الەم نازارىندا – ۇلى دالا ويىندارى

ەتنوسپورت الامانىنىڭ تۇڭلىگىن تۇرگەن ءىس-شاراعا مەملەكەت باسشىسى قاسىم-جومارت توقاەۆ, وزبەكستان پرەزيدەنتى شاۆكات مير­زيوەۆ, قىرعىزستان پرەزي­دەنتى سادىر جاپاروۆ, تۇرىك­مەنستان حالك ماسلا­حاتىنىڭ تور­اعاسى گۋربانگ­ۋلى بەردى­مۇحامەدوۆ, تاتارستان رەس­پۋب­ليكاسىنىڭ رايسى رۋستام ميننيحانوۆ, ساحا رەسپۋب­ليكاسى­نىڭ باسشىسى ايسەن نيكولاەۆ, موڭعوليانىڭ بۇ­رىنعى پرەزيدەنتى ەنحبايار نامبارىن, دۇنيەجۇزىلىك ەتنوسپورت كونفەدەراتسيا­سى­نىڭ پرەزيدەنتى ءبىلال ەر­دو­عان, سونداي-اق يۋنەسكو, اوسشك, بۇۇ دۇنيە­جۇزىلىك تۋريزم ۇيى­مى, تۇركى مەم­لەكەت­تەرى ۇيىمى, تۇركسوي, تۇركى ينۆەستي­تسيالىق قورى, تۇركى مەم­لەكەتتەرىنىڭ پار­­لامەنت­تىك اسسامبلەيا­سى, يسلام سپورت قاۋىم­داس­تى­عى, ازىق-ت ۇلىك قاۋىپسىز­دىگى جو­نىندەگى يسلام ۇيىمى­نىڭ باسشىلارى, ەۋروپا وداعىنىڭ ورتالىق ازيا­داعى ارنايى وكىلى جانە باسقا دا رەسمي تۇلعالار قاتىستى.

ايتۋلى الاماندى اشىق دەپ جا­ريا­لاعان پرەزيدەنت ق.توقاەۆ كوپ­تەن كۇتكەن بايراقتى باسەكەنىڭ ما­ڭىزى جوعارى ەكەنىن اتادى.

«بۇل – الەمدىك اۋقىم­دا ءوتىپ جات­قان ايرىقشا ما­­­ڭىز­دى ءىس-شارا. قازاق­ستان­­عا كەل­گەن باۋىرلاس مەم­لەكەتتەردىڭ باسشىلارى­نا زور ريزاشىلىعىمدى بىل­دى­رەمىن. مارتەبەلى مەي­مان­دار­عا جانە سپورت­شىلارعا ش­ى­نايى العىس ايتامىن. كوش­پەلىلەر وركەنيەتى – دۇنيە­جۇزى تاريحىندا وشپەس ءىز قال­دىرعان وركەنيەت. ۇلى دالا كوش­پەلىلەرى ەجەلدەن بايتاق ەۋ­را­زيانى مەكەن ەتكەن. ولار جاھاندىق دامۋ ۇدەرى­سى­نە تۇبەگەيلى وزگەرىس اكەلدى, سول زامانداعى وزىق تەحنولوگيانىڭ يەسى بولدى. كوشپەلىلەر بەس مىڭ جىل بۇ­رىن جىلقىنى قولعا ۇيرەتتى. دۇ­نيەنى دۇبىرلەتكەن سالت ات­تى­لار مادەنيەتىن قا­لىپ­تاس­تىردى. قۋاتتى قارۋ-جاراق پەن عاجايىپ زەرگەرلىك بۇيىم­دار جاساپ شىعاردى. ساق ءدا­ۋىرىنىڭ التىن ادامدارى – سونىڭ ايقىن دالەلى. قازاق جەرى­نەن ءال-فارابي, قوجا احمەت ياساۋي سىندى عۇلاما­لار شىققان. ولار ءىلىم-عىلىم­نىڭ دامۋىنا وراسان زور ۇلەس قوستى.

