«مۋزەي كوپ جىلدار بويى الماتىداعى كورەيا رەسپۋبليكاسىنىڭ باس كونسۋلدىعىمەن ىنتىماقتاسا جۇمىس ىستەپ, كورەي حالقىنىڭ تاريحى مەن مادەني داستۇرلەرىنىڭ ءارتۇرلى اسپەكتىلەرىن كورسەتەتىن كورمەلەر وتكىزىپ كەلەدى. ورتالىق مۋزەيدە «چەككوري» (ناتيۋرمورت) اتاۋىمەن ۇيىمداستىرىلعان كورمە ەل ازاماتتارىنا كورەي شەبەرلەرىنىڭ باي مادەنيەتىمەن جانە حالىق كەسكىندەمەسىمەن تانىسۋعا مۇمكىندىك بەرەدى», دەپ اتاپ ءوتتى ءىس-شارانى سالتاناتتى تۇردە اشقان قر مەملەكەتتىك ورتالىق مۋزەيىنىڭ ديرەكتورى راشيدا حاريپوۆا
سونداي-اق كورەي رەسپۋبليكاسىنىڭ قازاقستانداعى باس كونسۋلى پاك نەچحون مادەني شارالار قوس ەل اراسىنداعى دوستىق پەن ىنتىماقتاستىقتى نىعايتۋدا ماڭىزدى ءرول اتقاراتىنىن ايتا كەلىپ, كورمەنى ۇيىمداستىرۋعا كۇش-جىگەر جۇمساعان جاندارعا العىس ءبىلدىردى.
«چەككوري» كورمەسى – كورەي ەلىنىڭ ءداستۇرلى «مينحۆا» ونەرىمەن جانە ونىڭ بىرەگەي ستيلىمەن تانىسۋعا مۇمكىندىك بەرەدى. كورمەنىڭ اشىلۋىندا «مينحۆا» حالىق ونەرى مەكتەبىنىڭ ديرەكتورى چون بيون مو «چەككوري» كورمەسىنىڭ ماڭىزى جانە قازىرگى مادەنيەتتەگى ءداستۇرلى «مينحۆا» ءستيلىنىڭ تانىمالدىعى تۋرالى باياندادى.
«چەككوري» - كورەياداعى كىتاپ تاقىرىبى بار ناتيۋرمورتتىڭ اتاۋى. الەمدە بۇل ونەردىڭ كوپتەگەن ۇلگىلەرى بولعانىمەن, چوسون اۋلەتى داۋىرىندە بۇل باعىت ورلەي تۇسكەن. ول تۇستا كىتاپ (1392-1910 جج.) ۇلكەن قۇندىلىققا يە بولىپ, زيالىلىقتىڭ كورسەتكىشىنە اينالعان دەسەدى. بۇل ءوز كەزەگىندە شىعارماشىلىقتىڭ دامۋىنا سەپتىگىن تيگىزگەن.
- «مينحۆا» - كورەيلىك ەستەتيكا مەن تۇنىق سەزىمگە قۇرىلعان, ەڭ بايىرعى كورەي تامىرى بار كەسكىندەمە; قاراڭعى رەڭكتەرسىز, جارقىن جانە كوڭىلدى, تەك وڭ ەنەرگيا بەرەتىن كەسكىندەمە. مينحۆا» ونەرى سوڭعى كەزدەرى الەمدە تانىمال بولىپ كەلەدى. قازىرگى ۋاقىتتا بۇل ونەر ءتۇرىنىڭ 200 مىڭنان استام ءىزباسارلارى بار. «چەككوري» كورمەسىنىڭ ازيالىق تۋرى قازاقستان رەسپۋبليكاسى مەملەكەتتىك ورتالىق مۋزەيىنەن باستالدى. 40 زاماناۋي ونەر سۋرەتشىلەرى «مينحۆا» كىتاپتاردى ءتۇرلى قيال الەمدەرىن كورسەتۋ ءۇشىن ءپان رەتىندە پايدالاندى. مۇندا كورەرمەندەر كورەي حالقىنىڭ تاريحى مەن مادەنيەتىنىڭ بايلىعىنا تولى ونەر الەمىن تاماشالاي الادى, - دەيدى مۋزەي ماماندارى.
كورمەنىڭ سالتاناتتى اشىلۋىندا «نامسون» ءداستۇرلى كورەي ونەرى ستۋدياسىنىڭ ارتىستەرى مەن ت. جۇرگەنوۆ اتىنداعى ونەر اكادەمياسىنىڭ ستۋدەنتتەرى ونەر كورسەتتى.
