فوتو: ەرلان ومار
پالاتا سپيكەرى ءوز سوزىندە دۇنيەجۇزىلىك كوشپەلىلەر ويىندارى ۇلتتىق سپورتتى جانە تاريحي مۇرانى دارىپتەۋدە ايرىقشا مانگە يە ەكەنىن اتاپ ءوتتى.
«كوشپەلىلەر ويىندارى – ۇلتتىق سپورت تۇرلەرىن جانە كوشپەلى حالىقتاردىڭ تاريحي مۇراسىن دارىپتەيتىن بىرەگەي باستاما. سوندىقتان پرەزيدەنتىمىز قاسىم-جومارت كەمەل ۇلى توقاەۆ كوشپەلىلەر وليمپياداسى دەپ اتاعان وسىنداي اۋقىمدى ءىس-شارانى وتكىزۋ ەلىمىزدى تانىتىپ, تاريحىمىزدى ناسيحاتتاۋ تۇرعىسىنان اسا ماڭىزدى. بۇل جوبانى وسىدان ون جىل بۇرىن قىرعىز اعايىندارىمىز العاش رەت ۇيىمداستىرعان ەدى. سودان بەرى كوشپەلىلەر ويىندارى يگى داستۇرگە اينالدى. بيىل قازاق ەلىندە ءوتىپ جاتقان ويىندار ۇيىمداستىرۋ دەڭگەيى, قاتىسۋشى ەلدەردىڭ سانى جانە سايىس اياسىنداعى مادەني باعدارلامالاردىڭ اۋقىمى جاعىنان ەرەكشە ەكەنى ءسوزسىز», دەدى ماۋلەن اشىمباەۆ.
ۇيىمداستىرۋشىلاردىڭ ايتۋىنشا, كوشپەلىلەر ويىندارىندا سپورتشىلار جامبى اتۋدىڭ ءتورت ءتۇرى بويىنشا سىنعا ءتۇسىپ جاتىر. ناقتى ايتقاندا, ولار كورەيا, تۇرىك, ماجار جانە قازاق ءستيلى بويىنشا باق سىنايدى اتالعان سپورت تۇرىنەن 27 ەلدەن كەلگەن 78 مەرگەن چەمپيوندىق اتاقتى ساراپقا سالادى.
ايتا كەتەيىك, جارىستىڭ ءبىرىنشى كۇنى 8 قىركۇيەك كۇنى ءوتتى. العاشقى التىن جانە قولا مەدالداردى فرانتسيا ۇلتتىق قۇراماسىنىڭ سپورتشىلارى جەڭىپ الدى. ال «كۇمىس» موڭعوليا اتلەتىنە بۇيىردى. اتالعان سىندا قازاق سپورتشىسى ابزال ت ۇلىبەكوۆ العاشقى بەستىككە ىلىگىپ, ۇزدىكتەر قاتارىنان كورىندى.
جالپى, V دۇنيەجۇزىلىك كوشپەلىلەر ويىندارىنا الەمنىڭ 89 ەلىنەن كەلگەن 2 800 سپورتشى قاتىسىپ جاتىر. جوبا قولعا الىنعالى بەرى وتكەن ون جىلدا العاش رەت بارلىق قۇرلىقتان قاتىسۋشى كەلدى. ولاردىڭ اراسىندا ەڭ شالعايدا ورنالاسقانى اۆستراليا قۇراماسى ەكەنىن اتاپ وتكەن ءجون. ويىندار اياسىندا عىلىمي باعدارلاما وتكىزۋ دە كوزدەلگەن. وعان 12 ەلدەن 75 مامان قاتىسادى دەپ جوسپارلانىپ وتىر.
