جاڭا كىتاپتىڭ نەگىزىندە وقۋشىلار تەوريالىق ءبىلىم الىپ قانا قويماي, كۇندەلىكتى ومىردە ءجيى قولداناتىن تۇرمىستىق زات ۇلگىلەرىن جاساۋدى ۇيرەنەدى. مىسالى, «ساندىك-قولدانبالى ونەر» تاقىرىبى بويىنشا بالالار قازاقتىڭ ۇلتتىق ويۋ-ورنەكتەرىنىڭ تاريحىمەن, ونىڭ تۇرلەرىمەن, ەرەكشەلىكتەرىمەن تانىسادى. ودان سوڭ قازاقى ويۋلاردى ويىپ, قورجىن, كىلەمشە جاسايدى.
ساباق بارىسىندا وقۋشىلار اتالعان زاتتاردى جاساۋعا قانداي قۇرالدار قاجەت ەكەنىن انىقتاپ, تۇرمىستىق زاتتاردىڭ قانداي ماتەريالداردان تۇراتىنىن وقىپ, ۇيرەنەدى. كىتاپتاعى ۇلگىلەرگە سايكەس بالالار ماتانى بۇكتەيدى, قيادى, وعان كەستە سالىپ, ينەمەن جۇمىس ىستەۋگە ماشىقتانادى. كەيىن جاساعان سومكە, قورجىندارىنا ء«مۇيىز», «قوشقارمۇيىز», «گۇل», «وركەش» سياقتى ۇلتتىق ويۋلاردى سالادى. ونى مونشاق پەن زەر سياقتى اشەكەيلەرمەن بەزەندىرەدى. وقۋشىلار ماتانى نەمەسە قاعازدى قيۋ, جابىستىرۋ بارىسىندا قولدارى, ساۋساقتارى يكەمدى بولا تۇسەدى. ەڭبەككە قابىلەتى ارتىپ, شىدامدى, تىڭعىلىقتى بولۋعا, قاجەت نارسەنى ءوزى جاساپ الۋعا جانە اينالاسىن تازا ۇستاۋعا داعدىلانادى. قانداي دا ءبىر زاتتى ساندەيتىن بوياۋلاردى تاڭداۋ, ويۋلاردى ءدال قاجەت تۇسىنا ورنالاستىرۋ ارقىلى وقۋشىلاردىڭ قيالى داميدى, سۋرەتكەرلىك تالعامى مەن ءتۇرلى تۇستەردى سەزىنۋ قابىلەتى ارتادى.
ەڭبەككە بەيىمدىلىكتى ارتتىرۋمەن قاتار, بالالار ۇلتتىق قۇندىلىقتارعا, حالقىمىزدىڭ مادەنيەتىنە قۇرمەتپەن قاراۋعا داعدىلانادى. بىرلەسە وتىرىپ ويۋلى زاتتاردى جاساۋ كەزىندە بالالار جۇپ جانە توپ بولىپ جۇمىس ىستەۋگە ۇيرەنەدى. ءبىر-بىرىمەن پىكىر الماسادى. جاساعان زاتتارىن وتباسىنا, دوستارىنا تارتۋ ەتىپ, ساباق بارىسىندا العان اسەرلەرى مەن بىلىمدەرىن بولىسەدى.
ايتا كەتەيىك, وقۋلىقتا قوسىمشا تاپسىرمالاردى قولجەتىمدى ەتەتىن ءارى وقۋ ماتەريالىن يگەرۋگە مۇمكىندىك بەرەتىن QR-كودتار ورنالاسقان. بۇدان بولەك, ساباق اياسىن كەڭەيتۋگە مۇمكىندىك بەرەتىن جانە كىلەمشە مەن قورجىن سياقتى بۇيىمداردى جاساۋدىڭ شىعارماشىلىق بارىسىن كورسەتەتىن وقۋلىقتىڭ ەلەكتروندى نۇسقاسى قوسا بەرىلگەن. بۇل – بەينەروليكتەر كورسەتۋ, اۋديو جازبالاردى تىڭداتۋ, ءتۇرلى ينتەراكتيۆتى تاپسىرمالاردى ورىنداتۋ ارقىلى وقىتۋدى جان-جاقتى قىزىقتى وتكىزۋگە سەپتىگىن تيگىزەدى.