ءبىزدىڭ بابالارىمىز الىپ مەملەكەتتەر قۇردى, ۇلكەن قالالار سالدى. ۇلى دالادا وتىرار, تۇركىستان, تاراز, سارايشىق سياقتى ساۋلەتتى شاھارلار بوي كوتەردى. كوشپەلى جۇرت باتىس پەن شىعىسقا كوپىر بولىپ, ءتۇرلى مادەنيەتتىڭ جاقىنداسۋىنا اسەر ەتتى. وسى جەردە ەجەلگى عۇن يمپەرياسى, ودان سوڭ تۇرىك قاعاناتى سالتانات قۇردى. ولاردىڭ داڭقتى جولىن التىن وردا مەن قازاق حاندىعى جالعاستىردى. كوشپەندىلەر وركەنيەتى – ناعىز كونەكوز وركەنيەت. شىن مانىندە, كوشپەندى حالىقتار بارلىق قۇرلىقتا بار. ولاردىڭ ءىزىن ەۋروپا مەن ازيادان, افريكا مەن امەريكادان كورۋگە بولادى. كوشپەلىلەردىڭ مادەنيەتى, رۋحاني قازىناسى, قۇندىلىقتارى – ورتاق. كوشپەلى حالىق – ەڭ الدىمەن, رۋحى ازات جۇرت. كوشپەلىلەر ءۇشىن ءومىر – ماڭگىلىك قوزعالىس. ولاردىڭ ءار قادامى – جاڭا الەمگە جاسالعان جاسامپاز قادام», دەدى مەملەكەت باسشىسى.

سونداي-اق پرەزيدەنت قازاق ەجەل­دەن قوناقجاي حالىق ەكەنىن, جاڭا­لىققا جانى قۇمار, ءتۇرلى مادەنيەتكە اشىق جۇرت ەكەنىن اتاپ ءوتتى.

ء«بىزدىڭ ءومىر سالتىمىز تابيعات­پەن ەرەكشە ۇيلەسىم تاپقان. كوش­پەلىلەر – تۋمىسىنان قايسار حالىق. كوشپەلىلەردىڭ ۇلى كوشى ەشقاشان توقتامايدى. مىڭداعان جىلعا جالعاسقان وسى كوش قازىر باسقاشا سيپاتقا يە بولدى. كوشپەلى ءومىر سالتى قايتا جاڭعىردى. جاھاندانۋ داۋىرىندە ەشقانداي شەكارا جوق. ءبىر سوزبەن ايتساق, قازىر زاماناۋي كوشپەندىلەر پايدا بولدى. ءبىز ءبىلىم الۋ, جۇمىس ىستەۋ ءۇشىن قونىس اۋدارامىز, باسقا ەلدەرگە ساياحات جاسايمىز. بۇل داۋىردە ءبىز ەركىندىك رۋحىن ساقتاي ءبىلۋىمىز كەرەك. جاڭا زاماننىڭ جاقسى قاسيەتتەرىن بويعا ءسىڭىرۋ قاجەت. ءبىز – داڭقتى كوشپەندىلەردىڭ مۇراگەرىمىز, باتىر بابالاردىڭ ۇرپاعىمىز. ولار ەل مەن جەردى قورعاپ, ۇلان-عايىر دالانى بىزگە امانات ەتتى. وسى قاستەرلى مۇرانى كوزدىڭ قاراشىعىنداي ساقتاپ, جاس بۋىنعا تابىستاۋ – بارىمىزگە ورتاق پارىز.

