«Cassaق» ماماندارى ازىرگە ارنايى تاپسىرىسپەن عانا كيىم تىگىپ وتىر. اركىم تالعامىنا قاراي كەۋدەشە, جەيدە سەكىلدى كيىمدەردى از ۋاقىتتا تىكتىرىپ الادى. كاسىپورىن ساننان بۇرىن ساپانى العا قويعاندىقتان, ماتانىڭ جاقسىسىن تاڭدايدى. ءتىپتى كوشپەلىلەر ويىندارىندا ەل نامىسىن قورعاعان ساداقشىلارعا ەتنوستيلدە كيىم تىگىپ, ءسان-سالتاناتىن جاراستىرعان. ال وسى ءىستىڭ باسى-قاسىندا جۇرگەن سەرىكتەستەر – اياۋجان ءاشىموۆا مەن پەريزات راحاتقىزى. اياۋجان اكىمشىلىك ماسەلەلەرگە جاۋاپ بەرسە, ديزاينەرلىك ماماندىقتى تامامداعان پەريزات كيىم تىگۋ سىندى جۇمىستارمەن اينالىسادى. تسەح ماماندارى اتاۋىنا قاراي ۇلتتىق ناقىشتاعى كيىم عانا ەمەس, زامانعا قاراي ءساندى كويلەك-كونشەكتىڭ ءتۇر-ءتۇرىن لايىقتاپ بەرەدى. بۇل جەردى تسەح ەمەس, ونەردىڭ قايناعان ورداسى دەسە دە بولادى.
سۋرەتتى تۇسىرگەن – اۆتور
– ءوزىم ديزاينەرلىك وقۋدى تامامداعان سوڭ اتەلە اشتىم. بىراق ويىمدا ۇلكەن دۇنيە جاساۋ جۇرگەن ەدى. سودان اياۋجانمەن تانىسىپ, كاسىپتى قولعا الدىق. قازىر ورتاق يدەيانى جۇزەگە اسىرىپ جاتىرمىز. كاسىپ ۇلكەن بولعان سايىن دامۋى باياۋ جۇرەدى دەيدى عوي. الايدا ءبىزدىڭ بيزنەس بىردەن ءوزىن اقتاي باستادى, – دەيدى كيىم ديزاينەرى پەريزات راحاتقىزى.
ۇلت مۇددەسىنە ەڭبەك ەتكىسى كەلگەن ولار ەڭ اۋەلى تسەح اتاۋىن ويلاستىرعان. اقىلداسا كەلە, «قاسساق» دەگەن اتاۋعا توقتالىپتى. پەريزاتتىڭ ايتۋىنشا, شىعىسقا كەلگەن تۋريستەرگە التايدىڭ برەندى ىسپەتتى جەيدە, كەۋدەشە تۇرلەرىن ۇسىنعىلارى كەلەدى. ايتپەسە, ساياحاتشىلارعا ۇسىناتىن بال مەن ەمدىك شوپتەن باسقا كادەسىيلار جوقتىڭ قاسى.
– قازىر ءبىز حالىققا نە كەرەگىن ءبىلۋ ءۇشىن تەستىك رەجىمدە ءارتۇرلى تالعامعا لايىق جۇمىستاردى قولعا الدىق. ۋاقىت وتە سۇرىپتالىپ, كوپشىلىك سۇرانىسىنا يە كيىمدەردى ودان سايىن جەتىلدىرەمىز. ءار اۋداننىڭ برەند كيىمدەرىن دە ويلاستىرىپ جاتىرمىز, – دەيدى جاس كاسىپكەر.
