- جاپونيانىڭ سايتاما قالاسىندا ارالاس جەكپە-جەكتەن ۇيىمداستىرىلعان Rizin-48 تۋرنيرىندە قازاق فايتەرى قارشىعا داۋىتبەك جەرگىلىكتى سپورتشى تاكەاكي كينوشيتۋدى ءبىرىنشى راۋندتا-اق ۇرىپ جىقتى. وسىلايشا, الماتىدا ىرگەتاسى قالانعان «الاش پرايد» كلۋبىنىڭ مۇشەسى ءوزىنىڭ ون التىنشى كەزدەسۋىندە جەڭىسكە جەتتى.
- استانادا قازاقستان ۇلتتىق وليمپيادا كوميتەتىنىڭ (ۇوك) باس اسسامبلەياسىنىڭ كەزەكتەن تىس جيىنى ءوتتى. بۇل شاراعا ۇوك پرەزيدەنتى گەننادي گولوۆكين, سپورت جانە تۋريزم ۆيتسە-ءمينيسترى سەرىك جاراسباەۆ, وليمپيالىق سپورت تۇرلەرىنەن 33 رەسپۋبليكالىق فەدەراتسيانىڭ وكىلدەرى قاتىستى. گ.گولوۆكين سپورتشىلاردىڭ پاريج وليمپياداسىنداعى جەتىستىكتەرىنە توقتالىپ, 2028 جىلى لوس-اندجەلەستە الاۋى تۇتاناتىن جازعى ويىندارعا دايىندىقتى قازىردەن باستاۋ كەرەكتىگىنە باسا نازار اۋداردى.
- ازەربايجاننىڭ باس شاھارى – باكۋدە كاسىپقوي بوكستان «IBA چەمپيوندار ءتۇنى» دەپ اتالاتىن تۋرنير ءوتتى. بۇل جارىستا ەلىمىزدىڭ جانكۇيەرلەرى اسا اۋىر سالماقتاعى نۇرسۇلتان امانجولوۆ (7-2, 6 كو) پەن ماگومەدراسۋل مەدجيدوۆتىڭ (3-1, 3 كو) ايقاسىن تاعاتسىزدانا كۇتتى. رينگ قوجايىنىنىڭ لوندون وليمپياداسى مەن ەۋروپا ويىندارىنىڭ قولا جۇلدەگەرى, ءۇش دۇركىن الەم چەمپيونى, قۇرلىق بىرىنشىلىگىنىڭ جەڭىمپازى دەگەن اتاقتارى بار. 2013 جىلى الماتىدا وتكەن دۇنيەجۇزىلىك دودانىڭ فينالىندا ماگومەدراسۋل ءبىزدىڭ يۆان دىچكونى اۋىر نوكاۋتقا جىبەرگەن ەدى. باكۋدەگى باسەكەدە مەدجيدوۆ تورەشىلەردىڭ شەشىمىمەن جەڭىس تويىن تويلادى.
- فۋتزالدان الماتىنىڭ «قايراتى» قىتايداعى حالىقارالىق تۋرنيرگە قاتىستى. بۇل جولى جەرلەستەرىمىز ءوز جانكۇيەرلەرىن قۋانتا المادى. العاشقى ماتچتا «شەنچجەن نانلينگتەن» (4:7) ۇتىلعان «قايرات» كەلەسى كەزدەسۋدە جاپونيانىڭ «شيناگاۆاسىن» (6:4) ۇتتى. بىراق ءۇشىنشى ويىندا تايلاندتىڭ «Black Pearl» كلۋبىنا (3:4) جول بەردى.
- «اقتوبە» فۋتبول كلۋبى ەل كۋبوگىنىڭ يەگەرى اتاندى. الماتىداعى ورتالىق ستاديوندا وتكەن فينالدىق سايىستا ولار «اتىراۋدى» 2:1 ەسەبىمەن ەڭسەردى. ءسويتىپ اتالعان جارىستا اقتوبەلىكتەر ەكىنشى مارتە توپ جاردى. العاش رەت ولار وسىدان 16 جىل بۇرىن ەل كۋبوگىن يەمدەنگەن.
- تايلاندتا ۆولەيبولدان ايەلدەر اراسىنداعى ازيانىڭ كلۋبتىق چەمپيوناتى اياقتالدى. پەتروپاۆلوۆسكىنىڭ «قۋانىشى» جارتىلاي فينالدا ۆەتنامنىڭ «Lp Bank Ninh Binh» كلۋبىنا (1:3) ەسە جىبەرسە, قولا مەدال جولىنداعى تارتىستا جەرگىلىكتى «ناحون راتچاسيمادان» (0:3) جەڭىلدى.
- ەلىمىزدىڭ 18 جاستاعى تەننيسشىسى سونيا جيەنباەۆا مادريدتە شىمىلدىعى تۇرىلگەن ITF تۋرنيرىندە توپ جاردى. جارتىلاي فينالدا شۆەيتساريالىق دجەنني دەرسكە (7:6, 6:2) شاڭ قاپتىرعان ول اقتىق سىندا ۇلىبريتانيالىق ەليس گيللاندى (6:1, 5:7, 6:1) قاپى قالدىردى.
- الماتىدا گاندبولدان ازيانىڭ كلۋبتىق چەمپيوناتى ءوز مارەسىنە جەتتى. باس جۇلدەگە تارتىس ەلىمىزدىڭ قوس كومانداسى – قىزىلوردانىڭ «قايسارى» مەن الماتىنىڭ «دوستىعى» اراسىندا ءوتتى. بۇل سايىس 45:23 ەسەبىمەن سىر بويىنان كەلگەن سۇلۋلاردىڭ پايداسىنا شەشىلدى. جارىس قورىتىندىسىندا ۆەرونيكا حاردينا («قايسار») ەڭ ۇزدىك ويىنشى دەپ تانىلدى.
