كۋاگەردىڭ فوتولارى
28 جاستاعى اناسى پوليتسياعا بالانىڭ ءۇي اۋلاسىنان جوعالىپ كەتكەنى تۋرالى 3 قازاندا كەشكى ۋاقىتتا حابارلاعان. پەتروۆكا اۋىلىنىڭ 5 جاسار تۇرعىنى بۇقار جىراۋ اۋداندىق پوليتسيا باسقارماسىنىڭ بۇكىل ۇجىمىن, تجد قىزمەتكەرلەرىن, اۋىلداستارىن اياقتان تىك تۇرعىزعان. بالانى ءتورت ساعات بويى 400-دەن اسا ادام يتتەرىمەن ىزدەگەن.
توپتارعا بولىنگەن ىزدەۋشىلەردىڭ جۇمىسى قاراڭعى ءتۇسىپ كەتكەننەن كەيىن قيىنداعان, ولار ءتۇرلى نۇسقالاردى پىسىقتاپ, بالانى بارلىق جەردەن ىزدەگەن. 4 ساعاتتان كەيىن جوعالعان بالا تۋعان اۋىلىنان 1 شاقىرىم قاشىقتىقتا دالادان تابىلعان.
«ىزدەۋ جۇمىستارىنا بارلىعى 400-دەن اسا ادام قاتىستى. بالانى پەتروۆكا اۋىلىنان ءبىر شاقىرىم جەردە اۋىل تۇرعىندارى مەن پوليتسيا قىزمەتكەرلەرى تاپتى. بۇقار جىراۋ اۋداندىق پوليتسيا باسقارماسىنىڭ باسشىلىعى ىزدەۋگە قاتىسقان بارلىق جاناشىر ازاماتقا جەدەل كومەك پەن قولداۋ كورسەتكەنى ءۇشىن العىس بىلدىرەدى», دەپ حابارلادى وبلىستىق پد ءباسپاسوز قىزمەتى.
