كومپوزيتور بىردەن مۋزىكاعا كەلگەن جوق, مەكتەپتى بىتىرگەننەن كەيىن 1947 جىلى كينواكتەر تەحنيكۋمىن ءتامامداپ, ودان سوڭ مۋزىكا ۋچيليششەسىنىڭ تاريحي-تەوريالىق ءبولىمىن اياقتاپ, سودان قۇرمانعازى اتىنداعى كونسەرۆاتوريانىڭ كومپوزيتسيا فاكۋلتەتىنە پروفەسسور ەۆگەني برۋسيلوۆسكيدىڭ كلاسىندا وقىپ, تولىق 40 جىلدان استام ءومىرىن مۋزىكا جازۋعا عانا ارنادى. مۋزىكالىق جانردىڭ بار سالاسىندا قالام تەربەگەن كلاسسيكتىڭ 1964–1981 جىلدار ارالىعىندا جازعان «ايسۇلۋ», «جۇمباق قىز», «اقان سەرى – اقتوقتى» وپەرالارى الماتىداعى اباي اتىنداعى وپەرا جانە بالەت تەاترىنىڭ ساحناسىندا قويىلدى.
ۆوكالدىق-سيمفونيالىق شىعارمالارى وداقتىق جانە شەتەل ماماندارىنىڭ تاراپىنان جوعارى باعالاندى. 1960 جىلى قۋاندىق شاڭعىتباەۆتىڭ سوزىنە جازىلعان, 8 بولىمنەن تۇراتىن «عاسىرلار ءۇنى» وراتورياسى – وتىز جىلعا جۋىق ۇلكەن ساحنالاردا ءۇزىلىسسىز ورىندالعان, سوناۋ «اقتابان شۇبىرىندىدان» باستاپ بۇگىنگى كۇنگە دەيىن ۇلت تاريحىن تەرەڭ بايىپتاپ, تىڭداۋشى, كورەرمەنگە رۋح بەرەتىن, پاتريوتتىق سەزىمدى وياتاتىن ۇلكەن مۋزىكالىق تۋىندى. قازاق ۇلت اسپاپتار وركەسترىنە ارنالعان شىعارمالارىنىڭ ىشىندەگى «شاتتىق وتانى» اتتى ەڭبەگى العاش شامعون قاجىعاليەۆ, الدابەرگەن مىرزابەكوۆتەردىڭ ديريجەرلىگىمەن قۇرمانعازى اتىنداعى وركەستردىڭ ورىنداۋىندا 1953 جىلى العاش رەت تىڭدارمانعا جەتىپ, وركەستردىڭ شەتەلدىك گاسترولدەرىندە وتە جوعارى باعالاندى. ول ءالى كۇنگە دەيىن رەسپۋبليكاداعى بارلىق ۇلت اسپاپتار وركەسترلەرىنىڭ رەپەرتۋارلارىنان تۇسكەن ەمەس.
س.مۇحامەدجانوۆتىڭ سكريپكاعا, داۋىسقا, دومبىرا, قوبىزعا ارنالعان كونتسەرتتەرى دە جەتەرلىك. كامەرالىق اسپاپتارعا ارنالعان پەسالارىنىڭ ءوزى وننان اسادى. حورعا ارنالعان اكاپەللا, كانتاتا, پوەما, مارشتارى جانە بار. جيىرماعا جۋىق درامالىق سپەكتاكلگە ارنالىپ جازىلعان مۋزىكالارى رەسپۋبليكا تەاترلارىندا وسى كۇنگە دەيىن ورىندالادى. وننان استام كينوفيلمگە جازىلعان مۋزىكاسىن ەستىگەندە, كومپوزيتوردىڭ وزىنە ءتان قولتاڭباسىن بىردەن تانۋعا بولادى. حالىق اندەرىن وڭدەۋدىڭ حاس شەبەرىنىڭ فورتەپيانو سۇيەمەلدەۋىندە تۇسىرگەن كلاۆيرلەرىن كلاسسيك انشىلەر ءالى كۇنگە ءوز كەرەگىنە جاراتۋدا. دج.بايرون, ت.شەۆچەنكو, ر.بەيرۋس, س.سەيفۋللين, ي.بايزاقوۆ, س.بەگالين, م.حاكىمجانوۆا, ق.امانجولوۆ, م.ماقاتاەۆ, ت.ءابدىراحمانوۆا, ا.شامكەنوۆ, ج.ومىربەكوۆ, ن.بايماعانبەتوۆ, س.ادامبەكوۆ, ا.بەيسەنوۆ, ە.