قۇجاتتا ىرگەلى باستاما, جۇيەلى ۇسىنىس, ناقتى تاپسىرما 9 ستراتەگيالىق باعىت اياسىندا بايىپتالعان. بۇل رەتتە اقشا-نەسيە مەن فيسكالدى ساياسات اراسىنداعى ۇيلەسىمسىزدىكتى جويۋ, ينۆەستيتسيا مەن بيزنەستەگى جاعدايدى رەتتەۋ, ونەركاسىپ الەۋەتىن ورنىقتى جۇيەلەۋ, ينفراقۇرىلىم زارۋلىكتەرىن شەشۋ, قات مامانداردى ەكونوميكا قۋاتىنا اينالدىرۋ, ۇلت سالاماتتىلىعىن شىڭدايتىن كەشەندى شارالار, الەۋمەتتىك قولداۋ سالاسىن سەرپىلتۋ, ەكولوگيالىق جاۋاپكەرشىلىكتى ارتتىرۋ, مەملەكەتتىك باسقارۋ ءىسىن جەتىلدىرۋ, زاڭ مەن ءتارتىپ قاعيداتىن ساپالاندىرۋ جان-جاقتى زەردەلەندى. ەڭ باستىسى, ەكونوميكاعا قان جۇگىرتەتىن باعىتتاردىڭ زاڭنامالارىن قايتا قاراۋ, ناقتىلاۋ, وزەكتەندىرۋ ۇدەرىسىنە قاتىستى تاپسىرما بەرىلدى. اسىرەسە شاعىن جانە ورتا بيزنەستىڭ تىنىسىن اشۋ, قايتارىمى مول اۋىل شارۋاشىلىعى سالاسىن قارجىلاندىرۋ, بانكتىڭ ەكونوميكالىق جاۋاپكەرشىلىگىن ۇيلەستىرۋ, سالىق ساياساتىنا جاڭاشا كوزقاراس پەن بيۋدجەت تاپشىلىعىن جۇيەلەيتىن ءىس-شارا ايقىندالدى. وسى ورايدا زاڭدىق تەتىكتەردى دايارلاۋعا قاتىستى ناقتى تاپسىرما بەرىلدى. ۇلتتىق قور قاراجاتىن رەتىمەن پايدالانۋ, ورتا تاپتىڭ الەۋەتى مەن سالماعىن ارتتىرۋعا بايلانىستى ۇستانىم دا وزەكتى. مۇنىڭ ءبارى, پرەزيدەنت ايتقانداي, «ەلىمىزدىڭ تۇراقتى دامۋىنا مۇمكىندىك بەرەتىن جاڭا تەتىكتەر».
قارجى مەن ينۆەستيتسيانىڭ سىرتقى ءھام ىشكى ءتۇرلى فاكتورعا بايلانىستى قيلى دەڭگەيى – قالىپتى جاعداي. ونىڭ بيلىك پەن قوعامعا قاتىستى ولشەمى – ادىلەتتىك, ءتارتىپ جانە ۇنەم. مۇنى ەل باسشىسى «بيۋدجەت قاراجاتىن ستراتەگيالىق ماڭىزى جوق, اسا شۇعىل ەمەس شارۋالارعا وڭدى-سولدى شاشۋدى دوعارۋ كەرەك» دەپ قاداپ ايتتى. جەكە ينۆەستيتسيا مەن سالىق ساياساتى اراسىنداعى ۇيلەسىمنىڭ, مەملەكەتتتىك-جەكەمەنشىك ارىپتەستىكتىڭ ساپا مەن پاراساتقا قۇرىلۋى – ەكونوميكا دامۋىنىڭ ەلەۋلى باعىتى ەكەنى دە ساراپتالدى. اگروسالانى سۋبسيديالاۋدان گورى ءتيىمدى نەسيە بەرۋ تىعىرىقتان شىعاراتىنى دا ويعا سالىندى.
جولداۋدا زاڭسىزدىققا بارعان اتقارۋشى بيلىك ورىندارى مەن كوتەرەم بيزنەس سالاسىنا سىن دا ايتىلدى. مىسالى, «ساندا بار, ساناتتا جوق» 2 ملن ءىرى قارا مەن 3 ملن ۇساق مال جىرى. نەمەسە جەكەمەنشىك جەرلەرىنەن مىڭداعان شاقىرىم قاشىقتا تۇراتىن ەلىرمە «جەر يەلەرى» جايى. بۇل ماسەلە زاڭ تۇرعىسىنان قارالاتىنى ءمالىم بولدى.
