– حالىقتىڭ رەفەرەندۋم ۋچاسكەلەرىنە كەلىپ, ازاماتتىق ءۇنىن بىلدىرۋىنە قولايلى جاعداي تۋدىرۋ ماقساتىندا بارلىق مۇمكىندىكتى پايدالاندىق. اكىمدىكتەر جانىنان سall-ورتالىقتار قۇرىلدى. اركىم ءوزىنىڭ تىزىمدە بار-جوعىن ارنايى Telegram-بوت ارقىلى تەكسەرۋ مۇمكىندىگىنە دە يە بولدى. كوميسسيا مۇشەلەرى بىلىكتىلىگىن ۇدايى ارتتىرىپ وتىردى. رەفەرەندۋم كەزەڭىندە مۇگەدەكتىگى بار ادامداردىڭ داۋىس بەرۋىن قامتاماسىز ەتۋ ءۇشىن بارلىق ۋچاسكە پاندۋستارمەن, قاجەتتى قۇرالدارمەن جابدىقتالدى. داۋىس بەرۋ كەزىندە وبلىس بويىنشا 6 ينۆاتاكسي قىزمەت كورسەتتى, – دەيدى ۇلىتاۋ وبلىسىنىڭ اۋماقتىق رەفەرەندۋم كوميسسياسىنىڭ توراعاسى الماس نىسانباەۆ.
حالىقتىڭ داۋىس بەرۋگە دەگەن بەلسەندىلىگى بىردەن-اق بايقالدى. ايتالىق, ءتۇس الەتىندە وبلىستاعى داۋىس بەرۋگە تىركەلگەن ازاماتتاردىڭ 43,31%-ءى تاڭداۋىن جاساپ ۇلگەردى. سولاردىڭ ءبىرى – حالىق ءارتىسى, ۇلىتاۋ وبلىسىنىڭ قۇرمەتتى ازاماتى, س.قوجامقۇلوۆ اتىنداعى جەزقازعان مۋزىكالىق-دراما تەاترىنىڭ اكتەرى دوسجان جانبوتاەۆ بولدى.
– بۇل – مەنىڭ ومىرىمدەگى بەسىنشى رەفەرەندۋم. ەڭ العاشقى قاتىسقان رەفەرەندۋم 1991 جىلى كسرو تاعدىرىنا بايلانىستى بولعان ەدى. بۇل جولعى رەفەرەندۋمعا ەلدىڭ ەرتەڭگى ەكونوميكالىق دامۋىنىڭ تەتىكتەرىنىڭ بىرىنە قاتىستى سۇراق قويىلعان. رەفەرەندۋم ماعان سونىسىمەن ەرەكشە كورىنەدى. قازىرگى ۋاقىت ءسات سايىن سونى جاڭالىقتارىن ۇسىنىپ جاتقانى بەلگىلى. بۇگىنگى جاڭالىق ەرتەڭ ەسكىرىپ جاتادى. سوندىقتان بىزگە الىسقا كوز تاستاۋ, تەرەڭنەن ويلانۋ ابزال. مەن ءوزىم تىركەلگەن №220 ۋچاسكەدە داۋىس بەرگەندە, حالىق تاراپىنان بەلسەندىلىكتىڭ جوعارى ەكەنىن بايقادىم. بۇل مەنى قۋانتتى. ويتكەنى ەلدىڭ تاعدىرىنا ءوزىمىز بەيجاي قاراساق, نە بولادى؟ – دەدى دوسجان ءابدىرالىم ۇلى.
جەزقازعان
