سۋرەت: اشىق دەرەككوزدەن
قارجى نارىعىن رەتتەۋ جانە دامىتۋ اگەنتتىگىنىڭ مالىمەتى بويىنشا, وسى جىلدىڭ تامىز ايىنداعى ەدب قارجىلىق ەسەبىندە بانكتەردىڭ تازا تابىس كولەمى 1,4 ترلن تەڭگە بولدى. بۇل بىلتىرعى كورسەتكىشتەن 16,7%-عا كوپ. 21 بانكتىڭ ىشىندە ەڭ تابىسى جوعارى – «Halyk Bank» (444,2 ملرد تەڭگە). ەكىنشى ورىندا – «Kaspi» (281,9 ملرد), ءۇشىنشى ورىندا – «تسەنتركرەديتبانكى» (101,8 ملرد تەڭگە). ودان كەيىنگى ورىندار «Forte Bank» (89,1 ملرد) پەن «Jusan Bank»-كە (83,7 ملرد تەڭگە) تيەسىلى. قالعان 16 بانكتىڭ جيىنتىق تابىسى – 388,1 ملرد تەڭگە. سوندا كىرىسى مول 5 بانكتىڭ جالپى ەدب تابىسىنداعى ۇلەسى 72%-دى قۇراپ وتىر.
بۇل دەرەكتەر بانك اكتيۆتەرى جىل باسىنان بەرى 10,4%-عا وسكەنىن كورسەتەدى. ۇلتتىق بانك جاريالاعان تامىز ايىنىڭ ەسەبىنە قاراساق, ەكىنشى دەڭگەيلى بانكتەردىڭ تامىز ايىنداعى جاعداي بويىنشا جيىنتىق اكتيۆ كولەمى 56,8 ترلن تەڭگەگە جەتكەن. جىل باسىنان بەرى اكتيۆتەر كولەمى 5,3 ترلن تەڭگەگە, ياعني 10,4%-عا كوبەيگەن.
21 بانكتىڭ ىشىندە تەك 4 بانكتىڭ اكتيۆى ازايعان. «قىتاي ساۋدا-ونەركاسىپ بانكى» (-0,01%), «قازاقستان-زيرات حالىقارالىق بانكى» (-6,2%), «ۆتب بانك» (-6,8%) جانە «Al Hilal» بانكى (-16,3%) تەرىس ديناميكا كورسەتىپ وتىر.
قارجى ينستيتۋتتارىنداعى مەرزىمى وتكەن بەرەشەك كولەمى ۇلعايىپ كەلەدى. ەدب نەسيە پورتفەلىندەگى 90 كۇننەن استام مەرزىمى وتكەن بەرەشەك ۇلەسى 3,14%-عا جەتىپ وتىر. ساندىق ماندە ەسەپتەسەك, جىل باسىنان بەرى مۇنداي ء«ۇمىتسىز بەرەشەك» كولەمى 155,8 ملرد تەڭگەنى قۇرايدى.
بانكتەردىڭ ەكونوميكاعا بەرگەن كرەديتى 2024 جىلعى شىلدەدە 1,4%-عا, 30,5 ترلن تەڭگەگە دەيىن (2024 جىلدىڭ باسىنان بەرى 9,3%-عا وسكەن) ۇلعايدى. ۇلتتىق ۆاليۋتادا بەرىلگەن كرەديت 1,5%-عا, 28,0 ترلن تەڭگەگە دەيىن, شەتەل ۆاليۋتاسىنداعى نەسيە 1,1%-عا, 2,6 ترلن تەڭگەگە دەيىن كوبەيدى.
حالىققا بەرىلگەن كرەديتتەر 2024 جىلعى شىلدەدە 2,2%-عا ۇلعايىپ, 18,7 ترلن تەڭگەنى قۇرادى (2024 جىلدىڭ باسىنان باستاپ 12,3%-عا وسكەن). حالىققا بەرىلگەن كرەديت قۇرىلىمىندا تۇتىنۋشىلىق قارىز 12,0 ترلن تەڭگەگە ارتتى.
