كوللاجدى جاساعان – جاننۇر ابسامەت, ەۇۋ ستۋدەنتى
وسى رەتتە ءوزىمىز ەڭبەك جولىن وتكەن كەزەڭنەن باستاي وتىرىپ, بۇرىنعى مەملەكەتتىك قىزمەت جۇيەسىنە قىسقاشا توقتالعىم كەلەدى. ءبىز كەڭەس وداعى جۇيەسى ورنىققان, ءتارتىبى قاتاڭ كەزەڭدە قىزمەتكە ارالاستىق.
سول ۋاقىتتا مامان دايارلاۋ جۇيەسى ءبىرىزدى جولعا قويىلعان ەدى. مەكتەپتە پيونەر, كومسومول ۇيىمدارى ارقىلى جاستار ۇجىممەن جۇمىس ىستەۋدى, جينالىس وتكىزۋ مەن جاۋاپكەرشىلىك الۋدى ۇيرەنەتىن. بۇل بولاشاق باسشىنىڭ ۇيىمداستىرۋشىلىق قابىلەتىن قالىپتاستىراتىن العاشقى مەكتەپ بولاتىن.
مەكتەپ بىتىرگەن سوڭ تەحنيكۋم نەمەسە جوعارى وقۋ ورنىن اياقتاعان جاس مامان جولدامامەن ەڭبەككە ارالاسىپ, قىزمەتىن تومەنگى ساتىدان باستايتىن. «ەڭ باستىسى – ادال ەڭبەك ەتۋ» دەگەن ۇستانىم باسىم ەدى. «قىزمەتىمدى نەگە وسىرمەيدى؟» دەگەن وي ول كەزدە كوپتىڭ ساناسىنا كەلە بەرمەيتىن. ءار قادامىڭ, ءار ءىسىڭ تۇراقتى باقىلاۋدا بولاتىن.
تاجىريبەلى باسشىلار جاس ماماننىڭ بىلىمىنە عانا ەمەس, ءتارتىبى مەن مىنەز-قۇلقىنا دا ءمان بەرەتىن. قىزمەتتىك ءوسۋ بىردەن ەمەس, ساتىلاپ جۇزەگە اساتىن. ءار باسقىشتا ءوزىڭدى دالەلدەگەن جاعدايدا عانا كەلەسى دەڭگەيگە كوتەرىلۋ مۇمكىن ەدى. بۇل جۇيە ادامدى شىڭداپ, تاجىريبەسىن تەرەڭدەتەتىن. سول كەزەڭدە وتباسىلىق قۇندىلىق تا جوعارى باعالاناتىن. وتباسىن ساقتاي الماعان نەمەسە ءتارتىپ بۇزعان ازاماتتىڭ قىزمەتتىك ءوسۋى شەكتەلەتىن. ءاربىر ارەكەت ەڭبەك پەن جاۋاپكەرشىلىك ولشەمىمەن باعالاناتىن.
بۇگىنگى كۇنگە كەلسەك, كەيبىر جاعدايدا قىزمەتكە تاعايىنداۋ ۇدەرىسىندە ولقىلىق كەزدەسىپ جاتادى. كەيبىر ازاماتتار تاجىريبەسىز كۇيدە بىردەن جوعارى لاۋازىمعا تاعايىندالادى. مۇنداي جاعدايدا ولار جۇيەنى تولىق مەڭگەرىپ ۇلگەرمەي جاتىپ, كۇردەلى ماسەلەلەرمەن بەتپە-بەت كەلەدى. بۇل ءوز كەزەگىندە باسقارۋ ساپاسىنا اسەر ەتۋى مۇمكىن.
سوندىقتان جاس ماماننىڭ ەڭبەك جولى تومەننەن باستالىپ, تاجىريبە ارقىلى قالىپتاسقانى دۇرىس. ۋنيۆەرسيتەتتە العان ءبىلىم مەن ناقتى وندىرىستىك تاجىريبە – ەكى بولەك دۇنيە. 25 جاسىندا دەپۋتات بولعاندار بار, الايدا ومىرلىك تاجىريبە مەن كاسىبي كەمەلدىك كوبىنە ۋاقىتپەن قالىپتاسادى.