كوشپەلىلەر ويىندارى – وسىنداي يگى ماقساتتان تۋعان بىرەگەي جوبا. ون جىل بۇرىن وسى جارىستى العاش ۇيىمداستىرعان قىرعىز باۋىرلارعا العىس ايتامىن. بۇل – ۇلتتىق سپورت تۇرلەرىنەن وتەتىن الەمدەگى ەڭ ءىرى دودا. ونى كوشپەلىلەر وليمپياداسى دەۋگە بولادى. بۇل ويىندار دالا وركەنيەتىن جەر جاھانعا پاش ەتەدى. سپورت – ءوزارا قۇرمەت پەن سىيلاستىق سيمۆولى. سپورتتىڭ باستى ميسسيا­سى – حالىقتار دوستىعىن نىعايتۋ. قازاقستان بۇكىل الەمگە بەيبىتشىلىك پەن كەلىسىم مەكەنى رەتىندە تانىمال. ەلىمىزدە ءتۇرلى ەتنوس وكىلدەرى تاتۋ-ءتاتتى ءومىر ءسۇرىپ جاتىر. ءبىز الىس-جاقىن شەتەلدىڭ بارىمەن تىعىز بايلانىس ورناتتىق. باسقا مەملەكەتتەر دە ءوزارا دوستىق قاتىناستا بولعانىن قالايمىز. سوندىقتان كوشپەلىلەر ويىندارى ىنتىماعىمىزدى بەكەمدەي تۇسپەك», دەدى پرەزيدەنت.

ايتۋلى الاماننىڭ باستالۋىمەن قۇتتىقتاعان پرەزيدەنت « ۇلى دالا ءدۇبىرى» ەلىمىز ءۇشىن تاريحي وقيعا سانالاتىنىن, سارىارقانىڭ سايىن دالاسى 5 كۇن بويى دۇبىرگە تولىپ, كۇللى الەم جۇرتى ناعىز كوشپەلىلەردىڭ بولمىسىنا كۋا بولاتىنىن ايتىپ, بىرلىك پەن تاتۋلىقتىڭ تويى تارقاماي, ءتۇبى ءبىر باۋىرلاس ەلدەردىڭ دوستىعى ماڭگى بولۋىنا تىلەۋلەستىگىن ءبىلدىرىپ, V دۇنيەجۇزىلىك كوشپەلىلەر ويىندارىن اشىق دەپ جاريالادى.

سالتاناتتى ءىس-شارادا ءسوز العان دۇنيەجۇزىلىك ەتنوسپورت كونفە­دەراتسياسىنىڭ پرەزيدەنتى ءبىلال ەردوعان كوكتەمگى سۋ تاسقىنىندا قازاقستاننىڭ بىرنەشە وبلىسى زارداپ شەككەنىن, قىسقا ۋاقىت ىشىندە تابيعي اپاتتىڭ زالالىن ەڭسەرىپ, دۇنيەجۇزىلىك كوشپەلىلەر ويىن­دارىن­­دا دايىندىقتى دا جوعارى دەڭ­گەيدە وتكەرگەنىنە العىسىن جەتكىزدى.