اۋكەباەۆ, ج.تۇربەكوۆا سياقتى اقىنداردىڭ سوزىنە جازىلعان ءان-رومانس دۋەتتەرى ەكى جۇزگە جۋىق. ال اباي مەن قۋاندىق شاڭعىتباەۆتىڭ سوزدەرىنە جازىلعان ۆوكالدىق تسيكلدەرى – باعاسى جوق دۇنيەلەر. مىسالى, «جارق ەتپەس قارا كوڭىلىم نە قىلسا دا», «وزگەگە كوڭىلiم تويارسىڭ» اتتى تۋىندىسى, رومانس جانرىندا جازىلعان شىعارمالارى – ليريكا مەن سۇلۋ اۋەننىڭ ءبىر-بىرىنە ەرەكشە ۇيلەسكەن شوقتىعى بيىك تۋىندى. قۋاندىق اقىننىڭ سوزدەرىنە جازىلعان تسيكلدەرىندەگى «تەربەلەدى تىڭ دالا», «جارقىرايدى تەمىرتاۋدىڭ وتتارى», «ەسىمدە», «ايتەۋىر, سول قىز – ءبىر سۇلۋ», «ۋا, جەڭگەلەر» اتتى اندەرى مەن دۋەتتەرى ءالى كۇنگە دەيىن ەل اۋزىندا.
س.مۇحامەدجانوۆ مۋزىكاسىنىڭ ەرەكشەلىگى ۇلتتىق نەگىزدەن ءنار العان ءيىرىم ناقىشتارى, اۋەزدىك ۇندىلىگى, كاسىبي انشىلەردىڭ داۋىسىنا وتە ىڭعايلى مەلودياسى تەز كوڭىلگە قونىپ, ەستە ساقتالاتىنىنان بولۋى كەرەك. ول كىسىنى ونەر الەمى «قازاقتىڭ ءپۋچچينيى» دەپ اتايدى. سوندىقتان بولار, مۋزىكالىق كوللەدجدەر, كونسەرۆاتوريا مەن ونەر ۋنيۆەرسيتەتتەرىنىڭ وقۋ باعدارلامالارىنا ونىڭ اريا, ءان, رومانس, دۋەتتەرى ەنگىزىلگەن.
مەنىڭ ونەر جولىمدا سىدىق مۇحامەدجانوۆ ەرەكشە ورىن الادى جانە ونىڭ ۇلى تۇلعاسى ماڭگى ەسىمدە قالادى. 1981جىلى ريمسكي-كورساكوۆ اتىنداعى لەنينگراد كونسەرۆاتورياسىن ءبىتىرىپ كەلىپ, الماتىداعى اباي اتىنداعى وپەرا جانە بالەت تەاترىنا ورنالاستىم. ول كەزدە تەاتردىڭ كوركەمدىك كەڭەس مۇشەلەرى: تەاتر ديرەكتورى ت.وزبەكوۆ, باس ديريجەرى ۆ.رۋتتەر, باس رەجيسسەرى ب.ريابيكين, باس حورمەيستەرى ب.جامانباەۆ, باس بالەتمەيستەرى ز.رايباەۆ, باس سۋرەتشى گ.يسمايلوۆا, پارتيا ۇيىمىنىڭ حاتشىسى ۆ.ياكوۆەنكو, كاسىپوداق توراعاسى ك.بەيساليەۆ, كسرو حالىق ارتىستەرى ە.سەركەباەۆ, ر.جامانوۆا, ر.باپوۆ, ب.تولەگەنوۆا, ر.ابدۋلين, مادەنيەت ءمينيسترىنىڭ ورىنباسارى ق.ساۋداباەۆتاردىڭ الدىندا تۇرعىت وسمانوۆتىڭ ديريجەرلىك ەتۋىمەن وپەرالاردان بىرنەشە اريانى سيمفونيالىق وركەستردىڭ سۇيەمەلدەۋىندە ورىنداپ بەردىم. كوركەمدىك كەڭەستىڭ قىزۋ تالقىسى مەن شەشىمىنەن كەيىن, باقىتىما وراي, وپەرا ترۋپپاسىنا قابىلداندىم. سول جىلى تەاتردىڭ جاڭا ماۋسىمىنا كومپوزيتور س.مۇحامەدجانوۆتىڭ ع.مۇسىرەپوۆ ليبرەتتوسىنا جازىلىپ بىتكەن «اقان سەرى – اقتوقتى» وپەراسى قويىلاتىن بولىپ, كوركەمدىك كەڭەستىڭ شەشىمىمەن اقان پارتياسىن ورىنداۋ ءۇش تەنورعا – ن.قاراجىگىتوۆكە, س.