ماتچتان كەيىن باس باپكەر ستانيسلاۆ چەرچەسوۆ جاڭا ماۋسىمدى ءساتتى باستاعان قۇراما ويىنشىلارىنىڭ ويىنىنا كوڭىلى تولاتىنىن جەتكىزدى. «ازىرگە فۋتبولشىلاردىڭ ويىن جۇيەسىنە قاتىستى ەشتەڭە ايتا المايمىن, قورعانىستان شابۋىلدى ورىستەتىپ اكەتۋدە دوپتان ايىرىلىپ قالۋعا بولمايدى, ءاربىر ءسات – مۇمكىندىك. كەلەسى ماتچقا دەيىن بۇگىنگى تارتىستىڭ جازباسىن قايتالاپ كورىپ, كەم تۇسىمىزدى بۇتىندەيمىز. كوماندانىڭ قورعانىسىنداعى ويىنشىلار بارىن سالىپ, قارسى جاقتىڭ بىرنەشە شابۋىلىن توقتاتتى. مۇنداي ۇجىمنىڭ قايراتىنا توتەپ بەرۋ جەڭىل سوقپايدى», دەدى باس باپكەر.
انگليانىڭ «مانچەستەر سيتي» فۋتبول كلۋبىنىڭ شابۋىلشىسى حولاندقا ارقا سۇيەگەن ۇجىمدى شىدەرلەپ, ەركىن ويقاستاۋىنا مۇمكىندىك بەرمەگەن ۇلتتىق قۇراما ويىنشىلارى كەلەسى ماتچتى 9 قىركۇيەكتە سىرت الاڭدا سلوۆەنيا فۋتبولشىلارىنا قارسى وتكىزەدى.
دزيۋدوشىلاردىڭ دەڭگەيى جوعارى
پاريجدە ءوتىپ جاتقان پاراليمپيادا ويىندارىندا پارا دزيۋدودان سىنعا تۇسكەن ەرعالي شامەي (J1) 73 كگ سالماق دارەجەسىندە كۇمىس جۇلدەگەر اتاندى. فينالدىق بەلدەسۋگە دەيىن تەگەۋرىندى قارسىلاستارىن جىققان بالۋان التىن مەدال ءۇشىن وتكەن تارتىستا رۋمىن سپورتشىسىنا ەسە جىبەردى.
ايەلدەر اراسىندا پاراليمپيادا دوداسىنان دايانا فەدوسوۆا قولا مەدال ولجالادى. J2 ساناتىندا سىنعا تۇسكەن بالۋان قىز جارتىلاي فينالدا جاپون بالۋانىنا ەسە جىبەرگەن, قولا مەدال ءۇشىن وتكەن تارتىستا تۇرىك قارسىلاسىنان باسىم ءتۇستى.
فرانتسيادا وتكەن جازعى وليمپيا ويىندارى مەن پاراليمپيادا دوداسىندا دزيۋدو كۇرەسىنەن بالۋاندارىمىز وراسان جەتىستىككە جەتىپ, ەل مەرەيىن اسىردى. جازعى وليمپيادا ويىندارىندا ەلدوس سمەتوۆ (60 كگ) وسى سپورت تۇرىنەن چەمپيون اتانسا, عۇسمان قىرعىزباەۆ (66 كگ) قولا جۇلدە ەنشىلەدى. ەندى مىنە, پاراليمپيادا ويىندارىندا پارا دزيۋدوشىلار اراسىنان العاش بولىپ اقمارال ناۋاتبەك (J2 ساناتى, 48 كگ) التىن مەدال يەلەندى. ەرعالي شامەي (J1 ساناتى, 73 كگ) كۇمىس, دايانا فەدوسوۆا (J2 ساناتى, 57 كگ) قولا جۇلدەگەر اتاندى.