«دۇنيەجۇزىلىك كوشپەلىلەر ويىن­دارىن تاماشالاۋعا قازاقستان ەلورداسى استانا قالاسىنا ات باسىن بۇرعانىما وتە قۋانىشتى­مىن. بۇل ءىس-شارا – تەك ءداستۇرلى سپورت تۇرلەرىن بىرىكتىرۋ ءۇشىن عانا ەمەس, الەمگە ورتاق مادەني مۇرا­مىزدى ساقتاپ قالۋعا جانە ونى بولاشاق ۇرپاققا تابىستاۋعا بەل بۋ­عانىمىزدى كورسەتەتىن ماڭىزدى وقيعا. قازاقستان كوشپەلىلەر ويىن­دارىن ۇيىمداستىرۋعا كوپ كۇش جۇمسادى. بۇل قازاق حالقىنىڭ كۇش قۋاتىن, داستۇرگە دەگەن ادالدىعىن ايقىن كورسەتتى. دۇنيەجۇزىلىك ەتنوسپورت كونفەدەراتسياسىنىڭ ماقساتى – ءداستۇرلى سپورت تۇرلەرىن دۇنيەجۇزىنە تاراتۋ. بەس قۇرلىقتاعى 22 مەملەكەتتە 32 مۇشەسى بار بۇل دودا – سپورتتىق سايىس قانا ەمەس, مادەني بايلىعىمىزدىڭ, باۋىرلاس دوستىعىمىزدىڭ, اعايىندىق ىنتىماعىمىزدىڭ دا جارقىن كورىنىسى. استانادا « ۇلى دالا ءدۇبىرى» ۇرانىمەن وتكەن بۇل قۇندى جيىن تەك سپورت جانكۇيەرلەرى اراسىندا عانا ەمەس, سونىمەن قاتار بارلىق ەل, اسىرەسە تۇركيا مەن قازاقستان ءۇشىن جاڭا دوستىق, ىنتىماقتاستىق, مادەني اۋىس-تۇيىسكە سەرپىن بەرەتىنىنە نىق سەنەمىن», دەدى ب.ەردوعان.

پرەمەر-ءمينيستردىڭ ءبىرىنشى ورىن­باسارى, دۇنيەجۇزىلىك كوش­پەلىلەر ويىندارىن ۇيىمداس­تىرۋ كوميتەتىنىڭ توراعاسى رومان سكليار رۋحاني قۇندىلىعى مۇددەلەس تۇركى ەلدەرىنىڭ بەرەكە-بىرلىگىن كورسەتەتىن ايتۋلى ءىس-شارا ەكەنىنە توقتالىپ, ءدۇبىرلى دودانى وتكىزۋگە اتسالىسقان جاندارعا, سونىمەن قاتار 20 مەملەكەتتەن كەلگەن 1 600 ەرىكتىگە دە زور العىسىن جەتكىزدى.

ءدۇبىرلى دودانىڭ اشىلۋ سالتاناتىندا قازاق جەرىن مەكەن ەتەتىن ءتۇرلى ەتنوس وكىلدەرىنىڭ بالالارى قازاقستان تۋىن الىپ شىقتى. بۇدان كەيىن ەلىمىزدىڭ ءانۇرانى شىر­قالىپ, قالىپتاسقان ءداستۇر بو­يىن­شا كوشپەلىلەر ويىندارىنا قاتى­سۋ­شى سپورتشىلاردىڭ شەرۋى ءوتتى.

اۋقىمدى ساحنالىق قويىلىمنىڭ باسىندا كوشپەلىلەردىڭ تاريحى مەن دۇنيەتانىمى تۋرالى «كوشپەلى­لەر فيلوسوفياسى» بەينەروليگى كورسەتىلدى. الەمدىك مادەنيەت پەن وركەنيەتكە ءوز ىقپالىن تيگىزگەن نومادتار مۇراسى – ءبىزدىڭ بولمىسىمىز, ماقتانىمىز. كوپشىلىكتىڭ نازارىنا ۇسىنىلعان «جەردىڭ جارالۋى» دەپ اتالاتىن ءبىرىنشى ءبولىم قويىلىمى سول قاستەرلى مۇرانىڭ ءمانى مەن مازمۇنىن اشىپ, تەرەڭنەن سىر شەرتەدى. مۇنىڭ مازمۇنى مىناداي: «كوشپەلىلەر تاريحى جەر جارالعاننان باستاۋ الىپ, تەمىر مەن قولا داۋىرىندە قارىشتادى, ساقتار مەن عۇنداردىڭ كەزىندە دامىپ, دارالاندى. تۇركى قاعاناتىن قۇرىپ, ۇلى جىبەك جولىمەن بىرگە جەر تانىدى, ءوزىن تانىتتى, جوشى حان ۇلىسى – التىن وردا تۇسىندا گۇلدەنىپ, قازاق ەلىنىڭ نەگىزىن قالادى. كوشپەلىلەردىڭ بولمىسى تابيعات-انامەن بىتە قايناسىپ جاتىر. ولار تابيعاتپەن ەجەلدەن جاراسىمدى قارىم-قاتىناس ورناتىپ, ۇندەستىكتە ءومىر ءسۇردى. كوشپەلىلەر فيلوسوفيا­سىندا باسقا حالىقتار ءتارىزدى ەكى دۇنيەنىڭ الەم مەن ادامنىڭ سىرىن اشۋعا ۇمتىلعان. اسپان دەنەلەرىنىڭ قوزعالىسىنا قاراپ, وزىنشە وي تۇيگەن. جۇلدىزدى الەمنىڭ جۇمباقتارىن اشۋدى ارمان ەتكەن. ناتيجەسىندە, دۇنيە تۋرالى تۇسىنىگى, كوزقاراسى قالىپتاسقان».