بايسۇلتانوۆقا جانە ماعان جۇكتەلدى. سودان قىزۋ دايىندىق باستالدى دا كەتتى. اۋەلى ءبىر ايدان استام ۋاقىت ءاربىر پارتيانىڭ مەلودياسىمەن بىرگە سوزدەرىن جاتتاۋ, كلاۆيرمەن تۇگەلدەي تانىسۋ, ءبىر ايداي فورتەپيانونىڭ سۇيەمەلدەۋىمەن ءاربىر پارتيانى ورىنداۋىمەن سپەكتاكل ديريجەرى ءان, رومانس, اريا, انسامبلدەرىن قابىلداپ ءارى قاراي بارلىق ورىنداۋشىنىڭ باسىن قوسىپ (سپەۆكا)جاتقا ايتقىزىپ قابىلداعاننان كەيىن وركەسترىمەن بىرگە قوسىلىپ ايتۋ باستالادى. ءبارىن پىسىقتاپ العان سوڭ, رەجيسسەر ساحنادا ءاربىر ورىنداۋشىنىڭ وبرازدارىمەن جەكە-جەكە جۇمىس جۇرگىزىپ, ءار اكتىنىڭ ميزانستسەنالارىن كورسەتەدى. سپەكتاكلدە ءاربىر بەينەنى سومدايتىن انشىلەر قۇرامى 3-4 ادامنان تۇرادى. كۇندە دايىندىق: ءوزىڭدى-ءوزىڭ باپتاپ, بار كۇش-جىگەرىڭدى ساقتاپ, كاسىبي انشىلەردىڭ تاماق اۋرۋى سانالاتىن تراحەيت, فارينگيت, لارينگيتپەن اۋىرىپ قالماۋعا تىرىساسىڭ جانە ءبىر-ءبىرىمىزدى سىرتتاي بايقاپ, باقىلاپ, ءوزارا كەمشىلىكتەرىمىزدى بايقاپ, تولىقتىرىپ وتىرامىز. ورىنداۋشىلىق ءوزارا باسەكەلەستىك دەگەن وسى. ءبىرىنشى تۇساۋكەسەر پرەمەرانى كىم ايتادى – سول ۇزدىك. سپەكتاكلدىڭ ديريجەرى ۆالەري رۋتتەر, رەجيسسەرى بايتەن وماروۆ, حورمەيستەرى بازارعالي جامانباەۆ, سۋرەتشىسى گۇلفايرۋز يسمايلوۆا, وپەرا اۆتورى سىدىق مۇحامەدجانوۆتاردىڭ تالابى قاتال, سىن-ەسكەرتپەلەرىن ءمۇلت جىبەرمەۋمىز كەرەك. سونىمەن, التى اي بويى دايىندالعان شىعارمانى كوستيۋم, گريم, دەكوراتسيا پارتيالاردى ورىنداۋشى ءۇش قۇرامدى انشىلەردى بارلىق بولمىسىمەن كوركەمدىك كەڭەس مۇشەلەرى ءبىر تىڭداپ, مادەنيەت ءمينيسترى جەكسەمبەك ەركىمبەكوۆ ءبىر تىڭداپ, 1981 جىلدىڭ تامىزىندا باستالعان سپەكتاكلگە دايارلىق 1982 جىلدىڭ 23 قاڭتارىندا مارەسىنە جەتىپ, كورسەتۋگە جارنامالار ءىلىندى. ءبىرىنشى پرەمەراسىن اقان سەرىنى – مەن, اقتوقتىنى – حورلان حاليلامبەكوۆا, جالمۇقاندى – عافيز ەسىموۆ, حازىرەتتى – قىرعىزستان وپەرا تەاترىنىڭ ءانشىسى قۋانىچبەك قۇلماتوۆ, مىلقاۋدى – «قازاقفيلم» اكتەرى ديماش احيموۆ, سەردالىنى – كەڭەس بەيساليەۆ, قوڭقايدى امانجول جانباتىروۆ ايتاتىن بولىپ شەشىلدى. سپەكتاكلدىڭ العاش قويىلىمىنا عابيت مۇسىرەپوۆ باستاعان جازۋشىلار وداعى, ەركەعالي راحماديەۆ باستاعان كومپوزيتورلار وداعى, بۇكىل الماتىنىڭ زيالىلارى تۇگەل جينالدى. قويىلىم ويداعىداي ءوتىپ, باق-تا جاقسى باعا بەرىلدى. تەاتر تابالدىرىعىن اتتاي سالا مەنىڭ تىرناقالدى باس پارتيا ورىنداعانىما دا جىلى پىكىرلەر ايتىلدى.