وزدەرىڭىزگە ءمالىم, و.بەكتەنوۆ باسقاراتىن ەل ۇكىمەتى ونەركاسىپكە بايلانىستى 17 ءىرى جوبانى جۇزەگە اسىرۋعا جۇمىلىپ وتىر. بۇعان مونوقالانىڭ تىڭ وندىرىسىنەن باستاپ, مۇناي-گاز سالاسىن سەرپىلتۋگە دەيىنگى يننوۆاتسيالىق باستامالار ەنگەن. ءسوز بەن ءىس بىرلىگىنىڭ سىنالاتىن كەزەڭى – تاپ وسى جەر. حالىق ۇكىمەت جۇمىسى ناتيجەسىنە قاراپ باعا بەرەرى ءسوزسىز.
مەملەكەتىمىزدىڭ ينفراقۇرىلىمىن دامىتۋ – دىلگىر باسىمدىق. بۇل جەردە زاماناۋي ەنەرگيا وندىرەتىن قۋات كوزدەرىن ورايلى پايدالانۋ – عىلىم مەن بىلىككە قاتىستى شارت. اەس – تەحنولوگيا مەن يننوۆاتسيانىڭ, باسەكە مەن تاجىريبەنىڭ كورسەتكىشى. ءدال وسى ماسەلەدە ءبىز ەلىمىز ۇتاتىن جولدى تاڭداۋعا ءتيىسپىز. پرەزيدەنت ينفراقۇرىلىمعا قاتىستى كولىك-لوگيستيكا جايىنا دا توقتالدى. كەيىنگى ۇرپاققا ساپالى اۆتو, تەمىر, اۋە, تەڭىز جولدارىن, بەكەتتەرىن قالدىرۋ مىندەتىن ەسكە سالدى. ارينە, جوسپار بار دا, ونى ورىنداۋ بار. ونىڭ تەتىگى – قوعامدىق باقىلاۋ مەن تسيفرلىق پلاتفورما ەكەنى ناقتىلاندى.
مەملەكەت باسشىسى قوعامنىڭ بەرەكەسى ادال ەڭبەكپەن جانە تياناقتى تارتىپپەن ورنايتىنىن ارقاشان ەسكە سالادى. جولداۋدا 2025 جىلدى – جۇمىسشى ماماندىقتارى جىلى دەپ جاريالادى. بۇل – داستۇرگە تابان تىرەگەن وي. ينجەنەر, گەولوگ, كەنشى, اگرونوم, زووتەحنيك, اۆتوتەحنيك, مەليوراتور ت.ب. مامانداردىڭ مارتەبەسىن كوتەرۋ, عالىم مەن ونەرتاپقىش يدەياسىنا قۇلاق اسۋ – وسەر ەلدىڭ ءىسى. بۇيىرسا, وسى باعىتتا يگى باستامالار جۇزەگە اسادى دەپ ۇمىتتەنەمىز.
جولداۋدا پرەزيدەنت «ۇستازدار – ۇلتتىڭ زياتكەرلىك قۋاتى» دەگەن تىڭ وي ايتتى. ءدال وسىنى ءبىز كەڭ ماعىنادا تۇسىنگەنىمىز ءجون. الاش تۇلعاسى احمەت بايتۇرسىن ۇلىنىڭ شاكىرتتەرىنە ايتقان ەڭ سوڭعى اماناتى – «اينالايىندار, مۇعالىم بولىڭدار!» دەگەن باتا ەكەن. بۇل ءسوزدىڭ استارىندا ەلگە جاۋاپتى بولۋ مىندەتى تۇر. ءدال سولاي بۇگىن ءار سالانىڭ ءداستۇرى مەن تاجىريبەسى جاڭاشىل تاۋەكەلىنە جول كورسەتكەنى ابزال.
مەملەكەت باسشىسى ەكولوگيالىق جاڭارۋ مەن قوعامدىق ءتارتىپ قۇندىلىعى ماڭىزىنا توقتالدى. راسىندا, ءبىز «تازا قازاقستان» اكتسياسىن سانا, ءىس تازالىعى دەڭگەيىنە كوتەرۋىمىز قاجەت. ال پرەزيدەنت ادىلدىك پەن قاۋىپسىزدىك اياسىندا ءسوز ەتكەن اسكەردى – مەملەكەتتىك ءتىل مەن بىرلىك ءداستۇرىن تابيعي سىڭىرەتىن ەرلەر مەكتەبىنە اينالدىرا ءبىلۋىمىز كەرەك. ء«ار ءىس ەلگە دەگەن جاناشىرلىق نيەتپەن جاسالسىن!» دەگەن جولداۋ تۇيىنىنەن وسىنى ۇقتىق.
