مۇنداي حابارلاندىرۋدان كەيىن بوزانباي اۋىلىنىڭ ماڭىنداعى بۇركىتتوبەدە وتەتىن قۇسبەگىلەر سايىسىنا اسىعاتىنداردىڭ قاراسى كوپ بولاتىن سەكىلدى. باسقاسى باسقا, ويى جاڭاشىل, يدەياسى ەرەكشە كاسىپكەر ءجۇز سىرماقتى قايدان جيناپ الدى دەپ تاڭدانىستىق. بابادان بالاعا ميراس بولىپ كەلە جاتقان بەكزات ونەردىڭ تۋىندىسى سىرماقتى مۋزەيدەن كورەتىن كۇنگە جەتتىك ەمەس پە؟ ال, بۇگىن تابيعات اياسىنا جايىلدى.
«بۇل سىرماقتار وبلىستىڭ ءار جەرىنەن جينالدى. شىعىستاعى ەڭ كەرەمەت, ەڭ ادەمى سىرماقتار دەۋگە بولادى. مۋزەي قورىنان الىنعاندارى دا, قولونەرشىلەردىڭ كوللەكتسياسىنان الىنعاندارى دا, جەكەلەگەن اۋلەتتەن الىنعاندارى دا بار. كۇزدىڭ ءبىر ادەمى, ميزام شۋاق توگىلگەن كۇنىن ادەيى تاڭدادىق. بىرنەشە ءجۇز مەتر پوليەتيلەن ساتىپ الىپ, سىرماقتىڭ استىنا جايدىق. التايدىڭ 100 سىرماعى – بارشاڭىزعا ساۋىن ايتۋ. جار سالىپ, «شىعىس سالبۋرىنى» حالىقتىق مەيرامىنا شاقىرۋ», دەدى قازاقتىڭ رۋحانياتىن ناسيحاتتاپ جۇرگەن مۇحتار تويبازاروۆ.
قازاق حالقىنىڭ عاجايىپ ونەرىن تاماشالاۋعا كوپشىلىك ارنايى باردى. نەمىس, ورىس, بەلارۋس, تاتار, پولياك, شەشەن سىندى ۇلتتاردىڭ وكىلدەرى دە كەلىپ, قازاقتىڭ ونەرىمەن تانىستى.
ءيا, ساۋىن ايتىلدى. ەندى 12 قازاندا بوزانباي كوگىندە قۇس سامعاپ, تۇلپار ءدۇبىرى ەستىلەدى.
ۇلان اۋدانى,
بوزانباي اۋىلى
