بۇل اقپاراتتى حابارلاعان وبلىستىق جەدەل مەديتسينالىق جاردەم ستانساسىنىڭ ديرەكتورى سەرىك ورىنباساروۆ وڭىردە مەديتسينالىق جاردەم شاقىرتۋلار 5,5%-عا ءوسىپ, ولاردىڭ سانى 229 097 بولعانىن ايتادى.
ادەتتە, ستانساعا سوعىلاتىن قوڭىراۋلار 4 ساناتقا بولىنەدى. ەسىنەن تانۋ, جۇرەك ءريتمىنىڭ بۇزىلۋى, تىنىس الۋ قيىنداۋى, قۇرىسۋ, اۋىر جاراقاتتار, قان كەتۋ جانە ت.ب. جاعدايلار شۇعىل كومەكتى تالاپ ەتەدى. ولارعا «103» بريگادالارى جەدەل اتتانىپ, نورماتيۆ بويىنشا 10 مينۋتتان 30 مينۋتقا دەيىن جەتىپ, كومەك كورسەتەدى.
ورال قالاسىندا جەدەل جاردەم قىزمەتىندەگى ءاربىر بريگادا ءبىر تاۋلىك ىشىندە ورتا ەسەپپەن 16-17 شاقىرتۋ الىپ, جولعا شىعادى ەكەن. ال اۋىلدىق جەردە تاۋلىگىنە 8-9 شاقىرتۋ تۇسەتىن كورىنەدى.
– بىزگە حابارلاساتىن ناۋقاستاردىڭ 26,3%-ى – تىنىس الۋ ورگاندارىنىڭ اقاۋى بار ناۋقاستار بولسا, قان اينالىمى جۇيەسى سىرقاتىنا شالدىققاندار بارلىق شاقىرتۋدىڭ 22,6%-ىن قۇرايدى. سونداي-اق نەۆرولوگيالىق اۋرۋلار – 10,4%, جاراقاتتار مەن جازاتايىم وقيعالار – 7,4%, جۇقپالى دەرتتەر – 5,7%, اسقازان-ىشەك اۋرۋلارى – 4,6%, حيرۋرگيالىق سىرقاتتار – 3,6%, اكۋشەرلىك-گينەكولوگيالىق اۋرۋلار – 3,0%, ءزار شىعارۋ جولدارىنىڭ اۋرۋى – 2,6% بولىپ تۇر, – دەيدى س.ورىنباساروۆ.
وڭىردە جەر-جەرلەردەگىدەي, قاتتى الاڭداتىپ وتىرعان ءبىر ماسەلە – جول-كولىك وقيعالارىنىڭ ءوسۋى. پوليتسيا دەپارتامەنتىنىڭ مالىمەتىنە قاراعاندا, 8 اي ىشىندە 698 جول اپاتى تىركەلگەن. وسىنىڭ سالدارىنان 64 ادام قازا بولىپ, 981 ادام ءتۇرلى دارەجەدەگى جاراقات العان.
«كوپ جاعدايدا كولىك جۇرگىزۋشىلەرى تاراپىنان جول ەرەجەسى ءتارتىبى ساقتالا بەرمەيدى. جۇرگىزۋشىلەر ارنايى كولىككە جول بەرمەيتىن جاعداي جيىلەپ كەتتى», دەيدى جەدەل جاردەم ستانساسىنىڭ باسشىسى.
وسىعان وراي بيىل تامىز ايىندا وڭىرلىك دەنساۋلىق ساقتاۋ باسقارماسى «جەدەل جاردەمگە جول بەر» اتتى ارنايى اكتسيا وتكىزۋگە ءماجبۇر بولعان. اكتسياعا «103» بريگاداسىمەن بىرگە جول-پاترۋلدىك پوليتسياسى, باق وكىلدەرى قاتىستى. رەيد بارىسىندا دىبىستىق جانە جارىق سيگنالدارى قوسىلعان جەدەل مەديتسينالىق جاردەم كولىگىنە جول بەرمەيتىن كولىك جۇرگىزۋشىلەرى انىقتالىپ, جازاعا تارتىلدى.
نەسىن جاسىرايىق, سوڭعى كەزدە مەديتسينا سالاسىنا سىن ايتۋشىلار دا از ەمەس. سونىڭ ءبىرى – مامانداردىڭ بىلىكتىلىگى ماسەلەسى. باتىس قازاقستان وبلىسىندا ءبىراز جىلدان بەرى مەديتسينا كادرلارى جەتىسپەيدى. كادر تاپشىلىعىن جويۋ ءۇشىن جەرگىلىكتى بيلىك كەشەندى شارالاردى قولعا العان. ولار – دارىگەر ماماندارىن دايارلاۋ ءۇشىن وبلىس اكىمىنىڭ گرانتتارىن تاعايىنداۋ, مەديتسينا ماماندارىنا ارنالعان الەۋمەتتىك جەڭىلدىكتەر. سونىمەن بىرگە وڭىردەگى بار مەديتسينا پەرسونالىنىڭ بىلىكتىلىگىن ارتتىرۋ دا ۇنەمى جۇرگىزىلىپ كەلەدى.
مىسالى, جەدەل مەديتسينالىق كومەك كورسەتۋ ساپاسىن ارتتىرۋ ماقساتىندا ستانسا قىزمەتكەرلەرى اراسىندا اۋرۋحاناعا دەيىنگى كەزەڭدە (BLS, ACLS PALS, PHTLS) مەديتسينالىق كومەك كورسەتۋدىڭ حالىقارالىق ستاندارتتارى بويىنشا 2 جىل سايىن وقۋ-تاجىريبە جۇمىسى ۇيىمداستىرىلىپ تۇرادى. سونىمەن قاتار جەدەل جاردەم ستانساسىندا سيمۋلياتسيالىق كابينەت جۇمىس ىستەيدى. وندا مەديتسينا قىزمەتكەرلەرى شۇعىل كومەك كورسەتۋ داعدىلارىن پىسىقتايدى. كابينەت ەرەسەكتەر مەن بالالاردى رەانيماتسيالاۋعا, تراحەيا ينتۋباتسياسىنا, كونيكوتومياعا, كوكتامىر ىشىنە جانە بۇلشىق ەت ىشىنە ەنگىزۋگە ارنالعان مۋلياجدارمەن جابدىقتالعان. بيىل تامىز ايىندا سيمۋلياتسيالىق كابينەت ءۇشىن ناقتى جاعدايلارعا بارىنشا جاقىن وقىتۋعا, مەديتسينالىق پەرسونال ءۇشىن سيتۋاتسيالىق مىندەتتەردى مودەلدەۋگە مۇمكىندىك بەرەتىن مونيتورى بار كوپفۋنكتسيونالدى تولىق ولشەمدى ترەناجەر ساتىپ الىنعان.
اۋىلدىق جەرلەردەگى جەدەل جاردەم بريگادالارىنىڭ كاسىبي دايارلىعىن ارتتىرۋ ماقساتىندا 4 سيمۋلياتسيالىق كابينەت اشۋ جوسپارلانىپ وتىر. سونداي-اق بيىل ورتالىق ستانسا بازاسىندا وقۋ-سيمۋلياتسيالىق ورتالىعى دا اشىلماق. بۇل ورتالىق جەدەل جاردەم قىزمەتكەرلەرىنىڭ جاتتىعۋ الاڭى بولماق.
باتىس قازاقستان وبلىسى
