- گۋاردامار-دەل-سەگۋرادا (يسپانيا) مۇمكىندىگى شەكتەۋلى شاحماتشىلار اراسىندا تۋرنير ۇيىمداستىرىلدى. وعان 15 مەملەكەتتەن كەلگەن 44 ۇمىتكەر قاتىستى. جارىستى ەلىمىزدىڭ قۇراماسى 9 جۇلدەمەن قورىتىندىلادى. اسەل امانگەلدى ەكى رەت التىننان القا تاقسا, باقىتجان مايكەنوۆ پەن ارۋجان ءبايدىلدا دا ءدال سونداي قۇرمەتكە بولەندى. سونداي-اق وتانداستارىمىز 3 كۇمىس پەن 2 قولا مەدالدى قورجىنعا سالدى.
- 5–11 شىلدە كۇندەرى كاليدە (كولۋمبيا) جالاۋى جەلبىرەيتىن جاستاردىڭ الەم چەمپيوناتىندا ەلىمىزدىڭ ءۇش اۋىر اتلەتى كۇش سىناسادى. ولار – جاسوسپىرىمدەر اراسىندا ازيا ويىندارىنىڭ جەڭىمپازى نۇرجان جۇماباي (88 كگ), سول جارىستىڭ قولا جۇلدەگەرى نۇرسيلا بەرىكبول (58 كگ), جاستاردىڭ الەم بىرىنشىلىگىندە ءۇشىنشى ورىن يەلەنگەن ەرنۇر مىرزاحمەت (79 كگ).
- قىركۇيەك ايىندا تەننيستەن لەيۆەر كۋبوگى وتەدى. سول جارىستا الەم قۇراماسى ساپىندا بەن شەلتون (اقش, اتر №5), الەكس دە ميناۋر (اۋستراليا, №6), تەيلور فريتتسپەن (اقش, №9) بىرگە ءبىزدىڭ الەكساندر بۋبليك تە (№11) ونەر كورسەتەدى. ولار قۇرامىندا كارلوس الكاراس (يسپانيا, اتر №2), الەكساندر زۆەرەۆ (گەرمانيا, №3) فلاۆيو كوبوللي (يتاليا, №10), ياكۋب مەنشيك (چەحيا, №16) سىندى ساڭلاقتارى بار ەۋروپا كومانداسىنا قارسى وينايدى.
- قازىرگى بەسسايىستان ماجارستان استاناسى – بۋداپەشتە وتكەن الەم كۋبوگىنىڭ كەزەڭدىك سايىسىندا وتانداستارىمىز ءساتسىز ونەر كورسەتتى. ەڭ ۇزدىك كورسەتكىش تەمىرلان ابدىرايىموۆقا تيەسىلى. جارتىلاي فينالدا سۇرىنگەن ول 16-ورىندى قاناعات تۇتتى. قالعان سپورتشىلاردىڭ ناتيجەلەرى ءتىپتى تومەن.
- 25 شىلدەدە الماتىدا وتەتىن كاسىپقوي بوكس كەشىندە ءالي احمەدوۆ (25-2, 17 كو) وار-دىڭ وكىلى اسەماحل ۆەللەممەن (11-2-1, 6 كو) كۇش سىناسادى. بۇل جەكپە-جەكتە IBO نۇسقاسى بويىنشا جارتىلاي اۋىر سالماقتىڭ چەمپيوندىق بەلبەۋىنىڭ يەگەرى انىقتالادى.
- شۆەيتساريانىڭ نونىندا فۋتبولدان 2027 جىلى جاستار اراسىندا جالاۋى جەلبىرەيتىن ەۋروپا بىرىنشىلىگىنىڭ (U-19) ىرىكتەۋ ءتۋرنيرىنىڭ ەكىنشى كەزەڭىنىڭ جەرەبەسى تارتىلدى. «ا» توبىنا تۇسكەن جەرلەستەرىمىز بەلگيا, شوتلانديا, كوسوۆوعا قارسى وينايدى. بۇل باسەكەلەر 11–17 قاراشا ارالىعىندا شوتلانديادا وتەدى.
- بادمينتوننان ەل قۇراماسى ەرەۆانداعى «European Youth Gran Prix» تۋرنيرىندە بەس جۇلدە ولجالادى. جالعىز ارسلان ورمانوۆتىڭ ءوزى ءۇش رەت جەڭىس تۇعىرىنا كوتەرىلدى. ول جەكەلگەن سايىستا الدىنا جان سالماسا, جۇپتىق, ارالاس جۇپتار باسەكەسىندە قولا مەدالعا يە بولدى. ۆەرونيكا مويسەەنكو ءبىر كۇمىس, ءبىر قولا مەدال ەنشىلەدى.
- 19 ماۋسىمدا ءۇندىستاننىڭ استاناسى – نيۋ-دەليدە سەمسەرلەسۋدەن ازيا چەمپيوناتى باستالادى. بەس كۇنگە سوزىلاتىن باسەكەدە ەلىمىزدىڭ 23 نويانى ونەر كورسەتەدى. ولار – رۋسلان قۇربانوۆ, ەرلىك سەرتاي, نيكيتا جۋلينسكي, كيريلل پروحودوۆ, ۆاديم شارلايموۆ, ۆلاديسلاۆا اندرەەۆا, يرينا باكالدينا, سوفيا نيكولايچۋك, داريا سامودەلكينا (شپاگا); ارتيوم ساركيسيان, باقداۋلەت قۇرالبەك ۇلى, جانات نابيەۆ, نازارباي ساتتارحان, ايگەرىم سارىباي, كارينا دوسپاي, قايشا جانىبەك, اناستاسيا گۋليك (قىلىش), تەمىرلان قاليەۆ, عالىم نۇرىموۆ, تيموفەي سەمەنوۆ, سوفيا اقتاەۆا, اليونا گنوەۆا, الينا يسكاندەروۆا (راپيرا).