راس, ءار اۋداننىڭ وزىنە ساي كيىمدەرى بولسا, تۋريستەردى سول قىزىقتىرۋى مۇمكىن. ماسەلەن, تارباعاتاي اۋدانىنا تاۋ مەن ارقاردى كومپوزيتسيالاپ, جيناقى لوگوتيپ جاساعان. سونى تارباعاتايدىڭ تۇرعىندارىنا ۇسىنۋدى ءجون كورىپ وتىر. تۇرعىندار عانا ەمەس, سول وڭىرگە ساياحاتتاپ بارعان مەيماندار دا كادەسىي رەتىندە ساتىپ السا بولادى. لوگوتيپتەردى ەربولات راحات ۇلى ەسىمدى جاس مامان جاساپ ءجۇر.
ىشكى ينتەرەرى ويۋمەن ورنەكتەلگەن تسەحتى ارالاي ءجۇرىپ, پەريزات راحاتقىزىنىڭ شىعارماشىلىعى تۋرالى دا سۇراعانبىز. ايتۋىنشا, ديزاينەرلىك ونەر ناعاشىلارىنان دارىعان. بەس بالانى جالعىز ءوزى ءوسىرىپ, جەتكىزگەن ناعاشى اپاسى اۋىل-ايماققا كورپە تىگىپ, قۇراق قۇراپ ساتقان.
– بىزدە ەلىكتەۋ بار. ونىڭ جاقسى-جامانىن كىم ءبىلسىن؟ ايتپاعىم, 90-جىلدارى جاستار رەكەتكە ەلىكتەسە, كەيىن شەنەۋنىك بولۋدى ماقسات قىلدى. قازىرگى جاستار بيزنەستە جەتىستىككە جەتكىسى كەلەدى. سوعان قۋانامىن. جوسپارلارىمىز ويداعىداي جۇزەگە اسىپ جاتسا, جۇمىسشى ماماندىقتارى اراسىندا ءتۇرلى بايقاۋ ۇيىمداستىرساق دەيمىن. ارمانىمىز كوپ. ونىڭ ءبارىن ۋاقىت كورسەتەدى. جالپى, نە ىستەسەك تە ۇلت ءۇشىن دەگەن ۇستانىم بار, – دەيدى پەريزات.
جوبا-جوسپارلارىن اشىپ ايتپادى. دۇرىس تا. «ۇلكەن ءىستى ۇندەمەي تىندىرار بول» دەگەندەي, ىسپەن دالەلدەۋدى ءجون سانايدى. اشىپ ايتقان ءبىر ويى – ەسكى كيىمدەردى قابىلداپ, ونى كادەگە جاراتۋ. بۇعان دەيىن جارامسىز دجينسى كيىمدەردەن ءتۇرلى سومكە تىگىپ, ساتقان. سۇرانىس وتە جوعارى كورىنەدى.
كاسىپورىن سەرىكتەسى اياۋجان ءاشىموۆا تسەحتىڭ ءالى دە كەڭەيە تۇسەتىنىن ايتادى.
– كاسىپتى باستاماس بۇرىن كوزىن تابۋ – جۇمىستىڭ بىتكەنى. ءبىز جوبا جاساپ جاتقاندا-اق تىگىن تسەحىنىڭ بولاشاعى بارىنا كوز جەتكىزدىك. كەيىن قۇجاتتاردى جيناستىرىپ, «دامۋ» قورىنان قولداۋ الدىق. ولار بەرگەن 15 ملن تەڭگەگە قوسىمشا قارجى قوسىپ, عيماراتقا قول جەتكىزدىك. قۇرال-جابدىقتاردى تۇگەندەپ, شيكىزات ماتەريالدارىن الدىق, – دەيدى اياۋجان ءاشىموۆا.
مۇنداعى جۇمىس ىستەپ وتىرعان ەكى تىگىنشى – كۇمىس جاستاعى اق جاۋلىقتى انالار. بىلىكتى دە ءبىلىمدى تىگىنشىلەر كۇندەلىكتى جۇمىسپەن قاتار تاجىريبەدەن وتەتىن ستۋدەنتتەردىڭ دە داعدىسىن شىڭداپ, جول كورسەتىپ جۇرەدى.
وسكەمەن
