«ينفو تسەنتر» قوعامدىق بىرلەستىگىنىڭ ديرەكتورى زامانبەك قۇراقبايدىڭ مالىمەتىنشە, كوكتەمگى سۋ تاسقىنى كەزىندە جايىق وزەنىنىڭ جاعالاۋىنا توپىراق سالىنعان 5 ملن-عا جۋىق قاپ توسەلگەن ەدى. سۋ دەڭگەيى تومەندەگەننەن بەرى وزەن جاعالاۋىن تازارتۋ جۇمىسى ءجۇرىپ جاتىر.
«تابيعاتتى قورعاۋ اكتسياسى جاستاردىڭ ساناسىندا وتانسۇيگىشتىك, تۋعان ەلگە, قورشاعان ورتاعا جاناشىرلىق سەزىمىن قالىپتاستىرۋعا ىقپال ەتەدى. اكتسياعا قاتىسۋشىلار وزەن جاعاسىن ءارامشوپ پەن ءتۇرلى قوقىستان تازارتتى», دەيدى ز.قۇراقباي.
جىل سوڭىنا دەيىن «تازا قازاقستان» اكتسياسى اياسىندا 19 تابيعات قورعاۋ ءىس-شاراسىن ىسكە اسىرۋ كوزدەلىپ وتىر. وسى كەزگە دەيىن وننان استام سەنبىلىك وتكىزىلدى. سەنبىلىككە 45 مىڭنان استام ادام قاتىستى. قوقىس پوليگوندارىنا 1 500 توننادان استام قوقىس تاسىلدى. وتكەن اپتادا اكتسيا اياسىندا 1 مىڭعا جۋىق كوشەت ەگىلدى. يگىلىكتى شارا اتىراۋ قالاسىنداعى «وتباسى» ساياباعىندا ءوتتى. اتىراۋ وبلىستىق ەكولوگيا دەپارتامەنتىنىڭ باس مامانى اقتولقىن قالدىباەۆانىڭ پىكىرىنشە, قورشاعان ورتاعا جاناشىرلىق تانىتاتىن مۇنداي ءىس-شارانىڭ ماڭىزى زور. اكتسياعا قاتىسقانداردىڭ دەنى – مۇناي-گاز ونەركاسىبىنىڭ قىزمەتكەرلەرى. سونداي-اق قالا تۇرعىندارى, سپورتشىلار مەن ستۋدەنتتەر دە قاتىستى.
«اكتسيانىڭ ماقساتى – ەكولوگيالىق مادەنيەتتى قالىپتاستىرۋ. وسىعان وراي اتىراۋ قالاسى مەن 7 اۋداندا كوشەت ەگۋ, قورشاعان ورتانى تازالاۋ جۇمىسى ءار سەنبى سايىن ۇيىمداستىرىلىپ كەلەدى. ال تابيعاتتى جاسىل جەلەككە بولەۋدىڭ بىردەن-ءبىر جولى – كوشەتتى كوپتەپ ەگۋ. بىرىنشىدەن, بۇل ەكولوگيالىق احۋالدى جاقسارتادى. ەكىنشىدەن, اتموسفەرالىق اۋا ساپاسىنا دا وڭ ىقپال ەتەدى», دەيدى ا.قالدىباەۆا.
اتىراۋ وبلىسى
