سۋرەتتى تۇسىرگەن – اۆتور
كەزدەسۋگە قازاقستان حالقى اسسامبلەياسى توراعاسىنىڭ ورىنباسارى – پرەزيدەنت اكىمشىلىگى قحا حاتشىلىعىنىڭ مەڭگەرۋشىسى مارات ءازىلحانوۆ, قالالىق ءماسليحات دەپۋتاتتارى, قازاقستان حالقى اسسامبلەياسىنىڭ مۇشەلەرى, ەتنومادەني بىرلەستىكتەردىڭ وكىلدەرى مەن «اسسامبلەيا جاستارى» ۇيىمىنىڭ بەلسەندىلەرى قاتىستى.
ءىس-شارانى اشقان م.ءازىلحانوۆ جولداۋدا ايتىلعان مىندەتتەردىڭ جۇيەلى جۇزەگە اسۋىنا ءبىر شاڭىراق استىنا جينالعان تاتۋ ۇيىم رەتىندە اسسامبلەيا ايشىقتى ۇلەس قوسۋى كەرەك ەكەنىن ايتتى. تاتۋلىق پەن تۇراقتىلىق, رۋحاني دامۋ ءبىزدىڭ باستى باعدارىمىز دەگەن ول جولداۋدا ايتىلعان بىرقاتار باعىتقا توقتالدى.
– مەملەكەت باسشىسى قاسىم-جومارت توقاەۆ قازاقستان حالقىنا ارناعان كەزەكتى جولداۋىندا ەل دامۋىنا سەرپىن بەرەتىن نەگىزگى سالالاردى دامىتۋدىڭ ماڭىزدى قادامدارىن اتادى. لايىقتى ناتيجەگە قول جەتكىزۋ ءۇشىن كاسىبيلىك پەن ادالدىق باستى قۇندىلىق ەكەنىن باسا ايتتى. الداعى 2025 جىل «جۇمىسشى ماماندىقتار جىلى» دەپ جاريالانىپ, كاسىبي ءبىلىم جۇيەسىن رەفورمالاۋعا قاتىستى باستاما كوتەرىلدى. پرەزيدەنتتىڭ جۇمىسشى ماماندىقتارىن دارىپتەۋ ارقىلى قوعامدا ەڭبەكقور جانە ناعىز مامان بولۋ يدەياسىن ناسيحاتتايتىنىن ايتقانى – ميلليونداعان قاراپايىم ەڭبەك ادامدارىنا باعىتتالعان ۇلكەن قۇرمەت. ادال ءارى تاباندى ەڭبەگىمەن تابىسقا جەتكەن ازاماتتاردىڭ قوعامداعى مارتەبەسىن كوتەرۋ – ورىندى ءىس. بارشا قحا مۇشەلەرى وتانىمىزدىڭ وركەن جايۋىنا ەڭبەك ەتۋىمىز كەرەك, – دەدى م.ءازىلحانوۆ.
جولداۋدا ايتىلعان تاقىرىپتارعا جەكەلەي توقتالعان ەتنومادەني بىرلەستىكتەردىڭ جەتەكشىلەرى دە ويىن ورتاعا سالدى. «باربانگ» كۇردتەر قاۋىمداستىعى الماتى فيليالىنىڭ جەتەكشىسى انۆار ءناديروۆتىڭ سوزىنشە, ءداستۇرلى جولداۋ ەلدەگى ەكونوميكالىق تۇراقتىلىقتى قامتاماسىز ەتۋگە باعىتتالعان باستامالارمەن قاتار, زاڭ مەن ءتارتىپ سالاسىنا ۇلكەن جاۋاپكەرشىلىك جۇكتەپ وتىر.
