فوتو: gov.kz
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, قر-نىڭ زەينەتاقى جۇيەسىن ودان ءارى جاڭعىرتۋدىڭ 2030 جىلعا دەيىنگى تۇجىرىمداماسىنا سايكەس بازالىق زەينەتاقى مولشەرى جىل سايىن ينفلياتسيا دەڭگەيىنە, ال ىنتىماقتى زەينەتاقى مولشەرى ينفلياتسيا دەڭگەيىنەن 2%-عا ىلگەرى يندەكستەلەدى. ماسەلەن, 2024 جىلعى 1 قاڭتاردان باستاپ ىنتىماقتى زەينەتاقىلاردىڭ مولشەرى 9%-عا ۇلعايىپ جانە ەڭ تومەنگى كۇنكورىس دەڭگەيى كولەمىنىڭ وزگەرۋىنە بايلانىستى بازالىق زەينەتاقىنىڭ مولشەرى ارتقان.
«مەملەكەت باسشىسىنىڭ تاپسىرماسىنا سايكەس بازالىق زەينەتاقىنىڭ مولشەرىن كەزەڭ-كەزەڭىمەن ارتتىرۋ جالعاسۋدا. وسىلايشا, 2024 جىلعى 1 قاڭتاردان باستاپ ونىڭ ەڭ تومەنگى مولشەرى ەڭ تومەن كۇنكورىس دەڭگەيىنىڭ 60%-ىنان 65%-ىنا دەيىن, ال ەڭ جوعارى مولشەرى 100%-ىنان 105%-ىنا دەيىن ارتتىرىلدى», دەلىنگەن حابارلامادا.
ايتا كەتەيىك, قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى قارت ادامداردى قولداۋ, ولارعا الەۋمەتتىك قىزمەت كورسەتۋ دەڭگەيىن ارتتىرۋ, قوعامدىق ومىرگە تارتۋ بويىنشا شارالاردى ىسكە اسىرىپ جاتىر. سونداي-اق رەسپۋبليكادا 92 بەلسەندى ۇزاق ءومىر ءسۇرۋ ورتالىعى اشىلعان. ورتالىقتاردىڭ جۇمىس ىستەۋىنە جەرگىلىكتى بيۋدجەتتەردەن بولىنگەن قاراجاتتىڭ جالپى سوماسى 2024 جىلعا 5,9 ملرد تەڭگەنى قۇراعان.
1 قازاندا ەلىمىزدە قارتتار كۇنىنە ورايلاستىرىلعان ايلىق باستالادى. وبلىستاردىڭ, قالالار مەن اۋدانداردىڭ اكىمدەرى, كاسىپورىندار مەن ۇيىمداردىڭ باسشىلارى اعا بۋىن ازاماتتارىن الەۋمەتتىك قولداۋ جونىندەگى ءىس-شارالاردى, ەڭبەك ۇجىمدارىندا كەزدەسۋلەردى, امبۋلاتوريالىق-ەمحانالىق ۇيىمداردا اشىق ەسىك كۇندەرىن جانە باسقالاردى وتكىزەتىن بولادى.
«سونىمەن قاتار قارتتار كۇنىنە وراي استانا قالاسىندا, اقمولا (ەڭ تومەنگى زەينەتاقى الۋشىلارعا), قاراعاندى (75 جاستان اسقان ازاماتتارعا), پاۆلودار (ەڭ تومەنگى زەينەتاقى الۋشىلارعا جانە 80 جاستان اسقان ازاماتتارعا), شىعىس قازاقستان (90 جاستان اسقان ازاماتتارعا), ماڭعىستاۋ (70 جاستان اسقان ازاماتتارعا 25 قازانعا قارسى), تۇركىستان (جالعىزباستى زەينەتكەرلەرگە جانە 100 جاستان اسقان ازاماتتارعا) وبلىستارىندا, سونداي-اق ۇلىتاۋ وبلىسىندا (70 جاستان اسقان ازاماتتارعا جانە مۇگەدەكتىگى بار ادامدارعا) 235,8 مىڭ ادامدى قامتي وتىرىپ, جالپى سوماسى 2,7 ملرد تەڭگەگە بىرجولعى ماتەريالدىق كومەك كورسەتىلەتىن بولادى», دەپ ناقتىلدى مينيسترلىكتىڭ ءباسپاسوز قىزمەتى.
جالپى, بيىل جەرگىلىكتى بيۋدجەتتەردىڭ مۇمكىندىكتەرىن ەسكەرە وتىرىپ جانە بيزنەستىڭ الەۋمەتتىك جاۋاپكەرشىلىگى اياسىندا قارت ازاماتتاردى الەۋمەتتىك قولداۋعا 12,4 ملرد تەڭگەدەن استام قاراجات باعىتتالعان (جەرگىلىكتى بيۋدجەتتەردەن – 11,8 ملرد تەڭگە, تارتىلعان قاراجات ەسەبىنەن – 0,6 ملرد تەڭگە).
ونىڭ ىشىندە:
- ازىق-ت ۇلىك جيىنتىعىن ۇسىنۋعا – 229,4 ملن تەڭگە (26,5 مىڭ ادام);
- جەڭىلدىكپەن ءدارى-دارمەكپەن قامتاماسىز ەتۋگە – 2 ملرد 318 ملن تەڭگە (62,2 مىڭ ادام);
- ءتىس پروتەزدەۋگە – 515,5 ملن تەڭگە (3,9 مىڭ ادام);
- ساناتوريلىك-كۋرورتتىق ەمدەۋدى ۇسىنۋعا – 3 ملرد 448 ملن تەڭگە (23,3 مىڭ ادام);
- تۇرعىن ءۇيدى جوندەۋگە – 31,4 ملن تەڭگە (189 ادام);
- وتىنمەن قامتاماسىز ەتۋگە – 75,6 ملن تەڭگە (2,6 مىڭ ادام);
- جالپى پايدالانۋداعى كولىكتە جەڭىلدىكپەن جول ءجۇرۋدى ۇسىنۋعا – 5 ملرد 179 ملن تەڭگە (409,9 مىڭ ادام);
- كومەكتىڭ باسقا تۇرلەرىنە – 638,4 ملن تەڭگە (81,5 مىڭ ادام).
ەسكە سالا كەتەيىك, حالىقارالىق قارتتار كۇنى 1990 جىلى 14 جەلتوقساندا بىرىككەن ۇلتتار ۇيىمى باس اسسامبلەياسىنىڭ 45-سەسسياسىندا جاريالانعان ەدى. ونى وتكىزۋدىڭ باستى ماقساتى – قاريالاردىڭ مەملەكەت پەن قوعام الدىنداعى ەڭبەگىن قۇرمەتتەۋ جانە مويىنداۋ, سونداي-اق ولاردىڭ ماسەلەلەرى مەن قاجەتتىلىكتەرىنە نازار اۋدارۋ, ءومىر ءسۇرۋ ساپاسىن ارتتىرۋ قاجەتتىلىگى, ولارعا جالپىعا بىردەي قامقورلىق كورسەتۋ.
