اتالعان سالتاناتتى جيىننىڭ اشىلۋ راسىمىنە وبلىس اكىمى بەرىك ءۋالي, كولىك ۆيتسە-ءمينيسترى جانىبەك تايجانوۆ, «قازاقستان تەمىر جولى» ۇك» اق قۇرىلىس جونىندەگى باسقارۋشى ديرەكتورى مارات يسقاليەۆ قاتىستى.
«اۋىل ستانساسىنداعى تەمىرجول بەكەتى سوڭعى رەت 2011 جىلى كۇردەلى جوندەۋدەن وتكەن. ستانسا ارقىلى حالىقارالىق باعىتتاعى «نوۆوسيبيرسك – الماتى» پويىزى قاتىنايدى. ال بەلاعاشتاعى تەمىرجول بەكەتى 1914 جىلى بوي كوتەرگەن. عيماراتقا سوڭعى رەت 2013 جىلى كۇردەلى جوندەۋ جۇرگىزىلگەن», دەيدى وبلىستىق ءباسپاسوز قىزمەتى.
قايتا جاڭعىرتۋ بارىسىندا اۋىل ستانساسىنداعى تەمىرجول بەكەتى عيماراتىنىڭ اۋماعى 240,9 شارشى مەتردەن 272,89 شارشى مەترگە, بەلاعاش تەمىرجول بەكەتى اۋماعى 208 شارشى مەتردەن 264,55 شارشى مەترگە دەيىن كەڭەيتىلدى. ەكى نىساندا دا شاتىر تولىق اۋىس-تىرىلىپ, ىشكى جانە سىرتقى ارلەۋ جۇمىسى جۇرگىزىلدى. پەرروندار قايتا جوندەلىپ, ىرگەلەس اۋماقتار اباتتاندىرىلدى. ۆوكزالدار جاڭا جيھازدارمەن جانە قاجەتتى جابدىقتارمەن قامتاماسىز ەتىلدى. سونداي-اق مۇگەدەكتىگى بار ازاماتتارعا, قارت ادامدار مەن كىشكەنتاي بالالارى بار انالارعا قولايلى جاعداي جاساۋعا ەرەكشە كوڭىل ءبولىندى. عيماراتتاردا ارنايى سانيتارلىق توراپتار, انا مەن بالا بولمەلەرى, پاندۋستار مەن تاكتيلدى باعىتتاۋشى ەلەمەنتتەر قاراستىرىلعان.
ءوڭىر باسشىسى قايتا جاڭعىرتىلعان ۆوكزالداردىڭ ەلدى مەكەن تۇرعىندارى ءۇشىن ماڭىزى زور ەكەنىن جەتكىزدى.
«اباي وبلىسىندا 10 تەمىرجول ۆوكزالىن رەكونسترۋكتسيالاۋ قولعا الىندى. بۇگىن مىنە, ەكى بىردەي تەمىرجول ۆوكزالى قايتا جاڭعىرتىلىپ, ەل يگىلىگىنە بەرىلدى. جارما, ۇشبيىك, اقتوعاي, دەگەلەڭ, جالاڭاشكول, شار ۆوكزالدارىن قىركۇيەك ايىنا دەيىن كەستەگە ساي اياقتاۋدى جوسپارلاپ وتىرمىز. سەمەي مەن اياگوز قالاسىنداعى ۆوكزالدار جىلدىڭ سوڭىندا دەيىن پايدالانۋعا بەرىلەدى. جاڭارتىلعان ۆوكزالدار اۋىل تۇرعىندارى مەن ءوڭىر قوناقتارىنا ساپالى قىزمەت كورسەتىپ, حالىق يگىلىگىنە اينالادى دەپ سەنەمىن», دەدى ب.ءۋالي.
اباي وبلىسى,
بورودۋليحا اۋدانى