سودان جارتى جىل وتكەندە سىدىق اعامىزدىڭ سۇراۋى بويىنشا سوفى سماتاەۆتىڭ ليبرەتتوسىنا جازىلعان «جۇمباق قىز» وپەراسىنداعى اداقتىڭ پارتياسىن ورىندادىم. وپەرا جانە بالەت تەاترىندا ىستەگەن 1981–1996 جىل ارالىعىندا 30-دان استام ورىس, قازاق, ەۋروپا وپەرالارىنىڭ باس پارتيالارىن ايتىپ, تەاتردىڭ بۇكىل رەپەرتۋارىنا ەندىم. ءالى ەسىمدە, 1984 جىلى كومپوزيتوردىڭ 60 جىلدىق مەرەيتويىن وتكىزەتىن بولىپ ءبىر توپ ونەر ادامى جەزقازعان وبلىسىن ارالادىق. سىدىق اعامىزدىڭ شاشباۋىن كوتەرىپ كومپوزيتورلار وداگىنىڭ حاتشىسى تىلەس قاجىعاليەۆ باستاعان انشىلەر: حافيز ەسىموۆ, الما وسپانوۆا, ليۋتسيا تولەشوۆا, زەينەپ قويشىباەۆا, فورتەپيانودا سۇيەمەلدەۋشi كونتسەرتمەيستەر ريمما كۋزمينا – ءبارىمىزدى جەزقازعان اەروپورتىنان وبلىستىق اتقارۋ كوميتەتىنىڭ توراعاسى حامزا جۇمابەكوۆ, وبلىس تەلەراديوسىنىڭ توراعاسى ءسابيت بايدالى جانە ءبىر توپ ادام گۇل شوقتارىمەن قارسى الدى. مۇنان سوڭ باراتىن جەرىمىزگە ءتورت اق «ۆولگامەن» اتتاندىق. ءار ەلدى مەكەندە وتكەن كەزدەسۋ-كونتسەرتتەردە مەرەيتوي يەسىنىڭ وپەرالارىنان ءۇزىندى, ءان, رومانستارىن ورىندايمىز. تىلەس قاجىعاليەۆ بايانداما جاسايدى. كومپوزيتورمەن جۇزدەسۋگە, مۋزىكالىق شىعارمالارىن تىڭداۋعا كەلگەن حالىق زالعا سىيماي كەتەدى. جەزقازعان جەرىن ارالاپ كەلە جاتقاندا سار دالادا جوڭكىگەن مىڭداعان جەزكيىكتى كورىپ, تاڭعالعانىمىز ەسىمىزدە.
