سالتاناتتى راسىمدە وبلىس اكىمى مۇرات ەرگەشباەۆ مەملەكەت باسشىسى قاسىم-جومارت توقاەۆتىڭ ينۆەستيتسيا تارتۋ جانە زاماناۋي ءوندىرىستى دامىتۋ جونىندەگى تاپسىرماسىنا وراي وڭىردە قولايلى ينۆەستيتسيالىق احۋال قالىپتاسقانىن اتاپ ءوتتى.
«كەيىنگى جىلدارى ءوڭىرىمىزدىڭ ينۆەستيتسيالىق الەۋەتى ارتىپ, ءىرى جوبالار تابىستى جۇزەگە اسىپ كەلەدى. ايماق ەكونوميكاسىنا 2,3 ترلن تەڭگەدەن استام ينۆەستيتسيا تارتىلدى. الداعى ءۇش جىلدا 1,9 ترلن تەڭگەگە 48 ينۆەستيتسيالىق جوبانى جۇزەگە اسىرۋ جوسپارلانىپ وتىر. وسىلايشا, 10 مىڭنان استام جاڭا جۇمىس ورنى اشىلادى. اۋقىمدى جوبانى سىر وڭىرىندە جۇزەگە اسىرا باستاعانى ءۇشىن يسپاندىق «Roca Group» كومپانياسىنا ريزاشىلىعىمدى بىلدىرەمىن», دەدى ءوڭىر باسشىسى.
جيىندا «Roca Group» سەرىكتەستىگىنىڭ باس ديرەكتورى دانيەل حۋرادو ەرناندەس ينۆەستيتسيالىق ىنتىماقتاستىقتى نىعايتۋعا اتسالىسقان ەل ازاماتتارىنا العىس ايتتى. «KAZAKH INVEST» ۇك» اق قولداۋىمەن جۇزەگە اسىرىلاتىن باستاما اياسىندا بىلتىر ءبىرشاما جۇمىس جۇزەگە اسقان. جىل بۇرىن جوبانى جۇزەگە اسىرۋ قاعيداتتارى تۋرالى نەگىزدەمەلىك كەلىسىمگە قول قويىپ, تاراپتار سانيتارلىق-تەحنيكالىق بۇيىمدار شىعاراتىن زاۋىت جوباسىن بىرلەسىپ جۇزەگە اسىرۋ باستاماسىنا جاقىنداي ءتۇستى.
زاۋىتقا بولىنگەن جەر كولەمى – 24 گەكتار. 44,1 ملرد تەڭگە ينۆەس-تيتسيا سالىناتىن ءوندىرىس ورنى جىلىنا قۋاتى 500 مىڭ بۇيىمعا دەيىن شىعارا الادى. وندىرىلگەن ءونىم ىشكى نارىقتان بولەك ورتالىق ازيا ەلدەرىنە ەكسپورتتالادى دەگەن جوسپار بار. جاڭادان 300-گە جۋىق تۇراقتى جۇمىس ورنى اشىلاتىن ءوندىرىس ورنىندا جەرگىلىكتى مامانداردى وقىتۋ جانە ولاردىڭ بىلىكتىلىگىن ارتتىرۋ كوزدەلىپ وتىر.
وبلىستا ىرگەسى قالانعان تاعى ءبىر ءىرى ءوندىرىس ورنى – شىنى ىدىستار زاۋىتى. وڭىردە شىنى كلاستەرىن دامىتۋعا باعىتتالعان باستاما اياسىندا ۇيىمداستىرىلعان ءىس-شاراعا وبلىس اكىمى مۇرات ەرگەشباەۆ, «Seven Rivers» سەرىكتەستىگىنىڭ قۇرىلتايشىسى ءانۋار ۇمبەتاەۆ, قۇرىلىس كومپانيالارىنىڭ ديرەكتورلارى قاتىستى.
نەمىستىڭ «Horn» تەحنولوگياسىمەن جابدىقتالىپ, زاماناۋي ءارى ەكولوگيالىق تالاپتارعا ساي ءونىم وندىرەتىن زاۋىت «قازاق-نەمىس» بيزنەس-فورۋمى اياسىندا ىنتىماقتاستىقتى دامىتۋ تۋرالى مەموراندۋمنان باستاۋ الادى. 60 ملرد تەڭگەگە سالىنىپ, جىلىنا 240 ملن دانا شىنى ىدىس وندىرەتىن كاسىپورىندا 500-دەن استام جاڭا جۇمىس ورنى اشىلماق.
ءوڭىر وندىرىسىندە جاڭالىق كوپ. جاقىندا عانا «مارال نۇر» سەرىكتەستىگىنىڭ ۆاگون جوندەۋ جانە تەحنيكالىق قىزمەت كورسەتۋ كەشەنى اشىلسا, ەندى قوس زاۋىتتىڭ قۇرىلىسى باستاۋ الدى.
زاۋىتقا بارلىق ينجەنەرلىك ينفراقۇرىلىمى جۇرگىزىلگەن ايماقتان 38 گەكتار جەر تەلىمى تابىستالىپتى. زاۋىت جينالعان شىنى قالدىقتارىن قايتا وڭدەيدى. ءوندىرىس ورنى ىسكە قوسىلعاندا وڭىردەگى جوعارى ساپالى كۆارتس قۇمى, اك جانە دولوميت قورلارىن پايدالانىپ, جاڭا ىلەسپە كاسىپورىنداردى دامىتۋعا مۇمكىندىك تۋادى.
قىزىلوردا
