سۋرەتتى تۇسىرگەن – ەرلان ومار, «EQ»
«جامبى اتۋ» جانە «ارقان تارتىس» ۇلتتىق سپورت تۇرلەرى فەدەراتسياسىنىڭ پرەزيدەنتى ەركەبۇلان ءىلياسوۆتىڭ ايتۋىنشا, ارقان تارتىس سپورتىنا الەمدە قىزىعۋشىلىق ارتىپ كەلەدى. نەگىزى مۇنداي سپورت ءتۇرى دۇنيە جۇزىندەگى باسقا دا حالىقتاردا بۇرىننان بار. اركىم ونى ءوز تىلىندە اتايدى. دەگەنمەن ءبىزدىڭ باستامامىزبەن بيىل ول قازاقتىڭ ۇلتتىق سپورت ءتۇرى رەتىندە كوشپەلىلەر ويىندارى باعدارلاماسىنا ەنىپ وتىر.
سونىمەن ەرلەر اراسىندا بۇل سىندا ۇلىبريتانيا, وزبەكستان, رەسەي, قىرعىزستان, پاكىستان جانە قازاقستان قۇرامالارى ءوزارا كىم مىقتىنى انىقتاسا, قىزدار اراسىندا رەسەي, قىرعىزستان, وزبەكستان جانە قازاقستان ارۋلارى تارتىستى باسەكەلەر وتكىزدى.
دۇنيەجۇزىلىك كوشپەلىلەر ويىندارىنداعى ناعىز دەلەبەنى قىزدىرعان سايىستاردىڭ ءبىرى دە وسى ارقان تارتىس بولدى. ويتكەنى اسىرەسە قازاق قۇراماسى الاڭعا شىققاندا «الاۋ» سارايىنا جينالعان كورەرمەندەر دۋ قول شاپالاقتاپ, ءوز سپورتشىلارىن قولداعاندا شىنىمەن كەۋدەنى ماقتانىش سەزىمى كەرنەدى. مىنە, وسى قولداۋ دا ءبىزدىڭ قىزدارىمىز بەن جىگىتتەرىمىزگە جىگەر بەرىپ, دەمەپ وتىرعانىنا ءشۇبا جوق.
قارا كۇش يەلەرىنەن قۇرالعان جىگىتتەر قۇرامالارى سىنىندا جارتىلاي فينالعا قازاقستان, قىرعىزستان, رەسەي جانە پاكىستان سپورتشىلارى شىقتى. بۇل جولى قازاق جىگىتتەرى پاكىستاندىقتاردى قاپى قالدىرىپ, فينالعا شىقسا, رەسەيلىكتەر ايىر قالپاقتى اعايىنداردىڭ جولىن قيدى.
وسى كۇنى تۇستەن كەيىن الدىمەن قىرعىزستان مەن پاكىستان قۇرامالارى 3-ورىن ءۇشىن تالاسىپ, اتىستى باسەكەدە الاتاۋدىڭ ار جاعىنان كەلگەن باۋىرلاس ەلدىڭ باعى جاندى. ولار – جارىستىڭ قولا جۇلدەگەرى.
ال فينالدىق ايقاس تىكەلەي ماعىناداعى تابان تىرەسكەن تارتىسپەن ەستە قالدى. العاشقى باسەكەدە باستاپقى بەس مينۋتتاي ەكى جاق تا ءبىر-ءبىرىنىڭ قاتەلەسۋىن باعىپ, ارتىق قيمىل جاساعان جوق. ءبىر ۋاقىتتا شالت قيمىلمەن ىسكە كىرىسكەن رەسەيلىكتەر, وكىنىشكە قاراي, ءبىزدىڭ جىگىتتەردى وپ-وڭاي سۇيرەپ اكەتتى. ەسەپ 1:0. بۇل كورىنىستەن كەيىن التىن مەدالدان ءۇمىت ۇزىلگەندەي بولعان. الايدا ەكىنشى تارتىستا ءبىزدىڭ سايىپقىراندار كوپكە سوزباي, رەسەيلىكتەردى وڭاي سۇيرەپ, جەڭىسكە جەتتى. سونىمەن ەسەپ تەڭەستى.
سوڭعى شەشۋشى ساتتە قازاق جىگىتتەرىنىڭ بابى ساي بولعانىمەن, ساتتىلىك جەتىسپەي قالدى. ەكى جاق تا التىن مەدال قول سوزىم جەردە تۇرعانىن ءتۇسىنىپ, بارىن سالىپ ايقاسىپ, قارا تەرگە مالشىندى. بىراق بۇل جولى رەسەيلىكتەردىڭ جولى بولىپ, كوشپەلىلەر ويىندارىنىڭ چەمپيونى اتاندى. ءبىزدىڭ جىگىتتەردە – كۇمىسپەن كۇپتەلگەن مەدال.
قىزدار باسەكەسىندە دە ءدال وسىنداي جاعداي قايتالاندى. جارتىلاي فينالدا سۇرىنگەن وزبەكستان مەن قىرعىزستان قۇرامالارىنا قولا مەدال بەرىلسە, التىن جۇلدەنى تاعى دا رەسەي مەن قازاقستان ارۋلارى ساراپقا سالدى. وكىنىشكە قاراي, بۇل جولى دا رەسەيلىكتەردىڭ باعى جانىپ, دۇنيەجۇزىلىك كوشپەلىلەر ويىندارىنىڭ جەڭىمپازى اتاندى.
سونىمەن ارقان تارتىس باسەكەسى ءوز مارەسىنە جەتتى. قازاقستان قورجىنىندا – قوس كۇمىس. ۇلتتىق سپورتىمىزدىڭ مەرەيىن اسقاقتاتىپ, الەمگە تانىلۋىنا ءوز ۇلەسىن قوسقان سپورتشىلارىمىزدىڭ جەڭىستى كۇندەرى ءالى دە الدا.