سول ەلدە وتكەن مەرەيتوي ساپارىنان شابىت الىپ, رۋحتانىپ قايتقان كومپوزيتور وسى جىلى ءوزىنىڭ 4-سيمفونياسىن, قازاق ۇلت اسپاپتار وركەسترىمەن ورىندالاتىن دومبىرا جانە قوبىزعا ارنالعان كونتسەرتتەرىن, فورتەپيانوعا ارنالعان كونتسەرتتىك ۆالستەرىن جازىپ تاستادى. «قوزى كورپەش – بايان سۇلۋ» وپەراسى 2 ءبولىمدى 4 كارتينادان تۇراتىن كلاۆيرىن اياقتادىم, ەندى ويدى ءپىسىرىپ, پاتيتۋراسىنا كىرىسەمىن, قوزىنىڭ پارتياسىن سەن ورىندايسىڭ», دەپ ماعان ەسكەرتىپ تە قويعان ەدى. ءار نارسەنىڭ سەبەبى بار. ە.برۋسيلوۆسكي, ا.جۇبانوۆ, ل.حاميدي, م.تولەباەۆ, پ.اراۆين سىندى اعا بۋىن كومپوزيتورلار اراسىنداعى شىعارماشىلىق باسەكەلەستىك پەن كەيدە كۇردەلى قاتىناستارى ودان كەيىنگى ە.راحماديەۆ, س.مۇحامەدجانوۆ, ع.جۇبانوۆا, ن.تلەنديەۆ, ق.قوجامياروۆ تولقىنىنا اسەر ەتكەنى بەلگىلى. بىراق سول باسەكەلەستىك اتالعان كومپوزيتورلاردىڭ ءبىر-بىرىنەن قالىسپاي, ءوزىن-ءوزى قامشىلاپ, نەبىر قوماقتى مۋزىكالىق تۋىندىلار جازۋىنا ىقپال ەتتى. بۇگىندە ارتىندا قالعان ولاردىڭ مول مۇراسى تەاتر, وركەستر, جەكە ورىنداۋشى ونەر يەلەرىنە ءالى كۇنگە دەيىن ازىق. وكىنىشكە قاراي, بۇگىنگى كومپوزيتورلار اراسىندا شىنايى شىعارماشىلىق باسەكەلەستىك مۇلدەم جوق...
كسرو حالىق ءارتىسى اتاعىن ءوز ارىپتەستەرىنىڭ سوڭىنان العاندىعى اسەر ەتتى مە, س.مۇحامەدجانوۆ ءومىرىنىڭ سوڭعى كەزىندە مىنەزى توماعا-تۇيىق بولىپ, دەنساۋلىعى ناشارلاپ, دىمكاستانا بەردى. بىردە ماعان «جۇمباق قىز» وپەراسىنداعى ابىلاي بەينەسى ءۇشىن مەنى «ۇلتشىل» دەپ ايىپتاپ, سەرگەلدەڭگە سالدى, اقىرىندا ينفاركت الدىم...» دەدى. وسىنى ايتقاندا ونەر تۇلعاسىنىڭ جۇزىنەن مۇڭ كورگەن ەدىم... سىدىق اعامىزدىڭ شىعارماسىندا ابىلاي اڭسايتىن ەلىمىز تاۋەلسىزدىك الاتىن 1991 جىلدىڭ 3 اقپانىندا دۇنيەدەن وزدى.
1994 جىلى كومپوزيتوردىڭ 70 جىلدىق مەرەيتويى قازاقستان ۇلتتىق عىلىم اكادەمياسى «عالىمدار ۇيىندە» سول مادەني وردانىڭ ەلشىل باسشىسى عاينيكەن بيباتىروۆانىڭ باستاماسىمەن وتكەنىن حالىق جاقسى بىلەدى. ول مادەني-تانىمدىق كەش «سازىڭ كەتپەس قۇلاقتان» دەپ اتالىپ, ونى جۇرگىزۋ ماعان بۇيىرعان ەدى. كەشتىڭ العى ءسوزىن اتاقتى «ەلىم-اي» رومانىنىڭ اۆتورى, «جۇمباق قىز» وپەراسىنىڭ ليبرەتتوسىن جازعان, حان اتىن اتاۋعا بولمايتىن زاماندا سپەكتاكلگە ابىلاي بەينەسىن ەنگىزگەن, حالىق باسىندە باتىل دا بيىك جازۋشى, اقىن سوفى سماتاەۆ ايتتى. سول شاراعا جەزقازعاننان ارنايى كەلگەن سىدىق اعامىزدىڭ 93 جاستاعى اكەسى مۇحامەدجان اقساقال كونتسەرتتىڭ سوڭىندا ءسوز الىپ: «اينالايىندار, سىدىعىم ولگەن جوق, قازاق حالقى امان بولسا, ول دا ماڭگى جاساي بەرەدى» دەپ, جيىنعا كەلگەن جۇرتتىڭ كوڭىلىن بوساتقان ەدى. سودان بەرى قانشا جىل ءوتتى, كومپوزيتوردىڭ ارتىندا قالعان وشپەس مۋزىكالىق مۇراسى ءالى دە ورىندالىپ كەلەدى, ورىندالا دا بەرمەك.
