«بۋراباي» پاركىندەگى قۇبىلمالى پەتسيتسا (Peziza varia), كۇزگى جەلى (Gyromitra infula), اق ساڭىراۋقۇلاق (Hygrocybe conica), راماريا (Ramaria eumorpha), ويىق ساڭىراۋقۇلاق (craterellus cornucopioides), قوزىقۇيرىق (lepiota magnispora), اعاشقۇلاق (phaeolus Schweinitzii) سىندى ساڭىراۋقۇلاق تۇرلەرى الەمنىڭ بىرنەشە ەلىندە قىزىل كىتاپقا ەنگەن. عالىمداردىڭ تاعى ءبىر ولجاسى – تورلى ساڭىراۋقۇلاق (Clavariadelphus sp.). بۇل سيرەك كەزدەسەتىن وسىمدىكتىڭ ۇستىڭگى قاباتى جىڭىشكە تاياقشا تارىزدەس بولسا, ءتۇسى ادەتتە اشىق-سارى نەمەسە سارعىلت, كەيدە ءتىپتى, قىزىل بولادى ەكەن. باستى ەرەكشەلىگى – 3-5 جىلدا ءبىر-اق مارتە ءوسىپ شىعاتىنىندا. ۇلتتىق تابيعي پاركتىڭ اقپارات جانە ەكولوگيالىق مونيتورينگ ءبولىمىنىڭ اعا عىلىمي قىزمەتكەرى, اۋىل شارۋاشىلىعى عىلىمدارىنىڭ كانديداتى ەۆگەني ارحيپوۆ ساڭىراۋقۇلاقتاردى زەرتتەپ, زەردەلەۋگە كوبىرەك كوڭىل بولەتىنىن ايتتى.
«تورلى ساڭىراۋقۇلاقتىڭ تابىلعانى بىزگە ۇلكەن ولجا بولدى. ەندى قازاقستاننىڭ قىزىل كىتابىنا ەنگىزىلۋى مۇمكىن. بۇل جاڭالىق ۇلتتىق ساياباقتىڭ وسىمدىك الەمىنىڭ الۋاندىعىن كورسەتەدى. سونىڭ ىشىندە ساڭىراۋقۇلاقتار توبىن ودان ءارى زەرتتەپ, قورعاۋ قاجەت ەكەنىنە تاعى كوز جەتكىزىپ وتىرمىز. «بۋراباي» مۇتپ اقپارات جانە ەكولوگيالىق مونيتورينگ ءبولىمىنىڭ عىلىمي قىزمەتكەرلەرى العاش رەت ۇلتتىق پارك اۋماعىندا وسەتىن ساڭىراۋقۇلاقتاردىڭ بارلىق تۇرلەرىن قامتيتىن ميكولوگيالىق ءتىزىم جاسايدى. بۇل – ەكوجۇيەنى تەرەڭ زەرتتەۋدە جانە ايماقتىڭ بيولوگيالىق الۋاندىعىن قورعاۋدى قامتاماسىز ەتۋدە ماڭىزدى قادام بولادى. ميكولوگيا (ساڭىراۋقۇلاقتار تۋرالى عىلىم) ەكوجۇيەدەگى ۇدەرىستەردى تۇسىنۋدە ەرەكشە ماڭىزعا يە, سەبەبى ساڭىراۋقۇلاقتار ورگانيكالىق زاتتاردىڭ ىدىراۋى مەن توپىراقتىڭ قۇنارىن ساقتاۋدا ۇلكەن ءرول اتقارادى», دەدى ە.ارحيپوۆ.
«بۋراباي» مەملەكەتتىك ۇلتتىق تابيعي پارك قىزمەتكەرلەرى ۇلتتىق پاركتىڭ ميكولوگيالىق ءتىزىمىن جاساۋدى قولعا العان. تىزىمگە ساياباق اۋماعىندا وسەتىن ساڭىراۋقۇلاقتاردىڭ بارلىق ءتۇرى قوسىلۋعا ءتيىس. مامانداردىڭ ايتۋىنشا, ساياباق اۋماعىندا جۇرگىزىلگەن زەرتتەۋلەر ەكوجۇيە تۋرالى جينالعان دەرەكتەردى مولايتىپ قانا قويماي, تابيعاتتى قورعاۋدىڭ ءتيىمدى ءىس-شارالارىن قولعا الۋعا ىقپال ەتەدى. مىسالى, «بۋراباي» مۇتپ بوتانيگى يۋليا بوسسەرت ساڭىراۋقۇلاقتار قورەكتىك زاتتار اينالىمىنا جانە اعاشتاردىڭ ساۋلىعىنا ەرەكشە اسەر ەتەتىنىن ايتادى. دەمەك, ونى زەرتتەۋگە دەن قويۋ ۇلتتىق پاركتىڭ تابيعاتىن قورعاۋ ءۇشىن دە ماڭىزدى.
