وسىمەن ەكىنشى مارتە شىمىلدىعىن تۇرگەن تانىمدىق لاگەر بيىل حالىقارالىق مارتەبە الىپ وتىر. ەل ايماقتارىنان, سونداي-اق وزبەكستان, قىرعىزستان, تاجىكستان, تۇرىكمەنستان سەكىلدى باۋىرلاس مەملەكەتتەردەن كەلگەن جۇزدەگەن جاس ءۇش كۇن قاتارىنان الماتى ىرگەسىندەگى «ارمان دالا» لاگەرىندە باس قوسىپ, ۋاقىتىن ءتيىمدى وتكىزدى. جوبا اياسىندا قاتىسۋشىلار ءار سالادا جەتىستىككە جەتكەن تابىستى ادامدارمەن پىكىر الماسىپ, باعدارلاما قوناقتارى كاسىبي تاجىريبەلەرىمەن ءبولىستى.
ءىس-شارا قوناقتارىنىڭ قاتارىندا الماتىداعى يۋنەسكو ايماقتىق كەڭسەسىنىڭ ديرەكتورى جانە قازاقستان, قىرعىزستان, تاجىكستان مەن تۇرىكمەنستانداعى يۋنەسكو وكىلى ءامىر پيريچ, سيدنەي وليمپياداسىنىڭ چەمپيونى ولگا شيشيگينا, پاريج وليمپياداسىنىڭ قولا جۇلدەگەرلەرى الەكساندرا لە جانە نازىم قىزايباي, «قازاق ءتىلى» حالىقارالىق قوعامىنىڭ پرەزيدەنتى راۋان كەنجەحان ۇلى, تەلەجۇرگىزۋشى اميناتا ۋەدراوگو, كاسىپكەر بەيبىت الىبەكوۆ قاتارلى تانىمال ادامدار بار.
جوبانىڭ رەسمي اشىلۋ سالتاناتىن اشقان قازاقستان حالقى اسسامبلەياسى توراعاسىنىڭ ورىنباسارى – پرەزيدەنتى اكىمشىلىگى قحا حاتشىلىعىنىڭ مەڭگەرۋشىسى مارات ءازىلحانوۆ جاستارعا تابىس تىلەپ, پرەزيدەنت كومەكشىسى رۋسلان جەلدىبايدىڭ حالىقارالىق جاستار لاگەرىنىڭ قوناقتارىنا جولداعان قۇتتىقتاۋ حاتىن وقىپ بەردى. ەركىن پىكىر الماسۋ فورماتىندا وتكەن كەزدەسۋدە قۇرىلىم جەتەكشىسى قاتىسۋشىلاردى ۇزدىكسىز ىزدەنىستەرىن توقتاتپاۋعا شاقىرىپ, «اسسامبلەيا جاستارى» تاراپىنان كوپتەگەن اۋقىمدى ءىس اتقارىلىپ جاتقانىن اتاپ ءوتتى.
«ادامدى شىرقاۋ بيىككە جەتەلەيتىن – ءبىلىم مەن ەڭبەك. وسى جەرگە كەلگەن كوپشىلىگىڭىز – بىرقاتار تابىسقا, جەتىستىككە جەتكەن ازاماتسىزدار. جاستار باستامالارىن دامىتۋ, جاستار ورتاسىندا قوعامدىق كەلىسىم مەن ۇلتتىق بىرەگەيلىكتى نىعايتۋدا سىزدەرگە ۇلكەن جاۋاپكەرشىلىك جۇكتەلەدى. وتانعا دەگەن سۇيىسپەنشىلىكتى, حالىق بىرلىگىن بەكەمدەۋدى, قازاقستان حالىقتارىنا ورتاق قۇرمەتپەن قاراۋدىڭ ۇلگىسىن ناسيحاتتاپ كەلەسىزدەر. قازىر ەڭبەك ەتەم, ءبىلىم الام دەگەن ادامعا جول اشىق. وسى مۇمكىندىكتەردى ۇتىمدى پايدالانىپ, تەك ەلىمىزدە عانا ەمەس, ورتا ازيا ەلدەرىنىڭ جاستارىمەن ورتاق يدەيالار اياسىندا ىنتىماقتاسىپ, ەلىمىزدىڭ بەدەلىن بيىكتەتەسىزدەر دەپ سەنەمىن», دەدى م.ءازىلحانوۆ.