وسى كەزدە ءبىز ساحنادان اكتەر­لەردىڭ ورىنداۋىندا كوشپەلى حالىقتىڭ اسپان دەنەلەرىنە قاراپ باعدارىن ايقىنداعانىن, شاقپاق تاستاردى سوعىپ وت شىعارعانىن, سۋ كوزدەرىن تاپقانىن تاماشالادىق.

سودان كەيىنگى ەكىنشى ءبولىم – «التىن جاۋىنگەرلەر شەرۋى». بۇل كورىنىستەن ءبىز كوشپەلىلەردىڭ دوڭگەلەكتى ويلاپ تاپقانىن, التىن ءتۇستى جاۋىنگەرلەردىڭ ونەرىن, ساداق تارتقانىن, ءسان-سالتاناتى كەلىسكەن سايگ ۇلىكتەرمەن شىققان اتتيلا مەن ءتوميريستىڭ وبرازىن كوردىك.

بۇكىل ساحنانى جاڭعىرتىپ, كۇلتەگىن بەينەسى ءبۇي دەدى:

ء«تۇن ۇيىقتامادىم,

كۇندىز وتىرمادىم,

ەلىمدى سۋعا باتىرمادىم,

وتقا كۇيدىرمەدىم.

ەشكىمگە باستارىن يدىرمەدىم!

ءتاڭىرىم جارىلقاپ,

تاۋسىلعان قۇتىم قايتادان  قۇيىلدى.

شاشىلعان ىرىسىم قايتادان جيىلدى...»

وسى تۇستا ساحنانىڭ ءتورىن قاق جارىپ جۇگىرىپ وتكەن كوك تۇرىكتەردىڭ توتەمى – بورىلەر شەرۋىن تاماشالادىق. وسىلاي­شا, ءۇشىنشى ءبولىم تۇركىتىلدەس حالىقتار­دىڭ التىن بەسىگى ءور التايداعى تۇركى قاعاناتى تۋرالى بولدى.

ال ءتورتىنشى ءبولىم ۇلى جىبەك جولىنا ارنالدى. تۇتاس قۇرلىقتىڭ تاعدىرىنا اسەر ەتكەن ۇلى جىبەك جولى – باتىس پەن شىعىستىڭ اراسىن جالعاعان ساۋدا-ساتتىق داڭعىلى عانا ەمەس, ءىلىم-ءبىلىمنىڭ, ءدىن مەن ءدىلدىڭ, مادەنيەت پەن ءتىلدىڭ توعىسىپ, تولىسقان التىن كوپىرى, قالالاردى دامىتقان الەمدىك وركەنيەتتىڭ جەتىستىگى. اتالعان بولىمدە وسى تاقىرىپتىڭ مازمۇنىن ساحنانى ۇلى جىبەك جولىنا اينالدىرىپ, تۇيەلەرمەن ءجۇرىپ وتكەن ارتىستەر ۇستەي ءتۇستى.