كەي جاعدايلاردا قىزمەتتىك وكىلەتتىلىكتى اسىرا پايدالانۋ نەمەسە جاۋاپكەرشىلىكتەن تىس ارەكەتتەر دە بايقالىپ قالادى. مۇنداي قۇبىلىس قوعام تاراپىنان سىنعا ۇشىرايدى. بۇل رەتتە ۇلى ابايدىڭ «بولىس بولدىم مىنەكەي» ولەڭىندەگى بيلىككە سىن كوزبەن قاراۋ, ادىلەتسىزدىكتى اشكەرەلەۋ يدەيالارىنىڭ ءمانى بۇگىن دە وزەكتى.
ءاربىر مەملەكەتتىك قىزمەتشى قانداي لاۋازىمدا بولسا دا, حالىققا قىزمەت ەتۋ – باستى مىندەت ەكەنىن ۇمىتپاۋعا ءتيىس.
2026 جىلى 19 مامىردا مەملەكەت باسشىسى قاسىم-جومارت توقاەۆ «قازاقستان رەسپۋبليكاسىنىڭ مەملەكەتتىك قىزمەتى تۋرالى» جاڭا زاڭعا قول قويدى. بۇل قۇجاتتا مەملەكەتتىك قىزمەتشىنىڭ قۇقىقتارى مەن مىندەتتەرى ناقتى ايقىندالعان. قىزمەتكە قابىلداۋ كەزىندە ۇمىتكەردىڭ ءبىلىمى, تاجىريبەسى, كاسىبي بىلىگى مەن ەتيكالىق ۇستانىمى جان-جاقتى ەسكەرىلەدى.
جالپى, مەملەكەتتىك قىزمەتكە ورنالاسۋ – ۇلكەن جاۋاپكەرشىلىك جۇكتەيتىن جاڭا كەزەڭ. ول ءار ازاماتتان ءتارتىپ پەن كاسىبيلىكتى تالاپ ەتەدى. الداعى ۋاقىتتا ىرىكتەۋ جۇيەسىن ودان ءارى جەتىلدىرىپ, بىلىكتى مامانداردى دايارلاۋعا ەرەكشە كوڭىل ءبولىنۋى قاجەت.
مەملەكەتتىك قىزمەتشى ەلگە ۇلگى بولار ازامات بولۋعا ءتيىس. ونىڭ ءجۇرىس-تۇرىسى, سويلەگەن ءسوزى, قوعامدىق مىنەزى – ءبارى دە نازاردا. ول قوعامعا جات ارەكەتتەن اۋلاق بولۋى كەرەك. قۇمار ويىن, زياندى ادەتتەرگە اۋەستىك قىزمەتتىك بەدەلگە عانا ەمەس, زاڭ الدىنداعى جاۋاپكەرشىلىككە دە اسەر ەتەدى.
سىبايلاس جەمقورلىق نەمەسە زاڭ بۇزۋشىلىققا جول بەرگەن مەملەكەتتىك قىزمەتشى قاتاڭ جاۋاپكەرشىلىككە تارتىلادى. سوندىقتان ءاربىر مەملەكەتتىك قىزمەتشى تەك ءوز مىندەتىن ورىنداۋمەن شەكتەلمەي, ەل ىشىندە مەملەكەتتىك قىزمەتتىڭ بەدەلىن ارتتىرۋعا, ونىڭ ابىرويىن كوتەرۋگە ۇلەس قوسۋعا ءتيىس. حالىق سەنىمىن اقتاۋ – ەڭ ۇلكەن جاۋاپكەرشىلىك.
قۇرمانعالي ءۋالي,
قوعام قايراتكەرى
