وليمپيا ويىندارى مەن الەم چەمپيوناتتارىنىڭ جۇلدەگەرى دەنيس تەندى ەسكە الۋعا ارنالعان ءدۇبىرلى دودانىڭ العاشقى جۇلدەلەرىن ايەلدەر ساراپقا سالدى. بيىل عانا رەسەيدەن قازاقستانعا قونىس اۋدارىپ, بۇل كۇندەرى ەلىمىزدىڭ تۋى استىندا ونەر كورسەتىپ جۇرگەن سوفيا سامودەلكينا قورىتىندى ەسەپتە 189,67 ۇپاي جيناپ, كۇمىسپەن كۇپتەلدى. ول تەك ءوزىنىڭ بۇرىنعى وتانداسى اناستاسيا گۋبانوۆادان قالىپ قويدى. ءتولياتتيدىڭ تۋماسى قازىرگى كەزدە گرۋزيانىڭ نامىسىن قورعاپ ءجۇر. ا.گۋبانوۆا 195,91 ۇپاي جينادى. قولا مەدالدى ۇندىستاندىق لارا ناكي گۋتتمان (188,86 ۇپاي) يەلەندى.
جالپى, بەسىنشى رەت ۇيىمداستىرىلىپ وتىرعان تۋرنيردە ەلىمىزدىڭ مانەرلەپ سىرعاناۋشى قىزدارى بىردە-ءبىر رەت جەڭىس تۇعىرىنىڭ ەڭ بيىك ساتىسىنا كوتەرىلگەن ەمەس. بۇعان دەيىنگى جارىستاردا رەسەيلىك سەرافيما ساحانوۆيچ (2019 جىلى), بەلورۋسسيالىق ۆيكتوريا سافونوۆا (2021), وڭتۇستىككورەيالىق كيم مين چحە (2022), يزرايلدىك ماريا سەنيۋك (2023) جەڭىمپاز اتانعان ەدى.
ەرلەر سايىسىندا ميحايل شايدوروۆقا ايرىقشا سەنىم ارتتىق. وسىدان ەكى جىل بۇرىن جاستار اراسىنداعى الەم بىرىنشىلىگىنىڭ كۇمىس جۇلدەگەرى اتانعان وتانداسىمىز ەرەسەكتەر اراسىندا دا جاقسى ناتيجە كورسەتىپ ءجۇر. ونىڭ ۇستىنە جىگىتتەرىمىز دە دەنيس تەننىڭ تۋرنيرىندە توپ جارعان ەمەس. بۇل رەتتە ەڭ ۇزدىك ناتيجەگە دياس جيرەنباەۆ قول جەتكىزگەنىن ايتا كەتكەن ابزال. 2022 جىلى ول كۇمىس مەدال ەنشىلەدى. ال باس جۇلدەنىڭ ەكەۋىن گرۋزيالىق موريس كۆيتەلاشۆيلي (2019) مەن نيكا ەگادزە (2022) ولجالاسا, رەسەيلىك پەتر گۋمەننيك (2021) پەن كورەيالىق يم دجۋ حوندا (2023) ءبىر-ءبىر رەتتەن دارالاندى.
ىشكى تۇيسىگىمىز الداماعان ەكەن, الماتىدا كەرەمەت ونەر كورسەتكەن ميحايل شايدوروۆ التىن مەدالدى موينىندا جارقىراتتى. 262,33 ۇپايدى قورجىنعا سالعان ول بارلىق قارسىلاسىنان قارا ءۇزىپ كەتتى. كۇمىس پەن قولا مەدال ازەربايجاندىق ۆلاديمير ليتۆينتسەۆ (246,00) پەن گرۋزيالىق نيكا ەگادزەگە (242,43) بۇيىردى.