بەسىنشى بولىمدە جوشى حان ۇلىسىنىڭ, التىن وردانىڭ سالتانات قۇرعانىنا كۋا بولدىق. ء«ناسىلى نۇردان جارالعان, ساداعىن ساعىم­عا ىلگەن سايىپقىران شىڭعىس حان. قازاقستاننىڭ كەڭ دالاسىن ەدىل مەن دۋنايعا قوسقان بايتاق مەملەكەت – التى جارىم عاسىر اسىر سالعان جوشى ۇلىسى. جانى بار جارالعان نامىس پەن تەكتەن, ەل ەركىندىگى ءۇشىن ىستىق قانىن توك­كەن, بۇگىنگى قۇتتى مەكەن, بايىر­قالى قونىستى بىزگە ميراس قىپ كەت­كەن اسىل تەكتى, ارتىق تۋعان اتا­لارى­مىزدىڭ التىن ورداسى – جوشى ۇلىسى» دەپ داۋىستاعان جاڭ­عىرىق ءاربىر كورەرمەننىڭ رۋحىن ءبىر سىلكىنتىپ قويدى.

ال سوڭعى ءبولىم «قازاق ەلى» دەپ اتالدى. وسى ساتتە ساحنادا الىپ شاڭىراق كوتەرىلىپ, قازىنامىزدىڭ قورىنداي ساندىقتاردان مۇرا­مىزدىڭ اقتارىلعان كورىنىسى قويىلدى. ءتۇرلى ەتنوس وكىلدەرىنەن قۇرالعان ارتىستەر ساحنا ءتورىن تولتىرىپ, ءبىر شاڭىراقتىڭ استىنداعى تاتۋ-ءتاتتى ءومىردى كورسەتتى. بۇل ءبولىم قازاقستاننىڭ حالىق ءارتىسى ديماش قۇدايبەرگەننىڭ «كيەلى مەكەن» انىمەن تۇيىندەلدى.

سودان سوڭ داۋىلپازدارىن دۇبىرلەتىپ ورتاعا ساربازدار كەيپىن­دە 130 ءارتىس شىقتى. باعزىداعى نومادتار اسكەرىنەن باستاپ بۇگىنگى ءىزباسارلارى ساربازدارىمىزعا دەيىنگى جاۋىنگەرلىك رۋحتىڭ ساباقتاستىعى سالتانات قۇردى. «ابىروي» توبى قۇرمەت قاراۋىل روتاسىنىڭ ساربازدارىمەن بىرگە «رۋح» ءانىن اسقاقتاتىپ ورىندادى.

سوڭىنا تامان جاھاندىق دەڭ­گەيدە تابيعاتتى ساقتاۋ تاقىرىبى كوتەرىلىپ, تىرشىلىكتىڭ ءنارى – سۋ ءبىر ارناعا كەلىپ قوسىلدى. «بىرلىك كەرۋەنى» بەينەروليگى كورسەتىلدى. وندا قازاقستاننىڭ بارلىق وڭىرى­نەن اكەلىنگەن كيەلى بۇلاقتاردىڭ سۋى تايقازانعا قالاي قۇيىلعانى بەينەلەندى. مۇنى ەلىمىزدىڭ تۇكپىر-تۇكپىرىنەن ءوڭىردىڭ ءداستۇرى مەن ستيلىندە بەزەندىرىلگەن «كەرۋەنمەن» باتىرلار اكەلگەن. وسى ورايدا 2014 جىلدان بەرى قىرعىزستاننىڭ باستاماسىمەن كوشپەلىلەر ويىندارىنىڭ قاسيەتتى سيمۆولى سۋ بولىپ كەلە جاتقانىن اتاپ وتكەن ءجون.

