كونفەرەنتسيا بارىسىندا ۇلتىنىڭ قامىن جەگەن اقىن-قايراتكەردىڭ قوعامدىق-ساياسي, ادەبي تۇلعاسىنا تەرەڭنەن توقتالىپ, كونە كومبەنىڭ قويناۋىنداعى تالاي سىر مارجانداي ءتىزىلىپ, اقتارىلدى. جاس تولقىنعا بەيمالىم تاريحي شىندىق بار ءمان-مازمۇنىمەن تولايىم ورنەكتەلىپ, كوكىرەكتەرگە ءنار بولىپ قۇيىلدى. مەملەكەت جانە قوعام قايراتكەرى, ابزال ازامات, اياۋلى اقىن ساكەن سەيفۋللين – قامشىنىڭ سابىنداي قىسقا عۇمىرىندا كەيىنگى ۇرپاققا ولشەۋسىز مول مادەني مۇرا قالدىرعان ەرەن تۇلعا. ادەبيەتتىڭ بارلىق جانرىندا قالام سىلتەگەن جاڭاشىل اقىن, كورنەكتى قالامگەردىڭ قالامىنان تۋعان كوركەم شىعارمالار ءوزىنىڭ شىنايى سەزىمىمەن, كوركەم وبرازدارى, تەرەڭ يدەيالارى ارقىلى حالقىمىزدىڭ ەستەتيكالىق يگىلىگىن مەيلىنشە بايىتتى. اسىلىندا ساكەن ءوز شىعارمالارى ارقىلى قازاق ادەبيەتىنە تۇڭعىش رەت توڭكەرىسشىل رۋح ەنگىزدى. اقىننىڭ ولەڭدەرى مەن پوەمالارىندا ءوزى ءومىر سۇرگەن كەزەڭنىڭ, ءداۋىردىڭ, زاماننىڭ وبرازى, ءوزى دە سول ءداۋىردىڭ پەرزەنتى بولعاندىقتان, اسقاق پافوسپەن بەرىلدى. اعارتۋشىلىق, دەموكراتتىق باعىتتا, سىنشىل رەاليزم ءادىسىنىڭ ارناسىندا جازىلعان تۋىندىلارى الەۋمەتتىك-قوعامدىق مازمۇنى, كوركەمدىك-ەستەتيكالىق ەرەكشەلىگى, پوەتيكالىق-اقىندىق قۋاتى قالامگەردىڭ تابيعي ۇزدىك تالانتىن, ازاماتتىق پوزيتسياسىن, پالساپالىق دۇنيەتانىمىن ايقىن بايقاتتى.
كونفەرەنتسيانى جازۋشى-دراماتۋرگ جابال ەرعاليەۆ اشىپ, جۇرگىزىپ وتىردى. وبلىس اكىمىنىڭ ورىنباسارى التىناي امىرەنوۆا قۇتتىقتاۋ ءسوز سويلەگەننەن كەيىن مەملەكەت جانە قوعام قايراتكەرى ورالباي ابدىكارىموۆ اقىن تۋرالى اقجارما لەبىزىن ءبىلدىرىپ, تەرەڭنەن تولعاپ سىر شەرتتى. «قازاق گازەتتەرى» سەرىكتەستىگىنىڭ باس ديرەكتورى, اكادەميك ديحان قامزابەك ۇلى سول ءداۋىردىڭ تىنىسىن, الاش قايراتكەرلەرىنىڭ باسىنان كەشكەن الماعايىپ زامانى, سان قيلى سەزىمدەردىڭ ارباسۋى تۋرالى ايتا كەلىپ, اقىننىڭ تار جول, تايعاق كەشكەن تاعدىرى تۋرالى ناقتى دەرەكتەردى كەلتىرە وتىرىپ, كوز الدىمىزعا سول ءبىر قيىن دا قياپات زاماننىڭ تۇتاس كەسكىنىن كەلتىردى. قازاقستاننىڭ ەڭبەك سىڭىرگەن قايراتكەرى, فيلولوگيا عىلىمدارىنىڭ دوكتورى سەرىك نەگيموۆ كەستەلى كوركەم تىلىمەن داۋىلپاز اقىننىڭ دارا بەينەسىن جان-جاقتى سومداپ بەردى. تاريح عىلىمدارىنىڭ دوكتورى, ساكەن سەيفۋللين مۋزەيىنىڭ باسشىسى مارات ابسەمەتوۆ اقىننىڭ قوعامدىق-ساياسي جۇمىسى, ادەبي شىعارماشىلىق, قالامگەرلىك ءورىسى تۋرالى كەڭىنەن تولعادى. ادەبيەتشى عالىم ءسابيت جامبەك اقىننىڭ شىعارماشىلىق كەلبەتىن كوركەم سوزبەن كەسكىندەدى.
ساكەن سەيفۋللين اقىن-جازۋشى عانا ەمەس, قازاق جۇرتى ءۇشىن ۇلكەن ىستەر تىندىرعان مەملەكەت جانە قوعام قايراتكەرى. حالىقشىلدىعىمەن دارا, سوندىقتان, ونىڭ اياۋلى ەسىمى جۇرتىنىڭ جۇرەگىندە. قاي زاماندا بولسىن ەل مۇنداي پەرزەنتىن ءاردايىم قاستەرلەيدى. حالىقشىل قاسيەتى داۋىلپاز اقىندى باسقا قايراتكەرلەردەن ەرەكشەلەپ, تۇلعاسىن دارالاپ, بار سىر-سىمباتىمەن تاريح بەتتەرىندە جارقىراپ كورىنۋىنە جول اشتى.
كوكشەتاۋ
