الماتى قالاسىنىڭ راديوەلەكترونيكا جانە بايلانىس اسكەري-ينجەنەرلىك ينستيتۋتى سەرجانتتار مەن زاپاستاعى وفيتسەرلەردى دايارلاۋ ماقساتىندا اقىلى وقىتۋعا ازاماتتىق جوعارى وقۋ ورىندارىنىڭ ستۋدەنتتەرىن قابىلداۋدى جالعاستىرادى. باعدارلاما بويىنشا اسكەري كافەدراسى جوق جوعارى وقۋ ورىندارىنىڭ ستۋدەنتتەرى وقي الادى. راديوەلەكترونيكا جانە بايلانىس اسكەري-ينجەنەرلىك ينستيتۋتى باستىعىنىڭ ءبىرىنشى ورىنباسارى, پولكوۆنيك ەرجان قابىشەۆ وقىتۋ ءتۇرلى اسكەري پاندەر ارقىلى اۋقىمدى دايىندىقتى قامتيتىنىن ايتادى.
– ستۋدەنتتەر رادياتسيالىق, حيميالىق جانە بيولوگيالىق قورعانىس, اسكەري توپوگرافيا, اتىس جانە ساپتىق دايىندىق, جالپى تاكتيكا سياقتى جالپى اسكەري پاندەردى وقيدى. تاڭداعان ماماندىققا بايلانىستى پاندەر باستى نازارعا الىندى. قابىلداۋ ۇدەرىسى بىرنەشە كەزەڭنەن تۇرادى. ۇمىتكەرلەر مەديتسينالىق كوميسسيادان, پسيحولوگيالىق تەستىلەۋدەن, دەنە شىنىقتىرۋ دەڭگەيىن تەكسەرۋدەن وتەدى. ىرىكتەۋدىڭ سوڭعى كەزەڭى – ستۋدەنتتەردىڭ وقۋ ورىندارىنداعى ۇلگەرىمىنىڭ ورتاشا بالىن كونكۋرستىق تالداۋ. ىرىكتەۋدىڭ بارلىق كەزەڭى باقىلاۋ كوميسسياسىنىڭ قاتاڭ باقىلاۋىندا وتەدى, –دەيدى ە. قابىشەۆ.
ينستيتۋتتا ستۋدەنتتەردىڭ تەوريالىق ءبىلىم الۋىنا تولىقتاي جاعداي جاسالعان. ءدارىس بارىسىندا يننوۆاتسيالىق تەحنولوگيالار قولدانىلىپ, پراكتيكالىق ساباقتار مەن جاۋىنگەرلىك دايارلىققا ايرىقشا ءمان بەرىلەدى. «زاپاستاعى سەرجانتتار», «زاپاستاعى وفيتسەرلەر» باعدارلامالارى ستۋدەنتتەرگە اسكەري ماماندىق الۋعا عانا ەمەس, سونىمەن قاتار وزدەرىنىڭ كاسىبي داعدىلارىن ەداۋىر كەڭەيتۋگە ىقپال ەتەدى. مۇنداي بىلىكتىلىك ولارعا ازاماتتىق جانە اسكەري سالادا جاڭا مۇمكىندىكتەرگە جول اشپاق.
زاپاستاعى سەرجانت اتاعىن العىسى كەلەتىن ستۋدەنتتەرگە وقۋ مەرزىمى – ءبىر جىل, ال ونىڭ قۇنى – 250 مىڭ تەڭگە. زاپاستاعى وفيتسەر بولۋدى جوسپارلاعاندار 500 مىڭ تەڭگە تولەپ ەكى جىل وقۋى كەرەك. وسى باعدارلامالار بويىنشا ەكىنشى رەت ىرىكتەۋ وتكىزىلىپ وتىرعانىن ايتا كەتكەن ءجون. وتكەن وقۋ جىلىندا زاپاستاعى سەرجانتتار باعدارلاماسى نەگىزىندە 62 ادام ءبىلىم الىپ, ولارعا «زاپاستاعى كىشى سەرجانت» اتاعى بەرىلگەن.
اتالعان وقۋ وشاعى – راديوتەحنيكا ماماندىقتارى بويىنشا وفيتسەر-ينجەنەرلەردى دايىندايتىن ورتالىق ازيا اۋماعىنداعى تۇڭعىش ءارى جالعىز جوعارى ءبىلىم ورداسى. جالپى العاندا, راديوەلەكترونيكا جانە بايلانىس اسكەري ينجەنەرلىك ينستيتۋتى زەنيتتى زىمىران, راديوتەحنيكالىق اسكەرلەر, اۆياتسيانى راديوتەحنيكامەن قامتاماسىز ەتەتىن بايلانىس بولىمىنە بىلىكتى وفيتسەرلەردى, سونداي-اق اسكەرلەر مەن قارۋ-جاراقتى باسقارۋدىڭ اۆتوماتتاندىرىلعان جۇيەلەرىنىڭ ينجەنەرلەرىن دايارلايدى. وفيتسەرلەر-راديوينجەنەرلەردى دايارلاۋ 5 ماماندىق نەگىزىندە جۇرگىزىلەدى.
اسكەري جوو زاماناۋي وقۋ-ماتەريالدىق بازامەن قامتاماسىز ەتىلگەن. وقۋ اۋديتوريالارى مەن زەرتحانالارى ءتۇرلى راديوتەحنيكالىق ستەندتەرمەن, كومپيۋتەرلىك جانە لينگوفوندى تەحنيكالارمەن, سيمۋلياتورلارمەن, سونداي-اق جاتتىعۋ كەشەندەرىمەن جابدىقتالعان. كۋرسانتتار تەوريالىق بىلىمدەرىن ينستيتۋتتىڭ وقۋ ورتالىعىندا جەتىلدىرە تۇسەدى. بولاشاق وفيتسەرلەر شىنايى جاۋىنگەرلىك تەحنيكالاردا تاجىريبەدەن ءوتىپ, راديولوكاتسيالىق بەكەتتەر مەن بايلانىس اسكەري تەحنيكالارىنا قىزمەت كورسەتەدى.
قولدا بار مالىمەتتەرگە سۇيەنسەك, قازىرگى تاڭدا ەلىمىزدەگى 40-قا جۋىق جوعارى وقۋ ورنىنىڭ بازاسىندا اسكەري كافەدرا بار. بۇل كافەدرالاردا جىلىنا 8 مىڭنان اسا زاپاستاعى وفيتسەر شىڭدالىپ شىقسا, كەيىنگى 4 جىلدا 30 مىڭنان اسا ستۋدەنت لەيتەنانت شەنىن العان.
الماتى