«اسسامبلەيا جاستارى» رقب توراعاسى تيمۋر دجۋمۋرباەۆ, جاستاردى الەۋمەتتىك قولداۋ, مەملەكەتتىك ءتىلدى ەتنوسارالىق ءتىل مارتەبەسىندە دامىتۋ, قورشاعان ورتانى قورعاۋ مەن اسكەري پاتريوتتىق مادەنيەتتى ىلگەرىلەتۋ بىرلەستىك العا قويىپ وتىرعان نەگىزگى مىندەتتەرگە كىرەتىنىن مالىمدەدى.
«بۇگىنگى ءىس-شاراعا كەلگەن جاستاردىڭ دەنى – ەل ايماقتارىنداعى جاستار بىرلەستىكتەرىنىڭ جەتەكشىلەرى مەن بەلسەندى ازاماتتار. سونداي-اق قاتارىمىزعا بيىل كورشى ەلدەردەن دەلەگات جاستار كەلىپ وتىر. ءبىز ولارعا ەلىمىزدىڭ تاريحىن, باي مادەنيەتىن, جاستارىمىزدىڭ ىنتىماق-بىرلىگىن پاش ەتەمىز. بۇگىندە «اسسامبلەيا جاستارى» قاناتىندا 9 مىڭنان اسا جاس كوشباسشى بار. ولار – كۇندەلىكتى قوعامدىق جۇمىستارعا اتسالىسىپ, ەل بىرلىگىن نىعايتۋعا ۇلەس قوسىپ جۇرگەن مەملەكەتشىل جاندار. بەلسەندىلەرىمىز مەملەكەتتىك قىزمەت قۇرىلىمدارىندا, مەملەكەتتىك ينستيتۋتتاردا, عىلىم, مادەنيەت, ەكونوميكا, بيزنەس, سپورت سەكىلدى بارلىق جەتەكشى سالادا بوي كورسەتىپ ءجۇر. ءداستۇرلى لاگەردىڭ ماقساتى – وڭىردەگى جاستار پروبلەماسىنا, ولاردىڭ تالاپ-تىلەكتەرىنە قۇلاق اسۋ ءارى ءبىر ماقساتقا جۇمىلدىرۋ. بىزگە ورتاق الاڭ ۇسىنىپ, ءىس-شارانىڭ اسەم الماتىدا وتۋىنە مۇرىندىق بولعان الماتى قالاسىنىڭ اكىمدىگىنە العىس بىلدىرەمىز», دەيدى ت.دجۋمۋرباەۆ.
الماتى قالاسى قوعامدىق دامۋ باسقارماسىنىڭ باسشىسى ايدار ەسەنبەكوۆ الماتى ەل جاستارىنىڭ ەڭ كوپ شوعىرى ورنالاسقان مەگاپوليس ەكەنىن, شاھاردا جاستار ساناتىنداعى 700 مىڭنان اسا ازامات ەڭبەك ەتىپ, ءبىلىم الاتىنىن, بيىلدىڭ وزىندە قالادا جاستاردى قولداۋعا ارنالعان 8 كوميۋنيتي ورتالىق ەسىك اشقانىن اتادى.
الماتىداعى يۋنەسكو ايماقتىق كەڭسەسىنىڭ ديرەكتورى ءامىر پيريچ مادەنيەتارالىق ديالوگتى دامىتۋدا جاستارعا ۇلكەن سەنىم ارتىلاتىنىن ايتىپ, ورتالىق ازيا ەلدەرى جاستارىنىڭ مادەني ىنتىماقتاستىق ورناتۋى بەدەلدى ۇيىمنىڭ عىلىمي جانە الەۋمەتتىك جوبالارىنا قولجەتىمدىلىك تۋدىرۋعا سەرپىن بەرەتىنىن جەتكىزدى.
جوبا قاتىسۋشىلارى ءىس-شارا اياسىندا وتكەن شەبەرلىك دارىستەر مەن موتيۆاتسيالىق كەزدەسۋلەر وزدەرىنە شابىت سىيلاعانىن ايتادى. ۇيىمداستىرۋشىلار الداعى ۋاقىتتا ءداستۇرلى جوبانىڭ اۋقىمىن كەڭەيتۋدى كوزدەپ وتىر.
الماتى