2013 جىلدىڭ ناۋرىزىندا ەۋرازيا ۇلتتىق ۋنيۆەرسيتەتى «كاۋسار» مادەني-تانىمدىق بىرلەستىگىنىڭ باستاماسىمەن وتكەن كەزدەسۋىندە قوعام قايراتكەرى, ەڭبەك ەرى, مارقۇم ەركەعالي راحماديەۆ: «سىدىقتىڭ مەرەيتويلارى اتالىپ وتكەن جوق, نە ءبىر كوشەگە, نە ءبىر ونەر عيماراتىنا ەسىمى بەرىلگەن جوق, كەشە عانا ونىڭ مۋزىكاسىن, ءان رومانستارىن ايتىپ ءجۇر ەمەس پە ەدىڭدەر, كوزى جۇمىلعاننان كەيىن ونى ۇمىتقاندارىڭ با؟» دەپ ءبىراز باسشىنىڭ ەسىگىن توزدىردىم. ءبىزدىڭ تۇلعانى باعالاۋىمىز ءالى دانا اباي بەرگەن سيپاتتان اسپاي تۇر عوي», دەپ وكىنىشتى ءسوزىن جەتكىزگەن ەدى. ەراعاڭ ايتىپ كەتكەن امانات ءالى دە ارمان بولىپ تۇرعانىن نەگە جاسىرامىز؟ ەلىمىزدىڭ باعا جەتپەس رۋحاني قورىنا ەنگەن سىدىق مۇحامەدجانوۆتىڭ شىعارمالارى – تۇنىپ تۇرعان ءمولدىر بۇلاقتاي, ۇلتتىق ناقىشى قانىق كلاسسيكالىق دۇنيەلەر. كەڭەس يمپەرياسى قۇلاپ, مەملەكەتىمىز تاۋەلسىزدىك العان كەزەڭدە ءداستۇردى ارقالاعان حالقىمىز سىدىقتاي كومپوزيتورلارىن ىزدەدى. بىراق رۋحاني كەڭىستىكتىڭ بوستىعىنان, ەلدىگىمىزدى قور ەتۋدى قالاعان ءتۇرلى اعىمنىڭ بەلسەندىلىگىنەن وتاندىق مۋزىكا الەمىن ينكۋباتوردان شىققانداي ءبىر-بىرىنەن اۋمايتىن, بۇگىن ايتسا, ەرتەڭ ەسكە تۇسپەيتىن جىلاۋىق اندەر مەن ىڭىرسىق انشىلەردىڭ افرو-امەريكالىق, انگلو-ساكسوندىق ەستراداسى جاۋلاپ الدى. وسىنى كەرەمەت كورگەن, بۇعان كوزسىز ەلىكتەپ وسكەن جاستاردىڭ ساناسى ۋلانىپ, تالعامى بۇزىلىپ بارا جاتقان ءۇردىستى قازىرگى الاپات دەرت «ەبولامەن» سالىستىرۋعا بولادى. ەلدى ۇيلەسىمدىلىك پەن سۇلۋلىققا, تازالىق پەن شىنايىلىققا باۋراعان سىدىق مۇحامەدجانوۆتاي تۇلعالاردىڭ مۇراسى بۇگىنگى جاساندى «جۇلدىزداردىڭ» كوز قارىقتىرار جارىعىنىڭ استىندا, كولەڭكەسىندە قالۋى ۇلت مۋزىكاسىنا, شىن ونەر يەلەرىنە جانى اشيتىن ادامداردى بەيجاي قالدىرماۋى كەرەك.
