فوتو: سۋ رەسۋرستارى جانە يرريگاتسيا مينيسترلىگى
وتىرىس قورىتىندىسى بويىنشا تاراپتار بىرلەسكەن 6 شەشىمگە قول قويعان. اتاپ ايتقاندا, قازاقستاننىڭ 2024-2026 جىلدار ارالىعىندا توراعالىعى كەزىندە حاقق اتقارۋ كوميتەتىنىڭ جۇمىس جوسپارى بەكىتىلىپ, قۇجات 10 ءتۇرلى باعىت بويىنشا 40-قا جۋىق ءىس-شارانى قامتيدى دەپ جوسپارلانعان.
سونداي-اق ەكى ءىرى وڭىرلىك جوبا: ارال تەڭىزى باسسەينى ەلدەرىنە كومەك كورسەتۋ جونىندەگى ءىس-قيمىل باعدارلاماسى مەن ورتالىق ازياداعى ورنىقتى دامۋ ءۇشىن قورشاعان ورتانى قورعاۋ جونىندەگى وڭىرلىك باعدارلامانى ىسكە اسىرۋ ناتيجەلەرى قارالعان.
وتىرىسقا قاتىسۋشىلار حاقق ۇيىمدىق قۇرىلىمى مەن شارتتىق-قۇقىقتىق بازاسىن جەتىلدىرۋ جونىندەگى جۇمىس توبىنىڭ قىزمەتىن جەكە قاراستىرعان. تاراپتار وسى ايدىڭ باسىندا استانادا وتكەن جۇمىس توبىنىڭ 12-ءشى وتىرىسىنىڭ قورىتىندىسىن دا ءسوز ەتتى.
سونىمەن قاتار, دۇنيەجۇزىلىك بانكپەن بىرلەسكەن ورتالىق ازيا ەلدەرىنىڭ گيدرومەتەورولوگيالىق قىزمەتىن جاڭعىرتۋ جوباسىنىڭ قورىتىندىسى شىعارىلعان. بۇدان بولەك, حاقق ەلدەرى قازاقستان مەن فرانتسيا بىرلەسىپ وتكىزەتىن «بىرىڭعاي سۋ» سامميتىنە قاتىساتىندارىن راستادى.
«قازاقستان حاقق-قا ەندى توراعالىق ەتە باستاعانىنا قاراماستان, قازىردىڭ وزىندە ناتيجە كورىنىپ تۇر. جاقىندا استانادا قوردىڭ نورماتيۆتىك-قۇقىقتىق بازاسى مەن ينستيتۋتسيونالدىق قۇرىلىمىن جەتىلدىرۋ جونىندەگى وڭىرلىك جۇمىس توبىنىڭ وتىرىسى ءوتتى. بارلىق ەلدەر جەمىستى جۇمىس جاسادى, حاقق باسقارۋ قۇرىلىمى مەن قۇقىقتىق بازاسىن جەتىلدىرۋ بويىنشا ءوز ۇسىنىستارىن بەردى. بارلىق تاراپتار ءىس–شارانىڭ قورىتىندىسىنا ريزا», دەدى تاجىكستاننىڭ ەنەرگەتيكا جانە سۋ رەسۋرستارى مينيسترلىگىنىڭ سۋ-ەنەرگەتيكالىق ساياسات, عىلىم مەن تەحنيكانى دامىتۋ باس باسقارماسىنىڭ باسشىسى دالەر ابدۋرازوكزودا.