«تۋعان ەل» اتتى قورىتىندى ءاندى قازاقستاننىڭ ەڭبەك ەرى, حالىق ءارتىسى روزا رىمباەۆا, قازاقستاننىڭ حالىق ءارتىسى ديماش قۇدايبەرگەن جانە تانىمال ارتىستەر نازىم ساعىنتاي, ايگەرىم التىنبەك, نەماتيللو زكرۋللاەۆ, ايري, ەۆگەني چاينيكوۆ جانە تاعى انشىلەر ورىندادى.

وسىناۋ عاجايىپ شوۋدى 3 مىڭعا جۋىق ادام جوعارى دەڭگەيدە ورىنداپ شىقتى. قويىلىمدى مادەنيەت جانە اقپارات مينيسترلىگىنىڭ ۆەدومستۆولىق باعىنىستى ۇيىمدارى, وبلىستىق ونەر ۇيىمدارى مەن باسقا جاقتاردان شاقىرىلعان ونەرپازدار مەن ۇجىمدار دايىندادى. ونەر مايتالماندارى ءان مەن جىرعا بولەپ, كوشپەلى حالىقتىڭ ءور رۋحىن پاش ەتەتىن باعدارلاما ستاديونعا جينالعان 20 مىڭ كورەرمەنگە ەرەكشە اسەر سىيلادى.

سالتاناتى كەلىسكەن بۇل اشىلۋ ءراسىمى تىكەلەي ەفيردەن دۇنيە جۇزىنە تارادى. ەلىمىزدىڭ «قازاقستان», «قازسپورت», «حابار», «ەل ارنا», «جىبەك جولى», «Silk Way», «Sport Plus» ارنالارى كورسەتسە, شەت مەملەكەتتەردەن تۇركيانىڭ TRT AVAZ ارناسى, قىرعىزستاننىڭ 5 تەلەارناسى, حالىقارالىق «مير», «مير 24» ارنالارى, رەسەيدىڭ «ستارت LIVE» سپورت ارناسى, تاتارستاننىڭ «تنۆ قازان» تەلەارناسى, وزبەكستان مەن تۇرىكمەنستاننىڭ مەملەكەتتىك ارنالارى «استانا ارەنا» ستاديونىنان تىكەلەي ەفيردە حابار تاراتتى. مادەنيەت جانە اقپا­رات مينيسترلىگىنىڭ قولداۋىمەن كوشپەلىلەر ويىندارى تاريحىندا مۇنداي حالىقارالىق دەڭگەيدە اۋقىمدى تەلەحابار تاراتۋ العاش رەت جۇزەگە اسىرىلدى. ياعني 2010 جىلدان بەرى قىرعىزستاندا ءۇش مارتە, تۇركيادا ءبىر رەت جالاۋى جەلبىرەگەن كوشپەلىلەر ويىندارىنان تىكەلەي اقپارات تاراتۋ اعىسى مۇنداي اۋقىمدى بولعان ەمەس.

دۇنيەجۇزىلىك كوشپەلىلەر ويىندارى 2014 جىلى قىرعىزستان­نىڭ شولپان-اتا قالاسىندا ۇيىمداستىرىلعاندا 10 سپورت ءتۇرى بويىنشا 19 ەلدەن 583 سپورتشى قاتىستى. 2016 جىلى دا وسى شاھاردا ءوتىپ, 62 ەلدەن 1 200 سپورت 21 سپورت تۇرىنەن مەدالدار جيىنتىعىن بولىسكە سالدى. 2018 جىلى 82 مەملەكەتتەن 2 000 سپورتشى 37 سپورت تۇرىنەن سايىسقا ءتۇستى. ەكى جىل بۇرىن تۇركيانىڭ يزنيك قالاسىندا ۇيىمداستىرىلعان الامانعا 102 ەلدەن دەلەگاتسيا قاتىسىپ, 3 مىڭنان اسا سپورتشى دوداعا قوسىلدى.

ورىنبەك وتەمۇرات,

قۋانىش نۇردانبەك ۇلى,

«Egemen Qazaqstan»