڭىزدى ءرول اتقارادى. الدىڭعى جىلى قالامىز جىلۋمەن جابدىقتاۋ تاپشىلىعىنا ۇشىرادى. وسى ماسەلەنى شەشۋ ءۇشىن وتكەن جىلدىڭ كۇزىندە بىرقاتار نىساننىڭ قۇرىلىسىن اياقتاپ, پايدالانۋعا بەردىك. ولار – «وڭتۇستىك-شىعىس» گاز جىلۋ ستانتسياسى, «تۇران» گاز جىلۋ ستانتسياسىنىڭ ءبىرىنشى كەزەڭى, جەو-3-ءتىڭ ءبىرىنشى كەزەڭى. اتالعان تىرشىلىكتى قامتاماسىز ەتۋ نىساندارى قالاعا 1100 گكال/ساع استام كۇش بەردى.
وسى نىسانداردىڭ ارقاسىندا قالامىز وتكەن جىلىتۋ ماۋسىمىندا بىرنەشە جىلدان كەيىن العاش رەت جىلۋ پروفيتسيتىمەن شىقتى», دەپ جازدى اكىم.
جەڭىس قاسىمبەك جىل سوڭىنا دەيىن «تۇران» گاز جىلۋ ستانتسياسىنىڭ ەكىنشى كەزەگىن اياقتاۋ جوسپارلانىپ وتىرعانىن قوسا جازدى. ايتا كەتەيىك, بۇل قالاعا تاعى 250 گكال/ساع كۇش بەرەدى.
«سونىمەن قاتار جالپى قۋاتى 620 گكال/ساع بولاتىن «تەلمان» گاز جىلۋ ستانتسياسىنىڭ قۇرىلىسىن باستادىق. كەلەسى جىلدان باستاپ وسى گجس-نى كەزەڭ-كەزەڭىمەن ىسكە قوسۋدى جوسپارلاپ وتىرمىز. «تەلمان» گجس تۇرعىن ءۇي قۇرىلىسى بەلسەندى ءجۇرىپ جاتقان اۋدانداردى جىلۋمەن قامتاماسىز ەتۋگە قاۋقارلى. سول سياقتى قۋاتى ساعاتىنا 350 گكال بولاتىن «وڭتۇستىك-باتىس» گاز جىلۋ ستانتسياسىنىڭ جوباسىن جۇرگىزىپ جاتىرمىز.
تۇرعىن ءۇي قورى جىل سايىن ارتىپ بارا جاتقانىن ەسكەرەر بولساق, جاڭا نىساندار قالانى 2035 جىلعا دەيىن جىلۋمەن قامتاماسىز ەتۋگە مۇمكىندىك بەرەدى», دەپ جازدى جەڭىس قاسىمبەك.
