ءدۇبىرلى الاماندى تۋريزم جانە سپورت مينيسترلىگى, «Amanat» پارتياسى جانە سپورتتى قولداۋ قورىنىڭ قارجىلاي دەمەۋىمەن ۇلتتىق سپورت تۇرلەرى قاۋىمداستىعىنا قارايتىن «Joryq» فەدەراتسياسى ۇيىمداستىردى. ەتنوسپورت وليمپياداسى سانالاتىن دۇنيەجۇزىلىك كوشپەلىلەر ويىندارىنا وراي «قازانات» يپپودرومىنىڭ ماڭىندا بوي كوتەرگەن ەتنواۋىلدا جەڭىمپازدار مەن جۇلدەگەرلەر قۇرمەتكە كەنەلدى. شاباندوزداردى ماراپاتتاۋ راسىمىندە «Amanat» پارتياسىنىڭ اتقارۋشى حاتشىسى داۋلەت كارىبەك مادەنيەتىمىزدى ناسيحاتتاۋ, ۇلتتىق سپورتتى دامىتۋ مەملەكەت باسشىسى قاسىم-جومارت توقاەۆتىڭ ۇنەمى باستى نازارىندا ەكەنىنە توقتالدى.
«اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا پرەزيدەنت ق.توقاەۆ قازاقستان ۇلى دالا توسىندەگى كوشپەلىلەر وركەنيەتىنىڭ تىكەلەي مۇراگەرى ەكەنىن ايتتى. وزدەرىڭىز بىلەسىزدەر, اتقا ءمىنۋ مادەنيەتى قازاق جەرىنەن باستاۋ الادى. بۇعان وسىدان 5 مىڭ جىل بۇرىن جىلقىنى قولعا ۇيرەتكەن بوتاي قونىسى دالەل. قازىرگى تاڭدا تۇركى حالىقتارى اتا-بابامىزدان قالعان ءداستۇردى ۇزبەي جالعاستىرىپ كەلەدى. مىنە, بيىل ءۇشىنشى جىل قاتارىنان پارتيانىڭ قولداۋىمەن « ۇلى دالا جورىعى» بايگە-مارافونى ءوتتى. بۇل ءىس-شارانىڭ ۇلتتىق سپورتتى وركەندەتۋمەن قاتار ەتنوتۋريزمنىڭ دامۋىنا, باۋىرلاس ەلدەردىڭ مادەني مۇراسىن ناسيحاتتاۋعا تيگىزەر پايداسى وراسان», دەدى د.كارىبەك.
سونىمەن, 5 كۇنگە سوزىلعان 500 شاقىرىمدىق جورىقتا قاباردين-بالقار كومانداسى (ۋاقىت: 27:58:23) جەڭىسكە جەتتى. ولاردىڭ ءىزىن الا مارەدەن وتكەن الماتى قالاسىنىڭ «الاتاۋ» قۇراماسىنا (ۋاقىتى: 28:04:40) 2-ورىن بۇيىردى. ۇشتىكتى اقتوبە وبلىسىنىڭ كومانداسى (28:26:57) تۇيىندەدى. ءتورتىنشى ورىن جەتىسۋ وبلىسىنىڭ سپورتشىلارىنا (29:39:20), ال بەسىنشى ورىن ماڭعىستاۋ وبلىسىنىڭ (29:43:40) قىزدارى جاساقتاعان «سۋىن» كومانداسىنا بۇيىردى.
ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆ ءداستۇرلى تۇردە وتكىزىلىپ كەلە جاتقان ايتۋلى ءىس-شارا رەسپۋبليكالىق بايگە-مارافوننىڭ جىلدان-جىلعا دەڭگەيى ءوسىپ, قاتىسۋشى كوماندالاردىڭ دا سانى ارتقانىن اتاپ ءوتتى.
