دەنيس تەن – ەل سپورتى تاريحىندا وشپەس ءىز قالدىرعان ەرەن تۇلعا. 1993 جىلعى 13 ماۋسىمدا الماتىدا دۇنيەگە كەلگەن ول بالاۋسا شاعىنان سپورتتىڭ وسى ءتۇرىن سەرىك ەتتى. ءوز قاتارلاستارىنىڭ الدى بولىپ, ەرەسەكتەر دۋىنا ەركىن قوسىلدى. 2010 جىلى 16 جاسىندا ۆانكۋۆەردە الاۋى تۇتانعان قىسقى وليمپيا ويىندارىنا قاتىستى. ۇيەڭكى جاپىراقتار ەلىندەگى جارىستى جاس دارىن 11-ورىنمەن قورىتىندىلادى. ءار جىلدارى نيكولاي موروزوۆ, فرەنك كەرولل, رافاەل ارۋتۋنيان, ەلەنا بۋيانوۆا, تاتيانا تاراسوۆا سىندى اتاقتارى الىسقا جايىلعان مايتالمان مامانداردان ءتالىم-تاربيە العان دەنيس كوپتەگەن بەلەستى باعىندىردى. اتاپ ايتساق, ازيا ويىندا-رىنىڭ جەڭىمپازى (2011), الەم چەمپيوناتىنىڭ كۇمىس (2013), قولا (2015) جۇلدەگەرى, سوچي وليمپياداسىنىڭ قولا جۇلدەگەرى (2014), ءتورت قۇرلىق چەمپيوناتى (2015) مەن دۇنيەجۇزىلىك ۋنيۆەرسيادانىڭ (2016) جەڭىمپازى اتاندى. دەنيس تەنگە دەيىن بىردە-ءبىر مانەرلەپ سىرعاناۋشىمىز ءدال وسىنداي وراسان زور جەتىستىككە جەتپەگەن ەدى.
دەنيس وليمپيا ويىندارى مەن الەم چەمپيوناتتارىندا قازاق ەلىنىڭ ءانۇرانىن شىرقاتىپ, تۋىن بيىكتە جەلبىرەتۋدى ارماندادى. سول ماقساتىنا جەتۋ جولىندا جاتپاي-تۇرماي دايارلاندى. بىراق 2018 جىلعى 19 شىلدەدە الماتىنىڭ قاق ورتاسىندا ايگىلى سپورتشى قاپيادا قاندىقول قاراقشىلاردىڭ قولىنان قازا تاپتى. ول نەبارى 25 جاستا ەدى...
جىل سايىن ەلىمىزدە دەنيس تەندى ەسكە الۋعا ارنالعان ءتۇرلى شارالار ۇزدىكسىز ۇيىمداستىرىلىپ تۇرادى. سولاردىڭ ءبىرى – وسى تۋرنير. بيىل استانادا وتەتىن دوداعا 31 مەملەكەتتەن كەلگەن 120-دان اسا سپورتشى قاتىسادى. سولاردىڭ اراسىندا دياس جيرەنباەۆ (قازاقستان), دانيەل گراسسل (يتاليا), اناستاسيا گۋبانوۆا (گرۋزيا), ستار ەندريۋس (اقش), الەكسا راكيچ (كانادا), يە كۋان مەن حاننا ليم (وڭتۇستىك كورەيا) سىندى ساڭلاقتار بار.