– پرەزيدەنت كەيىنگى جىلدارى اۋىل شارۋاشىلىعىنا كوپ كولەمدە قارجى ءبولىنىپ جاتقانىن ايتىپ, ەلدە 2 ملن ءىرى قارا مال مەن 3 ملن ۋاق مال ساندا بار دا ساناتتا جوق بولىپ انىقتالدى دەپ سالاداعى شيكىلىكتى اتاپ كورسەتتى. مال شارۋاشىلىعى مامانى بولعاننان كەيىن, وسىنداي شيكىلىكتىڭ پرەزيدەنت نازارىنا ىلىككەنى ولقىلىقتىڭ ورنىن تولتىرادى دەپ ۇمىتتەنەمىن. سوندىقتان بۇل جولداۋدى جاڭا مۇمكىندىكتەر مەن بولاشاققا دەگەن سەنىمنىڭ كورىنىسى دەپ قابىلداۋعا بولادى. ارقايسىسىمىز ەل دامۋىنا ۇلەس قوسۋ ماقساتىندا جولداۋدا قامتىلعان باستامالاردى قولداپ, ءوز سالامىز بويىنشا مىندەتتەردىڭ ورىندالۋىنا ۇلەس قوسۋىمىز قاجەت. الەۋمەتتىك-ەكونوميكالىق دامۋ, قوعامدا بولىپ جاتقان ءتۇرلى وزگەرىستەر ەلدى وركەندەتۋگە نەگىزدەلگەن ىلگەرى قادام دەپ ەسەپتەيمىن, – دەيدى ا.ناديروۆ.
كەزدەسۋدە قوعامدا قىزۋ تالقىلانىپ جاتقان اتوم ەلەكتر ستانساسىن سالۋ ماسەلەسى دە تالقىلاۋدان تىس قالمادى. ەل اۋماعىنداعى ءىرىلى-ۇساق ستانسالاردىڭ قۋات-كوزى قاجەتتى سۇرانىستى قامتۋعا قاۋقارسىز دەگەن بىرقاتار ساراپشى ماسەلەگە ساۋاتتى كوزبەن ءۇڭىلۋىمىز قاجەت دەپ پىكىر ءبىلدىردى.
– اتوم ەلەكتر ستانساسىن سالۋ ماسەلەسى – قوعامدا ۇلكەن سۇرانىسپەن تالقىلانىپ جاتقان تاقىرىپ. پرەزيدەنت جولداۋىندا بۇل ءجىتى ايتىلىپ, حالىقتىق رەفەرەندۋم نەگىزىندە شەشىم قابىلداناتىن بولدى. ءوز باسىم بۇل باستامانى قولدايمىن. نەگە دەسەك, دامىعان مەملەكەتتەر بۇل باعىتتا الدەقاشان وڭتايلى قادامعا بارعان. ءبىز دە سول كوشكە ىلەسۋىمىز كەرەك. ءوندىرىسىمىزدى وركەندەتىپ, ەكونوميكالىق قۋاتىمىزدى ارتتىرۋ ءۇشىن ەنەرگەتيكالىق تاۋەلدىلىك ماسەلەسىن تۇبەگەيلى شەشىپ العانىمىز ءجون. ەنەرگيا تەك وندىرىسكە عانا ەمەس, قوعام ومىرىندەگى بارلىق سالانىڭ دامۋى, ءبىزدىڭ ساپالى ءومىر ءسۇرۋىمىز ءۇشىن قاجەت. كاسىپكەر رەتىندە بەلگيا, اقش, ەۋروپا ەلدەرىن ءجيى ارالايمىن. مۇنداي ستانسالاردىڭ تالايىن ءوز كوزىممەن كوردىم. ورىنسىز فوبيادان ارىلىپ, ناقتى قادام جاسايىق دەر ەدىم. ەنەرگيا تاپشىلىعىنىڭ رەتتەلۋى شەتەلدىك ينۆەستورلاردى كوپتەپ تارتۋعا, حالىقتى تۇراقتى جۇمىس ورنىمەن قامتۋعا, ەنەرگيا قورىن كوبەيتۋگە جول اشادى. تەحنيكالىق تالاپتار ەسكەرىلىپ, جوبا سالا عالىمدارىمەن كەڭەسە جۇزەگە اسسا يگى – دەپ اتاپ ءوتتى قازاقستان ۇيعىرلارى ەتنومادەني بىرلەستىگىنىڭ توراعاسى ابدۋلحاليل دولكۋنتاي.
الماتى
