جالپى, جەتىسۋ توپىراعىندا مۇعالىمدىك جولدى تاڭداعان وتباسى وتە كوپ. كوبىنە ەلدى مەكەندەرگە بارا قالساڭىز, اتا-اناسى مەن بالالارى مەكتەپتە قىزمەت ەتەتىن اۋلەتتەردى ءجيى كەزدەستىرەسىز. وعان ۇلگى – وقۋشىلارعا بىلگەنىن ۇيرەتىپ, وسى ماماندىق عيبرات الۋدى ماقسات تۇتقان – ۇمبەتوۆتەر وتباسى. بۇكىل ءومىرىن وسكەلەڭ ۇرپاقتى تاربيەلەۋگە ارناعان وتباسىندا وتاعاسى سەيىتبەك مىرزاحمەت ۇلى مەن ونىڭ جۇبايى نۇريشا بايمىرزاقىزى وتكەن عاسىردىڭ 50-جىلدارىندا پەداگوگتەر اۋلەتىنىڭ نەگىزىن قالاعان.
«ۇستاز بولۋ – مەنىڭ بالا ارمانىم دەسە بولادى. وسى ماماندىقتى تاڭداۋىما مەنىڭ العاشقى ۇستازىم سەبەپكەر بولدى. ول سىنىپتاعى ءار وقۋشىنىڭ بابىن تاۋىپ, ساباقتاردى دا ەرەكشەلەپ, ءبىر-بىرىنەن وزگەشە وتكىزەتىن. ونىڭ وقۋشىنى ساباققا باۋراپ الاتىنى مەنى تامساندىراتىن. سول كەزدە-اق مەن ءوزىمدى مۇعالىم رەتىندە كورەتىنمىن. ساباق سوڭىنان قالىپ, ۇستازىما داپتەر تەكسەرۋگە كومەكتەسەتىنمىن. مەندە وقۋشىلاردىڭ ءبىلىمىن باعالايتىن ءوز جۋرنالىم بولاتىن, وندا مۇعالىم ەكەۋىمىز بىرگە باعا قوياتىنبىز. ۇستازىمنىڭ وسىنداي ساباق بەرۋ تاسىلدەرى مەنىڭ مۇعالىم بولۋىما اسەر ەتتى», دەيدى اۋلەت ۇلكەنى سەيىتبەك مىرزاحمەت ۇلى.
اتالعان اۋلەتتىڭ كىشكەنتاي بالالارى دا بولاشاقتا مۇعالىم بولۋدى ارماندايدى. بۇگىندە وتباسىندا 11 پەداگوگ – سەگىز ماتەماتيك, ءۇش باستاۋىش سىنىپ مۇعالىمى, ءبىر فيزيكا مۇعالىمى بار. ماسەلەن, وتاعاسى سەيىتبەك مىرزاحمەت ۇلى 41 جىلدىق ۇستازدىق قىزمەتىندە ماتەماتيكا ءپانى مۇعالىمىنەن لەسنوۆكا, سوتسجول اۋىلدارىندا مەكتەپ ديرەكتورلىعىنا دەيىنگى جولدى ءجۇرىپ وتكەن. ودان كەيىن تاعى 20 جىل قوڭىرولەڭ اۋىلىنداعى ورتا مەكتەپتە ديرەكتوردىڭ وقۋ ءىسى جونىندەگى ورىنباسارى بولىپتى. تالاي جىلعى ەڭبەگىمەن ەلەنىپ, ەلدىڭ قوشەمەتىمەن سول جەردەن قۇرمەتتى ەڭبەك دەمالىسىنا شىقتى. ونىڭ جۇبايى, وتباسىنىڭ ۇيتقىسى, «التىن القا» يەگەرى نۇريشا بايمىرزاقىزى باسشي, لەسنوۆكا, سوتسجول, قوڭىرولەڭ اۋىلدارىنداعى باستاۋىش مەكتەپتەردە ەڭبەك ەتكەن. جۇبايىنا دەمەۋ بولا وتىرىپ, ول مەكتەپتەگى مىندەتتەرىن, سەگىز بالانى وقىتۋ مەن تاربيەلەۋدى قاتار الىپ ءجۇردى.
«مۇعالىم ماماندىعىنىڭ ەڭ قيىنى – دامىپ وتىرۋعا دەگەن قاجەتتىلىك. مۇعالىم قاشاندا ءوزىنىڭ ءبىلىمى مەن بىلىكتىلىگىن شىڭداپ وتىرۋى كەرەك. بۇل وڭاي ەمەس, بۇعان شىدامدىلىق, العا قويعان ماقساتىڭا ۇمتىلۋ قاجەت. ءوزىن جەكە تۇلعا رەتىندە دامىتۋ كەرەك. زاماناۋي مۇعالىم دامىماسا, توقىراۋعا ۇشىرايدى», دەيدى ن.بايمىرزاقىزى.
