قازىردىڭ وزىندە الەمدىك رەيتينتە توپ-50-لىكتىڭ ساناتىنا ەنگەن سەگىز ساڭلاقتىڭ الماتىداعى جارىستا باق سىناۋعا بەل بۋعانى بەلگىلى بولىپ وتىر. ولار – فرەنسيس تيافو (№15 ATP), سەباستيان كوردا (№16 ATP), الەحاندرو تابيلو (№22 ATP), ارتۋر فيس (№24 ATP), كارەن حاچانوۆ (№27 ATP), فلاۆيو كابوللي (№32 ATP) , توماس ماحاچ (№34 ATP), ادريان ماننارينو (№44 ATP). بۇل ويىنشىلاردىڭ قول جەتكىزگەن تابىستارى تومەندەگىدەي:
فرەنسيس تيافو (اقش) – ەكى رەت US open دوداسىنىڭ جارتىلاي فينالىنا دەيىن جەتتى (2022, 2024 جىلدارى). اۋستراليانىڭ اشىق بىرىنشىلىگىنىڭ شيرەك فينالىندا وينادى (2019). اتر تۋرنيرلەرىندە ءۇش رەت توپ جاردى. ەڭ ۇزدىك كورسەتكىشى – 10-ورىن (2023). كەزىندە جاستار اراسىندا الەمنىڭ ەكىنشى راكەتكاسى اتاندى. 26 جاستا.
سەباستيان كوردا (اقش) – اۋستراليا اشىق بىرىنشىلىگىنىڭ شيرەك فينالىندا ونەر كورسەتتى (2023). اتر تۋرنيرلەرىندە ەكى رەت دارا شىقتى. ەڭ ۇزدىك كورسەتكىشى – 15-ورىن (2024). كەزىندە جاستار اراسىندا اۋستراليا اشىق بىرىنشىلىگىندە باس جۇلدەنى ولجالاپ, الەمنىڭ ءبىرىنشى راكەتكاسى اتاندى (2018). 24 جاستا.
الەحاندرو تابيلو (كانادا) ۋيمبلدوننىڭ ءۇشىنشى كەزەڭىنە دەيىن جەتتى (2024). اتر تۋرنيرلەرىندە ەكى رەت جەڭىمپاز اتاندى. جۇپتىق سايىستا پانامەريكا ويىندارىنىڭ كۇمىس جۇلدەگەرى (2023). ەڭ ۇزدىك كورسەتكىشى – 19-ورىن (2024). 27 جاستا.
ارتۋر فيس (فرانتسيا) – ۋيمبلدوننىڭ ءتورتىنشى كەزەڭىنە دەيىن جەتتى (2024). اتر تۋرنيرلەرىندە ەكى رەت توپ جاردى. ەڭ ۇزدىك كورسەتكىشى – 20-ورىن (2024). كەزىندە جاستار اراسىنداعى رولان گارروستىڭ فينالىندا ويناپ, جۇپتىق سايىستا باس جۇلدەنى يەلەندى (2021). 20 جاستا.
كارەن حاچانوۆ (رەسەي) – US open (2022), اۋستراليا اشىق بىرىنشىلىگىنىڭ (2023) جارتىلاي فينالىنا دەيىن جەتتى. رولان گارروس (2019, 2023) پەن ۋيمبلدوننىڭ (2022) شيرەك فينالىندا كۇش سىناستى. اتر تۋرنيرلەرىندە 6 مارتە مەرەيى ۇستەم بولدى. دەۆيس كۋبوگىنىڭ يەگەرى (2021). توكيو وليمپياداسىنىڭ كۇمىس جۇلدەگەرى (2021). ەڭ ۇزدىك كورسەتكىشى – 8-ورىن (2019). 28 جاستا.
فلاۆيو كابوللي (يتاليا) – US open (2024), اۋستراليا اشىق بىرىنشىلىگىنىڭ (2024) ءۇشىنشى كەزەڭىندە ونەر كورسەتتى. كەزىندە جاستار اراسىنداعى رولان گارروستىڭ جۇپتىق سايىسىندا جەڭىمپاز اتاندى (2020). ەڭ ۇزدىك كورسەتكىشى – 31-ورىن (2024). 22 جاستا.
توماس ماحاچ (چەحيا) – US open دوداسىنىڭ ءتورتىنشى كەزەڭىنە دەيىن جەتتى (2024). ميكستەن پاريج وليمپياداسىنىڭ جەڭىمپازى (2024). ەڭ ۇزدىك كورسەتكىشى – 33-ورىن (2024). 23 جاستا.
ادريان ماننارينو (فرانتسيا) – ۋيمبلدون (2013, 2017, 2018), اۋستراليا اشىق بىرىنشىلىگىنىڭ (2022, 2024) ءتورتىنشى كەزەڭىندە باق سىنادى. اتر تۋرنيرلەرىندە بەس رەت توپ جاردى. ەڭ ۇزدىك كورسەتكىشى – 17-ورىن (2024). 36 جاستا.
مىنە, الماتىعا كەلەتىن سەگىز ساڭلاق – وسىلار. ال ەلىمىزدىڭ تۋى استىندا الەكساندر بۋبليك, الەكساندر شەۆچەنكو, ميحايل كۋكۋشكين, الەكساندر نەدوۆەسوۆ, تيموفەي سكاتوۆ, بەيبىت جۇقاەۆ دەنيس ەۆسەەۆ, ءامىر ومارحانوۆ ونەر كورسەتەدى.
