وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, ءورت ءسوندىرۋشى بيىل 36 جاسقا تولىپتى. شەكارا قىزمەتىندە اسكەري بورىشىن وتەگەن سوڭ, 2013 جىلى قۇرمانعازى اۋدانىنداعى №7 ءورت ءسوندىرۋ بولىمىنە جۇمىسقا ورنالاسقان. قازىر بولىمشە كومانديرى بولىپ جۇمىس ىستەيدى.
ەرسەيىت ءبراليننىڭ ايتۋىنا قاراعاندا, بالا كەزىنەن قازاق كۇرەسىنە اڭسارى اۋعان. گىر تاسىن دا كوتەرەدى. كەيىنگى ءۇش جىلدان بەرى بىلەك كۇشىن تولىقتىراتىن وزگە دە سپورت تۇرىنەن جەتىستىككە جەتىپ ءجۇر. ماسەلەن, 2023 جىلى پاۋەرليفتينگتەن ازيا چەمپيوناتىنىڭ قولا جۇلدەسىنە يە بولدى. ءبىر جىلدان سوڭ قىرعىز رەسپۋبليكاسىندا جالاۋى جەلبىرەگەن الەم چەمپيوناتىندا 100 كگ سالماقتا توپ جارىپ, چەمپيون اتاندى. بىلتىر وزبەكستاندا كۇشتىك سپورت تۇرلەرىنەن وتكەن الەم چەمپيوناتىندا قولا جۇلدەنى يەلەندى. سول جىلى پاۋەرليفتينگتەن ازيا چەمپيوناتىنىڭ التىنىن ەنشىلەدى. ال بيىل اتالعان سپورتتان قازاقستان چەمپيونى بولدى.
«سپورت – مىقتى دەنساۋلىقتىڭ كەپىلى. سول سەبەپتەن سپورتتان قول ۇزبەي كەلەمىن. ۇدايى بىلەك كۇشىمدى تولىقتىراتىن جاتتىعۋلار جاسايمىن. تەمىرجول ۆاگوندارىنىڭ سالماعى اۋىر عوي. ونى سۇيرەۋ ءۇشىن تاباندىلىق, شىدامدىلىق قاجەت. ەكى جىل بۇرىن 94 توننا تارتاتىن ۆاگوندى سۇيرەگەن ەدىم. ەندى بيىل جەتى تەمىرجول ۆاگونىن 9,75 مەترگە دەيىن سۇيرەدىم. جەتى ۆاگوننىڭ سالماعى – 165,2 توننا», دەيدى ە.برالين.
الىپ كۇش يەسىنىڭ ەل رەكوردىن جاڭارتقان قادامى ەلەۋسىز قالعان جوق. جەتى ۆاگوندى سۇيرەگەن ەرسەيىت ءبراليننىڭ بۇل جەتىستىگى قازاقستاننىڭ «كينەس–2026» رەكوردتار كىتابىنا تىركەلدى. بۇل دەرەكتى ەلىمىزدەگى رەكوردتار كىتابىنا تىركەۋ جۇرگىزەتىن وكىل باقىتجان تاستۇلەكوۆ راستاپ, ءورت سوندىرۋشىگە ارنايى كۋالىكتى تاپسىردى.
اتىراۋ وبلىسى