قازىر قالادا قاپتاعان ماشينانىڭ شاڭ-توزاڭىنا ۋلانعان مىنا زاماندا ەفير مەن ساحنانى جاۋلاپ العان جاساندى انشىلەردەن حالىق ىعىر بولدى. شارشادى. مۇنى قالاي قويدىرامىز؟ جەر باۋىرلاپ كەتكەن ءان الەمىنىڭ بەدەلىن قالاي كوتەرەمىز؟ وسى سۇراقتار ونەر ادامدارىنا دا, جالپى حالىققا دا قويىلىپ تۇرعانداي. 2022 جىلى «حابار» اگەنتتىگىنىڭ سول كەزدەگى توراعاسى بەرىك ۋاليگە بارىپ, كابينەتىندە «تەربەلەدى تىڭ دالا», «ايتەۋىر, سول قىز – ءبىر سۇلۋ», «قىرمانعا كەل, قالقاتاي» اندەرىن ىڭىلداپ ايتىپ, «بۇل كىمنىڭ ءانى؟» دەپ سۇرادىم. ول ج ۇلىپ العانداي: «ارينە, سىدىق مۇحامەدجانوۆ», دەدى. «ولاي بولسا, باۋىرىم, سىدىق مۇحامەدجانوۆتىڭ وسى كۇنگە دەيىن مەرەيتويلارى اتالماي كەلەدى. ەندى ەكى جىلدان كەيىن ءجۇز جىلدىعى بولادى. سوعان وراي, كومپوزيتوردىڭ «سازىڭ كەتپەس قۇلاقتان» اتتى جەكە-ءدارىس كونتسەرتىمدى تۇسىرۋگە اتسالىسۋىڭدى سۇرايمىن», دەدىم. بەرىك ءۋالي سوزىندە تۇرىپ, ۇلتتىق كىتاپحانانىڭ اق ءرويالى بار بولمەسىندە, پيانيست-كونتسەرتمەيستەر ليۋبوۆ گلينكانىڭ سۇيەمەلدەۋىندە تۇسىرىلگەن ءدارىس-كونتسەرتتى «ەلارنا» ارناسىندا كورسەتتى.
بىلتىر قاراعاندى وبلىسىنىڭ اكىمى ەرماعامبەت بولەكباەۆتىڭ قابىلداۋىندا بولدىم. وسى وبلىستىڭ شەت اۋدانىنىڭ تۋماسى سىدىق مۇحامەدجانوۆتىڭ 100 جىلدىعىن وزدەرىڭىز باستاپ بەرسەڭىزدەر, ارۋاعى ريزا بولار ەدى. اكىم سول جەردە وبلىس اكىمىنىڭ ورىنباسارى ەرلان قۇسايىنوۆ, مادەنيەت باسشىسى ەركەبۇلان جۇمەكەنوۆكە كومپوزيتوردىڭ مەرەيتويىن وتكىزۋدى كەلەسى جىلدىڭ جوسپارىنا ەنگىزۋگە تاپسىرما بەردى. كومپوزيتوردىڭ كوزىن كورگەن ءۇش وپەرا, وراتوريا ءان-رومانستارىنان ءۇزىندى ۆيدەولاردى وسى جىلدىڭ باسىنان ءوزىمنىڭ Facebook پاراقشامدا جاريالاپ كەلەمىن. وسىنى بايقاعان «اباي» تەلەارناسىنىڭ «ۇمىتپايمىز» باعدارلاماسىنىڭ اۆتورى جانە جۇرگىزۋشىسى جاڭىلحان اسىلبەكقىزى مەنى ارنايى الماتىعا شاقىرىپ, سۇحبات الدى. وندا ءبىراز ماسەلەنى ايتىپ, وي بولىستىك.
ۇلى كومپوزيتوردىڭ مەرەيتويى ەلىمىز بويىنشا كەڭ كولەمدە اتالىپ ءوتىلىپ, ونىڭ مۋزىكالىق شىعارمالارى ورىندالىپ, ناسيحاتتالادى دەپ سەنەمىز. بۇل رەتتە سىدىق مۇحامەدجانوۆ تۇلعاسى جانە ونەرى اسىق پەن جاسىقتى تانۋعا ولشەم بولا الار ەدى دەپ ويلايمىز.
كەنجەعالي مىرجىقباي,
مەملەكەتتىك سىيلىقتىڭ لاۋرەاتى, پروفەسسور
