ءار وڭىردەن كەلگەن بالۋاندار 8 سالماق دارەجەسىندە بەلدەسۋگە ءتۇستى. تارتىستى وتكەن سايىستا دياس داۋلەت (55 كگ, استانا قالاسى), بەكزات امزەبەك (60 كگ, شىمكەنت قالاسى), ەرجان ەرەنقايىپوۆ (66 كگ, استانا قالاسى), بەيبارىس تۇرعانبەك ۇلى (74 كگ, اقتوبە وبلىسى), نۇرداۋلەت باقتىباي ۇلى (82 كگ, شىمكەنت قالاسى), ولجاس يساحانوۆ (90 كگ, قاراعاندى وبلىسى), اسەت ءجۇنىسوۆ (100 كگ, اقمولا وبلىسى), نۇرسۇلتان قابلان (+100 كگ, قوستاناي وبلىسى) چەمپيون اتاندى. تۇيە بالۋاندار سايىسىندا استانالىق جاندوس سەيتەنوۆ فينالدىق بەلدەسۋدە قاراعاندى وبلىسىنان قاتىسقان ەرقانات مولداعۇلوۆتى جىقتى. «Sport Qory» دەمەۋشىلىگىمەن وتكەن رەسپۋبليكالىق ءتۋرنيردىڭ جەڭىمپازدارى مەن جۇلدەگەرلەرىنە ديپلوم, مەدالعا قوسا قارجىلاي سىياقى بەرىلدى.
تۋرنير بارىسىندا قوستاناي وبلىسى دەنە شىنىقتىرۋ جانە سپورت باسقارماسىنىڭ باسشىسى بەكبولات بايجانوۆ 2018 جىلى قازاق كۇرەسىنەن الەم چەمپيونى اتانعان ەرلان وماروۆتى «قۇرمەتتى سپورت قىزمەتكەرى» توسبەلگىسىمەن ماراپاتتادى.
ەپتىلىك پەن ۇشقىرلىق سىنعا ءتۇستى
شىمكەنتتە تەڭگە ىلۋدەن XVII قازاقستان چەمپيوناتى ءوتتى. شىرايلى شاھاردىڭ اتشابارىندا وتكەن ەل بىرىنشىلىگىنە 8 وبلىستان 19 سپورتشى قاتىستى.
ات ۇستىندەگى جاۋىنگەرلىك ونەردىڭ بۇگىنگە ميراس سپورتتىق سايىستا قاتىسۋشىلار ءۇش ستيلدە شەبەرلىك سىناستى. «جەتى قۇت» ستيلىندە شىمكەنتتىك باقىت ءتولتاي چەمپيون اتانسا, الماتى وبلىسىنىڭ وكىلى مارلەن نۇرسىدىق كۇمىس, بەيبارىس ساپار (تۇركىستان وبلىسى), داۋلەتيار ءساپارالى (قىزىلوردا وبلىسى) قولا جۇلدە ەنشىلەدى.
«قوس قۇلاش» ستيلىندە تۇركىستان وبلىسىنىڭ شاباندوزى راحات قامباروۆتىڭ الدىنا ەشكىم تۇسە المادى. تاجىريبەلى سپورتشى ءوزىنىڭ سامداعايلىعىن تاعى دا كورسەتىپ, جەڭىسكە جەتتى. كۇمىس جۇلدەگەر رۋسلان سەيداحمەت (قىزىلوردا وبلىسى), قولا مەدالدى قاناعات تۇتقان ءاسىمجان ناريمان (الماتى قالاسى), ايات نامازباي (جامبىل وبلىسى) دا بولاشاعىنان زور ءۇمىت كۇتتىرەدى.
ال «بەس بەلەس» ستيلىمەن سايىسقا تۇسكەندەر اراسىندا شىمكەنتتىك ازات تۇلكىبايدىڭ مەرەيى ۇستەم بولدى. تۇركىستان وبلىسىنىڭ شاباندوزى دوسجان تاستەمىروۆكە كۇمىس, قىزىلوردا وبلىسىنان قاتىسقان ايدار يسرايل مەن باتىس قازاقستان وبلىسىنان كەلگەن بەكنۇر سەرىكوۆكە قولا مەدال بۇيىردى.
ات سپورت تۇرلەرىنەن مەملەكەتتىك جاتتىقتىرۋشى نۇركەن بايبوريەۆ ەرەسەكتەر ساپىنا جاڭا قوسىلعان جاستاردىڭ ارىندى ەكەنىن, ۇلتتىق قۇرامانىڭ قاتارىنا قوسىلۋعا ۇمتىلاتىن تالانتتى شوعىر شىققانىن اتاپ ءوتتى.
ساداقشىلارعا سىي-قۇرمەت: پاتەر مەن كولىك
ۇلتتىق سپورت تۇرلەرىنەن ولجا سالىپ جۇرگەن ساڭلاقتارعا دا سىي-قۇرمەت كورسەتىلىپ, قولداۋ, قوشەمەت جاقسارىپ كەلەدى. ەلوردا تورىندە وتكەن V دۇنيەجۇزىلىك كوشپەلىلەر ويىندارىندا ءداستۇرلى ساداق اتۋدا ولجا سالعان ساڭلاقتار ماراپاتقا كەنەلدى.
ءداستۇرلى ساداق اتۋ فەدەراتسياسىنىڭ باسشىلىعى ەتنوسپورت الامانىندا جەڭىمپاز اتانعان مەرگەن جانىبەك قۇلمىرزاەۆقا استانا قالاسىنان ءبىر بولمەلى پاتەر تارتۋ ەتتى. ال كۇمىس جۇلدە يەلەنگەن ەربول تاپەنوۆكە اۆتوكولىك سىيلادى. قولا جۇلدە ولجالاعان قانات قاسىمحانعا 500 مىڭ تەڭگە, ۇلتتىق قۇرامانىڭ اعا باپكەرى دياس احمەتوۆكە 1 ميلليون تەڭگە بەرىلدى.
ىلگەرىدە كوشپەلىلەر ويىندارىندا ەل ابىرويىن اسىرعان قۇسبەگىلەرگە كاسىپكەرلەر تاراپىنان اۆتوكولىك بەرىلىپ, قۇرمەت كورسەتىلگەن ەدى. ەلوردا تورىندە وتكەن دۇنيەجۇزىلىك ەتنوسپورت بابادان قالعان ۇلتتىق ويىندارىمىزدى ۇلىقتاۋشى سايىپقىرانداردىڭ ەلگە ەتەنە تانىلۋىنا, سىي-قۇرمەتكە كەنەلۋىنە دە ءورىس اشتى.
