سۋرەت: ru.freepik.com
الماتىدا وتكەن تارتىسقا دەيىن 10 قازاندا سىرت الاڭدا اۋستريا ۇلتتىق قۇراماسىنا 4:0 ەسەبىمەن ەسە جىبەرگەن جىگىتتەر سلوۆەنيا فۋتبولشىلارىنا قارسى شيراق وينادى. جىگىتتەرگە وكپە جوق. ءتىپتى 17 مينۋت بويى سول قاپتالمەن شابۋىلدى ورىستەتكەن باۋىرجان يسلامحان ابات ايىمبەتوۆكە ۇتىمدى پاس بەردى. ابات ىقشام قيمىلداپ, شىرەنە تەپكەن. ەۋروپانىڭ تاجىريبەلى قاقپاشىلارىنىڭ ءبىرى سانالاتىن يان وبلاك ءبىزدىڭ جىگىتتەردەن مۇنداي شابۋىلدى كۇتكەن جوق ەدى. ەش قايران كورسەتە الماي, كوزىمەن ۇزاتىپ سالعان. اۋەلەپ جەتكەن الا دوپ قاقپا ماڭدايشاسىنان قايتتى. بۇدان كەيىن دە فۋتبولشىلار بىرنەشە قاۋىپتى شابۋىل جاساپ, قارسىلاستىڭ قورعانىسىن اجەپتاۋىر ابدىراتىپ تاستادى. ءتىپتى دوپقا يەلىك ەتۋ كورسەتكىشى دە باسىم بولدى. دەگەنمەن 55-مينۋتتا يان ملاكاردىڭ جويقىن سوققىسىن يگور ششاتسكي قايتارا المادى. ەسەپ: 0:1.
رەسەيلىك مامان ستانيسلاۆ چەرچەسوۆ ۇلتتىق قۇرامانىڭ باس باپكەرى قىزمەتىنە تاعايىندالعالى فۋتبولشىلار رەسمي ويىنداردا جەڭىسكە جەتە الماي كەلەدى. ءتورت ماتچتىڭ ۇشەۋىندە جەڭىلدى, ءبىر ويىندا تەڭ ءتۇستى. قارسىلاستار قاقپاسىنا ءالى ءبىر گول دا سوققان جوق. ەسەسىنە ءوز قاقپامىزعا 8 گول وتكىزىپ, 1 ۇپايمەن كوش سوڭىندا تۇرمىز.
«توپتاعى قۇرامانىڭ وسالى جوق. ءبىزدىڭ جىگىتتەر ءار ويىن سايىن شىڭدالىپ كەلەدى. سلوۆەنياعا قارسى ويىندا گول سوعۋعا مۇمكىندىك تۋعانىمەن, بۇيىرمادى. كوماندالىق ويىن جۇيەسىن ءالى دە نىعايتۋ كەرەك. كەم-كەتىكتى كەلەشەكتە بۇتىندەۋگە كۇش سالامىز», دەدى باس باپكەر. س.چەرچەسوۆ باپتايتىن ۇلتتىق قۇراما ۇلتتار ليگاسى اياسىندا ەندى ەكى ماتچ وتكىزەدى. 14 قاراشادا الماتىعا اۋستريا قۇراماسى كەلسە, 17 قاراشا كۇنى سىرتتا نورۆەگيا قۇراماسىمەن تارتىسقا تۇسەدى. توپتاعى ءۇش قۇرامانىڭ ەنشىسىندە ازىرگە 7 ۇپايدان بار.
