ENACTUS World Cup – كاسىپكەرلىك قىزمەت ارقىلى الەۋمەتتىك باستامالار مەن پروگرەستى كورسەتۋگە مۇمكىندىك بەرەتىن ءىس-شارا. ول 2001 جىلدان بەرى وتكىزىلىپ كەلەدى. ەلىمىزدىڭ الەمدىك كۋبوكتى وتكىزۋ قۇقىعىنا يە بولۋى – بۇل ENACTUS-تىڭ قازاقستاننىڭ سوڭعى 15 جىلداعى جەتىستىكتەرىن مويىندايتىنىن جانە حالىقارالىق ارىپتەستەر تاراپىنان سەنىم ارتىلىپ وتىرعانىن كورسەتەدى.
ENACTUS ستۋدەنتتەرىنىڭ بارلىق بيزنەس-جوبالارى بۇۇ-نىڭ تۇراقتى دامۋىنىڭ 17 ماقساتىنا جەتۋگە باعىتتالعان جانە بولاشاق بيزنەس كوشباسشىلارى مانسابىنىڭ باستاماسى بولىپ سانالادى. الەمدەگى 1000-نان استام ۋنيۆەرسيتەت ستۋدەنتتەردىڭ كوشباسشىلىعى مەن ىسكەرلىك داعدىلارىن دامىتۋ ءۇشىن وسى پلاتفورمانى پايدالانادى.
قر عىلىم جانە جوعارى ءبىلىم مينيسترلىگىنىڭ مالىمدەۋىنشە الەمنىڭ تۇكپىر-تۇكپىرىنەن كەلەتىن 2000 جاس كاسىپكەر ەكولوگيالىق ماسەلەلەردى شەشۋدىڭ يننوۆاتسيالىق تاسىلدەرىن كورسەتەتىن, تۇراقتى قوعامداستىقتاردىڭ دامۋىنا ىقپال ەتەتىن جانە ادامداردىڭ ءومىرىن وڭ وزگەرىستەرگە شابىتتاندىراتىن ءوز جوبالارىن ۇسىنادى.
اتالعان شارادا ەلىمىزدىڭ نامىسىن ENACTUS KAZAKHSTAN 2024 ۇلتتىق چەمپيونى, تالدىقورعان قالاسىنداعى ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ كومانداسى قورعايدى.
