جەكە ءبىلىم وشاعى كوبەيدى

وبلىستا پرەزيدەنت باستاماسىمەن قولعا الىنعان «جايلى مەكتەپ» ۇلتتىق جوباسى اياسىندا 21 مەكتەپ سالۋ جوسپارلانعان. ون مەكتەپتىڭ قۇرىلىسى بيىل اياقتالسا, قالعانى كەلەر جىلى قولدانىسقا بەرىلەدى.

ء«بىلىم بەرۋ ينفراقۇرى­لىمىن قولداۋ قورى» ەسەبى­نەن وبلىس ورتالىعىندا فيزيكا-ماتەماتيكا باعىتىنداعى دارىندى بالالارعا ارنالعان 400 ورىندىق مەكتەپ-ينتەرنات قۇرىلىسى باستالدى. جاقىندا قۇنى 10 ملرد 900 ملن تەڭگە بولاتىن «شىعارماشىلىق يننو­ۆاتسيالىق ورتالىقتىڭ» ىرگەتاسى قالاندى.

جاڭا وقۋ جىلىندا 17 000-نان استام بالا 1-سىنىپقا قابىلداندى. مەكتەپ تابال­دى­رىعىن ەندى اتتاعان جەتكىن­شەك­تەردىڭ 93,1 پايىزى مەملەكەت­تىك تىلدە ءبىلىم الادى. ءبىرىنشى سى­نىپقا باراتىن وقۋشىلاردىڭ 8 مىڭنان استامى قىزىلوردا قالاسىنان بولسا, ودان كەيىنگى ورىندا – جاڭاقورعان اۋدانى تۇر. وندا 1 708 بالا العاش مەكتەپ تابالدىرىعىن اتتادى. ال شيەلى اۋدانىندا 1 600-دەن اس­تام جەتكىنشەك ءبىرىنشى سىنىپ­قا باردى. 2024–2025 وقۋ جىلىن­دا 297 مەملەكەتتىك جانە 33 جەكە مەكتەپتە 184 856 بالا ءبىلىم الادى. وسىلاردىڭ 10 452-ءسى 11-سىنىپ وقۋشىلارى.

جاقىن كۇندەرى قىزىلوردا قالاسىنداعى سول جاعالاۋ شا­عىن اۋدانىنان «جايلى مەك­تەپ» جوباسى اياسىندا 900 ورىن­­عا ارنالعان جاڭا مەكتەپ پايدا­لانۋعا بەرىلمەك.

1 قىركۇيەك قارسا­ڭىندا شيە­لى اۋدانىندا 988 ملن تەڭ­گەگە بوي كوتەرگەن 100 ورىندىق مەك­تەپ قولدانىسقا بەرىلدى. وسى كۇن­دەرى جاڭاقورعان اۋدانى­نىڭ باي­كەنجە اۋىلىنان جەرگى­لىكتى بيۋد­جەت ەسەبىنەن 926 ملن تەڭ­گەگە سالىن­عان 150 ورىندىق ءبىلىم ­ورداسى اشىلدى.

سونداي-اق وسى سالاعا ينۆەستيتسيا سالاتىن كاسىپكەرلەر قاتارى دا ارتىپ وتىر. ەل جاع­دايىنا الاڭداعان ازاماتتار­دىڭ ارقاسىندا ارال اۋدانى توقا­باي اۋىلىنداعى اپاتتى مەكتەپ ورنىنا جاڭا عيمارات جانە اقشاتاۋ اۋىلىندا باستاۋىش مەكتەپ بوي كوتەرىپ, جاڭا وقۋ جىلىندا پايدالانۋعا بەرىلدى.

وبلىستا 2023–2029 جىلدار­عا ارنالعان ءبىلىم جۇيە­سىن دامىتۋ جول كارتاسى بويىن­شا الداعى 7 جىلدا ءبىراز ماسەلە شە­شىمىن تابادى. وسى ۋاقىت ارا­لىعىندا مەكتەپكە دەيىنگى ءبىلىم بەرەتىن 12 ۇيىمعا كۇردە­لى, 160 نىسانعا اعىمداعى جون­دەۋ جۇرگىزىلەدى. جوعارى وقۋ ورىندارى بازاسىندا مەكتەپ­كە دەيىنگى ءبىلىم بەرۋ ۇيىمدارى پەداگوگتەرىن قايتا دايارلاۋ, بىلىكتىلى­گىن ارتتىرۋ قولعا الى­نادى. سەك­سەن بالاباقشا كوم­پيۋتەرلىك ­تەحنيكا مەن ين­تەر­اكتيۆتى پانەلدەرمەن, 40 با­لا­­باقشا ­ويىن الاڭدارىمەن جا­راق­تالىپ, ­شا­­­­­عىن ساۋلەت نىسان­دارى جاڭار­تىلادى.

سالاعا قولداۋدىڭ قايتا­رى­مى دا جوق ەمەس. سىر ءوڭىرى سوڭ­عى ءتورت جىلدا ۇلتتىق بى­رىڭ­­عاي تەستىلەۋ كورسەتكىشىندە رەسپۋب­ليكادا العاشقى ۇشتىكتە بولاتىن. مەملەكەتتىك گرانت كونكۋرسىنا قاتىسقانداردىڭ 76 پايىزى, ياعني 4 752 وقۋشى ەلىمىز­دىڭ بەدەلدى جوعارى وقۋ ورىندارىنا تۇسكەن وسى جىلى ايماق ەلىمىزدە كوش باستاپ, العاشقى ورىننان كورىندى. بۇدان بولەك, تۇرمىسى تومەن وتباسى بالالارى ءۇشىن ايماق سۇرانىسىن ەسكەرە وتىرىپ, قاجەتتىلىگى جوعارى ماماندىقتارعا وبلىس اكىمىنىڭ 100 گرانتى ءبولىندى.

جىل سايىن وبلىس ورتا­لى­عىنا قونىستانۋشىلار قاتارى ارتىپ, مەكتەپتەردە ورىن تاپ­شى­لىعى بايقالا باستاعان. وت­كەن جىلى وسىنداي 4 مەكتەپ­كە قوسىمشا 1 مىڭ 850 ورىن­­عا ار­نالعان عيمارات سالىندى. قار­­جى ۇنەمدەۋگە سەپ بولا­­تىن وسى ءتاسىل ارقىلى بيىل شيەلى, جاڭاقورعان اۋداندارىندا 2 مەك­تەپكە 375 ورىن قوسىلىپ, قىزىلوردا قالاسىنداعى №4 مەك­­تەپكە وقۋ كورپۋسى مەن اسحانا, قارماقشى اۋدانىندا №284 مەكتەپ-ينتەرناتىنا سپورتزال سالىندى. وسى جازدا وب­لىستىق بيۋدجەت ەسەبىنەن 3 ملرد 100 ملن تەڭگەگە قالا مەن اۋدانداردا 8 مەك­تەپ كۇردەلى جوندەۋدەن ءوتتى.

سونىمەن قاتار وڭىردە جەكە مەكتەپتەر قاتارى دا ارتىپ كە­لەدى. بيىلدىڭ وزىندە ولاردىڭ قاتارىنا 7 مەكتەپ قوسىلىپ, جاڭا وقۋ جىلىندا وبلىستاعى وسىنداي ءبىلىم وشاقتارىنىڭ سانى 40-قا جەتەدى.

قىزىلوردا