جارتىلاي اۋىر سالماقتا كۇش سىناسىپ جۇرگەن «Tobet Top Team» كلۋبىنىڭ مۇشەسى ديار نۇرعوجاي 2017 جىلدىڭ سوڭىندا كاسىپقويلار اراسىنداعى العاشقى جەكپە-جەگىن وتكىزدى. سول كەزدەن بەرى 10 رەت وكتاگونعا شىعىپ, بارلىق باسەكە دە جەڭىسكە جەتتى. تارقاتىپ ايتساق, المانبەت نۇراليەۆ, سۇلتان مۇساەۆ, سەرگەي بارىشەۆ, سەرجيو سوۋزانى ۇرىپ جىقسا, حاسان بوزور مەن اببوسبەك ۋساروۆتى سابميشن ادىسىمەن جەڭدى. ال ماگومەد ماگومەدوۆ پەن كونستانتين اندرەيتسەۆتى ۇپاي سانىمەن ۇتتى. Cوڭىندا ەسىمدەرى اتالعان ءتورت قارسىلاسىمەن ول اتاقتى حابيب نۇرماگومەدوۆ ىرگەتاسىن قالاعان «Eagle» پروموۋشەنىندە ايقاستى. نۇرعوجاي سول ۇيىمنىڭ چەمپيوندىق بەلبەۋىن دە يەلەندى.
قارسىلاسىن بەت قاراتپاي جەڭىپ جۇرگەن جىگىتكە كوپ كەشىكپەي UFC-ءدىڭ قىراعى ماماندارى نازار اۋداردى. سودان ولار دياردى دانا ۋايتتىڭ شوۋىنا شاقىردى. بىلتىرعى جىلدىڭ مامىر ايىندا قانداسىمىز ءابۋ-دابيدە ۇيىمداستىرىلعان ءدۇبىرلى دودا كەزىندە PFL مەن Bellatorدا ونەر كورسەتكەن ارگەنتينانىڭ ازۋلى سپورتشىسى ەميليان سورديگە (25-13-1, 23 كو) سان سوقتىردى. بۇل باسەكە ءبىرىنشى راۋندتا توقتاتىلدى. ال كەشە لاس-ۆەگاستا نۇرعوجاي پولشانىڭ مىقتىسى بارتوش شەۆچۋكپەن (8-3-1, 7 كو) شەبەرلىك بايقاستى. بۇل جولى دا قازاق فايتەرى باسەكەنى ۇزاققا سوزعان جوق. شىققان بەتتە تىزگىندى قولعا العان ديار ەكىنشى راۋندتا قارسىلاسىن باسىنان تەۋىپ قۇلاتىپ, ودان كەيىن وعان اۋىر-اۋىر سوققىلارىن دارىتتى. اراعا تاعى دا تورەشىلەر ءتۇستى.
ءباا مەن اقش-تاعى جارقىن جەڭىستەرىنىڭ ارقاسىندا ديار نۇرعوجاي UFC-مەن كەلىسىمشارتقا وتىردى. ەستەرىڭىزگە سالا كەتەيىك, بۇل كۇندەرى اتالعان پروموۋشەندە شاۆقات راحمونوۆ, اسۋ الماباەۆ, ازات ماقسۇم, بەكزات الماحان, نيكولاي ۆەرەتەننيكوۆ ايقاسىپ ءجۇر. ولاردان بولەك, قىتايدا دۇنيەگە كەلگەن قايسار ماقسات پەن سايران نۇردانبەك سىندى قانداستارىمىز بار. ءسال ەرتەرەكتە دامير يسماعۇلوۆ, جالعاس جۇماعۇلوۆ, سەرگەي موروزوۆ, ماريا اگاپوۆا دا سول ۇيىمدا ونەر كورسەتتى.
