جاقىندا وسى اۋىلدا ەكىنشى دۇنيەجۇزىلىك سوعىس كەزىندە ۇشاقپەن 300 رەت اۋەگە كوتەرىلگەن قاھارمان ۇشقىشتىڭ ەسكەرتكىشى ورناتىلدى. قۇرمانعازى اۋدانى اكىمىنىڭ ورىنباسارى امانگەلدى مۇراتوۆتىڭ ايتۋىنشا, وسىعان بايلانىستى ەسكەرتكىش جوباسى وبلىستىق تاريحي-مادەني ەسكەرتكىشتەردى قورعاۋ كوميسسياسىندا قارالعان. ۇزدىك دەپ تانىلعان ەسكەرتكىشتىڭ اۆتورى – مادەنيەت قايراتكەرى, قازاق ۇلتتىق ونەر ۋنيۆەرسيتەتىنىڭ پروفەسسورى, ءمۇسىنشى باقىتبەك مۇحامەدجانوۆ.
«حيۋاز دوسپانوۆا – سوعىس كەزىندە قازاقتىڭ قايسار ۇلت ەكەنىن تانىتقان قاھارمان. سوعىستان كەيىن ەلىمىزدىڭ وركەدەۋىنە ۇلەسىن قوستى. ەكىنشى دۇنيەجۇزىلىك سوعىستا ەرلىگىمەن اتى شىققان باتىردىڭ ەسىمىن ۇرپاق جادىندا قالدىرۋدى كوزدەدىك. بۇل ەسكەرتكىش – قاھارمان رۋحىنا قۇرمەتىمىزدىڭ ءبىر پاراسى. مايدانگەرلەردىڭ ەرلىگىن ۇلىقتاۋعا ارنالعان ءىس-شارالار جالعاسىن تابادى», دەيدى امانگەلدى مۇراتوۆ.
جاڭاتالاپ اۋلىنداعى ارداگەرلەر كەڭەسىنىڭ توراعاسى سەرىك ساپارعاليەۆتىڭ پىكىرىنشە, جاس ۇرپاق بەيبىت كۇنگە جەتكىزگەن مايدانگەرلەردىڭ ەرلىگىن ۇمىتپاۋى قاجەت. قاھارمان ۇشقىشتىڭ تۋىسى ەرجان رىسقاليەۆ وسىنداي ويىن ءبىلدىردى. ءىس-شارا كەزىندە جەرگىلىكتى ونەرپازدار گۇلزادا جۇماليەۆا, جادىرا وقاشەۆا ءان شىرقادى. ال جازيرا سارسەنعاليەۆا «باتىر قىزدىڭ» مونولوگىن وقىدى.
«مۇنداي ەسكەرتكىشتەر جاس بۋىندى وتانشىلدىققا تاربيەلەيدى. سول سەبەپتى تۋىندىدا قازاقتىڭ قايسارلىعىن, رۋحىن كورسەتۋگە تىرىستىم», دەيدى ءمۇسىنشى باقىتبەك مۇحامەدجانوۆ.
اتىراۋ وبلىسى