«مەملەكەت باسشىسى قاسىم-جومارت توقاەۆتىڭ قولداۋىمەن ۇلتتىق سپورت قارقىندى تۇردە دامىپ كەلەدى. ەلوردا تورىندە دۇنيەجۇزىلىك كوشپەلىلەر ويىندارىنىڭ باستالعانىن ايگىلەيتىن « ۇلى دالا جورىعى» حالىقارالىق بايگە-مارافونى مارەسىنە جەتتى. بۇل جورىققا ەلىمىزدىڭ تاڭداۋلى كوماندالارىمەن قاتار الەمنىڭ ءار قيىرىنان دا شاباندوزدار قاتىستى. بۇل بىرەگەي بايگە-مارافون تورتكۇل دۇنيەگە قازاق جەرىندە باستاۋ العان كوشپەلىلەردىڭ باي مادەنيەتىن كورسەتتى», دەدى ي.سالجانوۆ.
بيىلعى حالىقارالىق بايگە-مارافوندا رەكوردتىق كورسەتكىش تە تىركەلدى. ماسەلەن, قىرعىزستان قۇراماسى جارىس جولىنان شىعىپ قالعانىمەن, العاشقى كەزەڭدە 100 شاقىرىمدى 5 ساعات 12 مينۋت 23 سەكۋندتا شاۋىپ ءوتتى.
جالپى, 17 كوماندا قاتىسىپ, ەلىمىزدىڭ شاباندوزدارى اداي, اۋليەاتا, نايمان, جەتىسۋ, قوستاناي جانە كوشىم تۇقىمىنىڭ سايگ ۇلىكتەرىن سىناپ كوردى. جەتىسۋ, ماڭعىستاۋ (قىزدار), ماڭعىستاۋ (ەرلەر), شىعىس قازاقستان, اقتوبە, قوستاناي, اقمولا (قىزدار), جامبىل وبلىستارىنىڭ جانە الماتى قالاسىنىڭ كوماندا مۇشەلەرى تۇركيا, ماجارستان, يران, وڭتۇستىك افريكا رەسپۋبليكاسى, قىرعىزستان, رەسەي فەدەراتسياسىنىڭ قۇرامىنا كىرەتىن تاتارستان, قاباردين-بالقار, قاراشاي-شەركەس رەسپۋبليكالارىنان قوسىلعان شاباندوزدارمەن تارتىسقا ءتۇستى.
الماتى قالاسىنىڭ «الاتاۋ» كومانداسى ساپىندا حالىقارالىق بايگە-مارافونعا قاتىسىپ, جۇلدەلى بولعان شاباندوز ەرسىن العازى ۇلى اتتارىنىڭ تاسىرقاپ, سوڭعى كەزەڭدە ۋاقىتتان ۇتىلعانىن ايتتى.
«الماتى قالاسىنان بەس شاباندوز قوسىلدىق. العاشقى ءۇش كەزەڭدە بەس اتىمىز دا تىڭ بولعان ەدى. ءتورتىنشى كەزەڭدە ءبىر ات تاستاق جولدا تۇياعىن الدىرىپ, جارىستان شىعىپ قالدى. قورىتىندى كەزەڭدە ەكىنشى اتىمىز دا تاسىرقاپ, مارەگە ءۇش شاباندوز عانا كەلدى. ءبىز تاكتيكالىق تۇرعىدا قاتەلىك جىبەردىك. ويتكەنى العاشقى كەزەڭدەردە قىرعىز كومانداسىن وكشەلەپ قۋامىز دەپ اتتارىمىزدىڭ كۇشىن سارقىپ الدىق. چەمپيوندىق اتاق بۇيىرماي تۇر ەكەن, دەسە دە 2-ورىن دا – از تابىس ەمەس. مۇنداي بايگە-مارافون جالعاسىن تاپسا, ءار وڭىردەن كۇنشىلىك جولعا شىداس بەرەتىن قازاناتتار كوپتەپ شىعار ەدى», دەدى شاباندوز.
