ولاردىڭ ءبارى امبۋلاتوريالىق باقىلاۋعا الىنعان جانە بارلىعىنىڭ جاعدايى جاقسى. بۇل تۋرالى قر دەنساۋلىق ساقتاۋ مينيسترلىگىنىڭ ءباسپاسوز قىزمەتى مالىمدەدى.
ستاتسيوناردا 53 بالا ەمىن جالعاستىرۋدا, ولاردىڭ جاعدايى دا تۇراقتى, ومىرىنە قاۋىپ ءتونىپ تۇرعان جوق.
اۋرۋ شىققان كەزدەن باستاپ (2024 جىلعى 6 قىركۇيەكتەن بەرى) ءوڭىردىڭ مەديتسينالىق مەكەمەلەرىنە ماڭعىستاۋ وبلىسى مۇنايلى اۋدانىنداعى «№ 8 جالپى ءبىلىم بەرۋ مەكتەبى» مكك-نىڭ قىزۋى كوتەرىلگەن, ءىشى وتكەن, لوقسىپ, السىزدىك بايقالعان 466 وقۋشىسى قارالعان بولاتىن. سونىڭ ىشىندە 96 بالا قاجەتتى مەديتسينالىق كومەكتى الۋ ءۇشىن اۋرۋحاناعا جاتقىزىلدى.
ناۋقاستارعا ءتيىستى مەديتسينالىق كومەك كورسەتىلدى. سونىمەن قاتار سول جەردە ناۋقاستاردى ەمدەۋگە كومەك كورسەتۋ بويىنشا استانا مەديتسينالىق ۋنيۆەرسيتەتىنىڭ ينفەكتسيونيستەرى مەن گاستروەنتەرولوگتارى, قر دەنساۋلىق ساقتاۋ مينيسترلىگى شۇعىل مەديتسينا ۇلتتىق ۇيلەستىرۋ ورتالىعىنىڭ ماماندارى جۇمىسىن جالعاستىرىپ جاتىر.
ەسكە سالايىق, وقۋشىلاردىڭ جاپپاي استان ۋلانۋ دەرەگى مۋنايلى اۋدانىندا تىركەلدى. 6 قىركۇيەك كۇنى كەشتەن باستاپ №8 مەكتەپتىڭ 21 وقۋشىسى جەدەل جاردەم شاقىرعان. بالالاردىڭ ءبارىنىڭ ءىشى اۋىرىپ, دەنە قىزۋى كوتەرىلگەن. سوعان بايلانىستى قۇزىرلى ورگان وكىلدەرىمەن بىرلەسكەن ارنايى شتاب قۇرىلىپ, قىلمىستىق ءىس قوزعالدى.
