قالادان شىعاردا ۇگىتشىگە «25-30 تىڭداۋشى بولادى, مىقتاپ دايارلان» دەپ تاپسىرىلعان. ال اۋىل تىڭداۋشىسىنىڭ ءتۇرى مىناۋ – ەكى-اق ادام. مال-جان اماندىعىن, وراق ءتۇسىمىن, ت.ب. ونى-مۇنى سۇراپ, 5-10 مينۋتىن وتكىزەدى. ءدارىس وقىماسا, بۇعان سىن. ونىڭ ۇستىنە «لەنكومناتاداعى» سامساعان پوليتبيۋرو مۇشەلەرىنىڭ بەينەسى ۇگىتشىنى كوزىمەن اتىپ تۇر. «قوي, دەگەنمەن جۇرتتان دا رۇقسات سۇراپ الايىن» دەپ, ء«دارىستى باستايمىز با, قالاي ويلايسىزدار؟» دەيدى. ساۋىنشى ماۋجىراپ وتىر. جىلقىشى قوزعالاقتاپ قويىپ, ءبۇي دەيدى: ء«بىز قاراپايىم عانا مالشى ادامبىز. ءدارىستى وقى-وقىما دەپ ايتۋعا پىراۋامىز جوق. مىسالى, مەن ۇجىمشاردىڭ اتقوراسىنا باردىم دەيىن. بار جىلقى تاڭنان تىپىرشىپ, دالاعا جايىلىپ كەتكەن. اقساق-توقساق شىعار, ءبىر-ەكەۋى قالىپتى دەيىك. مەن ەندى سول ەكەۋىنىڭ الدىنا ءشوپ سالام با, سالمايمىن با؟ ارينە, سالامىن. ايتپەسە مەن نەگە جىلقىشىمىن؟..».
ءدارىسشى ىشتەي ء«اي, مىناۋ تۇيسىگى بار ادام عوي. ءدارىسىمدى تەزدەتىپ باستاماسام بولماس» دەپ, «جۇرتشىلىققا» ءبىر قاراپ قويىپ: ء«يا, لەكتسيامىزعا كىرىسەمىز. تاقىرىپ – «پارتيا سەزىنىڭ اۋىل شارۋاشىلىعىن دامىتۋ تۋرالى شەشىمدەرى» دەيدى دە, جازىپ العانىن سۋدىراتا وقي جونەلەدى.
بۇل شاقتا قورىلى ەستىلمەيدى دەمەسەڭىز, ساۋىنشى قالىڭ ۇيقىعا كەتكەن. ورامالىن ماڭدايىنا ءتۇسىرىپ, باسىن قابىرعاعا سۇيەپ العان.
ءدارىسشى «جۇرتىنا» ءبىر, قاعازىنا ءبىر شۇقشيىپ, ۇزاق-سونار دايەكسوز بەن بىتپەيتىن تسيفرلاردى تۇيدەك-تۇيدەك جىبەرىپ جاتىر. ەندى جىلقىشىنا ۇيقى قىسىپ, كۇلاپاراسىن كولەگەيلەپ, تىڭداعان كەيىپتە ماۋجىراي تۇسكەن.
قالادان كەلگەن لەكتور سوندا دا قويار ەمەس, وگىزاياڭ ءدارىسىن ساعات جارىمعا دەيىن سوزادى. سوڭىن «جاساسىن لەونيد يليچ! جاساسىن ساياسي بيۋرو! جاساسىن كومپارتيا!» دەپ اياقتايدى.
ۇلكەن تىرلىك تىندىرعانداي كوڭىلى كوتەرىڭكى. گرافيندەگى سۋدى ستاقانعا قۇيىپ, ءۇستى-ۇستىنە سىمىرەدى. ءدارىس تارتىبىنە سايكەس, «جۇرتپەن» بايلانىستى ۇزبەۋ كەرەك. كۇلاپاراسىن يىعىنا قاراي لاقتىرعان اتبەگىگە كوز تاستاپ: «جولداستار, ءدارىسىم سىزدەرگە ۇنادى ما؟» دەپ سۇرايدى.
جىلقىشى دا قۋشىكەش ەكەن, تاماعىن كەنەپ قويىپ: ء«سىز اعىل-تەگىل ءسوزىڭىزدىڭ باسىندا ءدارىستى وقۋ-وقىماۋ تۋرالى سۇرادىڭىز دا, ءوزىڭىز شەشىم شىعاردىڭىز. مەن جىلقى تۋرالى ايتتىم. ءدارىسىڭىز جونىندە دە سول جانۋارعا قاتىستى جاۋاپ بەرەيىن. سونىمەن مەن اتقورادا قالىپ قويعان ءبىر-ەكى اتقا قانشا جانىم اشىسا دا, بارلىق جىلقىعا دەگەن ءشوپتى بەرمەيمىن عوي. تيەسىلى ءبىر باۋىن سالامىن دا, وزگەسىن باسقالارىنا قالدىرامىن. ءسىز ءبىزدىڭ كاسىپكە اۋىسساڭىز, ءشوپتى ايامايتىن كەڭقولتىق, استا-توك جىلقىشى بولادى ەكەنسىز!..» دەيدى.
ايتۋعان دوسبي