اتا-اناسىنا قاراپ بوي تۇزەگەن قىزدارى ارداق, نۇرگۇل, باقىتگۇل, ۇلى مارات پەداگوگيكالىق ۋنيۆەرسيتەتتەرگە وقۋعا ءتۇسىپ, ماتەماتيكا ءپانىنىڭ مۇعالىمدەرى اتاندى. قازىرگى تاڭدا ارداق پەن ونىڭ جۇبايى بايمۇحان نۇرمۇحامەدوۆ – ءبىلىم سالاسىنىڭ ەڭبەك سىڭىرگەن ارداگەرلەرى. نۇرگۇل 25 جىل بويى قوڭىرولەڭ ورتا مەكتەبىندە ماتەماتيكادان ساباق بەردى, ال قازىرگى ۋاقىتتا م.گاندي اتىنداعى №92 الماتى ليتسەيىندە جۇمىس ىستەيدى. باقىتگۇل ب.مومىش ۇلى اتىنداعى گيمنازيادا ساباق بەرەدى. 41 جىل باستاۋىش سىنىپ مۇعالىمى بولعان جانە ۇلكەن وتباسىنىڭ كەلىنى, سەيىتبەك مىرزاحمەت ۇلىنىڭ ۇلكەن ۇلى بولاتتىڭ جۇبايى جاڭىل وتەگەنوۆا, ونىڭ قىزى ماقپال اباي اتىنداعى قازاق پەداگوگيكالىق ۋنيۆەرسيتەتىن بىتىرگەن.
ۇلى مارات پەن ونىڭ جۇبايى گۇلنازيرا وسپانبەكوۆا قوڭىرولەڭ اۋىلىندا قوجبانبەت بي اتىنداعى ورتا مەكتەپتە وتىز جىل بويى ماتەماتيكادان ساباق بەردى. ءبىر ۇجىمدا يىق تىرەسە جۇمىس ىستەي وتىرىپ, ەرلى-زايىپتىلار ۇلكەندەردىڭ دانالىعى مەن وسيەتتەرىن جاس ۇرپاققا سىڭىرۋگە تىرىسادى.
«وتباسىن قۇرعاننان كەيىن اتا-انالارىمىز مەكتەپتە تىنباي جۇمىس ىستەدى. اكەمىز بەن انامىز ەلىمىزدىڭ لايىقتى ازاماتتارىنىڭ بىرنەشە ۇرپاعىن تاربيەلەگەنىن ماقتان تۇتامىز. قانشاما تەر توگىپ ەڭبەك ەتسە دە, ولار ءبىزدى دە نازاردان تىس قالدىرماي, ۇلتىمىزدىڭ ۇزدىك داستۇرلەرىن بويىمىزعا ءسىڭىردى. مەن اكەمنىڭ ءىسىن جالعاستىرعانىما شىن جۇرەكتەن قۋانىشتىمىن. بۇگىن مەن ماماندىق تاڭداۋدا قاتەلەسپەدىم دەپ سەنىمدى تۇردە ايتا الامىن, ۇستازدىق جول – مەنىڭ ارمانىم ەكەنىنە كوزىم جەتتى. سونداي-اق تەك وقىتىپ قانا قويماي, ۇنەمى ىزدەنىستە بولۋ, جاڭا ءبىلىمدى مەڭگەرۋ وتە ماڭىزدى, زامان اعىمىنان قالماي, كرەاتيۆتى ويلاۋ قاجەت. جاستار – ەلىمىزدىڭ بولاشاعى, سوندىقتان ءبىز اعا بۋىن رەتىندە اتا-بابالارىمىزدىڭ باي مادەني مۇراسىن ساقتاپ, بالالارعا بەرۋىمىز كەرەك, ناعىز پاتريوتتىق رۋحتا تاربيەلەۋىمىز قاجەت. ۇستازدىڭ باستى ماقساتى مەن مىندەتى دە وسى», دەيدى م.سەيىتبەك ۇلى.
پانفيلوۆ اۋدانىنداعى مۇعالىمدەر اۋلەتى ەڭبەگى مەن كاسىبيلىگىنىڭ ناتيجەسىندە كوپتەگەن قۇرمەتتى ماراپاتقا يە بولدى, بىراق ولار ءۇشىن ەڭ باستىسى – وقۋشىلارىنىڭ بيىكتەن كورىنۋى. بۇل اۋلەت جەتكەن جەتىستىگىمەن شەكتەلىپ قالمايدى, ىزگى ىستەرىن ودان ءارى جالعاستىرۋعا نيەتتى. مارات سەيىتبەك ۇلىنىڭ قىزى ءامينا بولاشاقتا ۇلكەندەردىڭ جولىن جالعاماقشى. مەكتەپتى «التىن بەلگىگە» ءبىتىرىپ, ءال-فارابي اتىنداعى قازۇۋ-دا «ماتەماتيكا» ماماندىعىنىڭ مەملەكەتتىك گرانت يەگەرى اتاندى.
جەتىسۋ وبلىسى
