سۋرەت: kaz.globalnews.kz
بۇۇ باس اسسامبلەياسىنىڭ 79-سەسسياسى اياسىندا قازاقستان پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ ماروككو كورولدىگىنىڭ سىرتقى ىستەر, افريكالىق ىنتىماقتاستىق جانە شەتەلدەگى ماروككولىقتار جونىندەگى ءمينيسترى ناسەر بۋريتامەن ەكىجاقتى كەزدەسۋ وتكىزدى.
مينيسترلەر ساياسي, ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق سالالارداعى ەكىجاقتى قاتىناستاردىڭ قازىرگى احۋالى مەن كەلەشەگىن تالقىلادى.
كەلىسسوزدەردىڭ قورىتىندىسى بويىنشا قازاقستان جانە ماروككو ازاماتتارى جارامدى ۇلتتىق, جالپىازاماتتىق پاسپورتتاردىڭ نەگىزىندە ەكى ەلدىڭ اۋماعىنا كىرۋ, شىعۋ, ترانزيتپەن ءوتۋ جانە ۋاقىتشا بولۋ ءۇشىن ۆيزالىق تالاپتاردان بوساتىلادى. قۇجاتقا سايكەس, ءاربىر بولۋ مەرزىمى كىرۋ ساتىنەن باستاپ 180 كۇننىڭ ىشىندە 30 كۇنتىزبەلىك كۇننەن اسپاۋعا ءتيىس.
سونىمەن قاتار كەلىسىمدە كوزدەلگەن مەرزىمنەن ۇزاق بولۋدى نەمەسە ەڭبەك قىزمەتىمەن, ءبىلىم الۋ نەمەسە كاسىپكەرلىكپەن اينالىسۋدى جوسپارلاعان تاراپتاردىڭ ازاماتتارى قابىلداۋشى مەملەكەتتىڭ ديپلوماتيالىق وكىلدىكتەرى نەمەسە كونسۋلدىق مەكەمەلەرىنەن ءتيىستى ۆيزا الۋعا مىندەتتى.
كەلىسىم تاراپتاردىڭ قاجەتتى ىشكى مەملەكەتتىك راسىمدەردى اياقتاعانى تۋرالى سوڭعى جازباشا حابارلامانى ديپلوماتيالىق ارنالار ارقىلى العان كۇننەن باستاپ 30 كۇنتىزبەلىك كۇن وتكەن سوڭ كۇشىنە ەنەدى.
