وبلىستىق ءبىلىم باسقارماسىنىڭ باسشىسى مارات ءابۋوۆتىڭ ايتۋىنشا, 205 مەكتەپ ينتەرنەت جەلىسىمەن 99 پايىز قامتىلعان. ونىڭ ىشىندە 175 ءبىلىم ورداسى تالشىقتى وپتيكالىق بايلانىس جەلىسىنە, ADSL تەحنولوگياسىنا ارقىلى – 20, راديورەلەلى بايلانىسقا – 3, سپۋتنيك جۇيەسىنە 7 مەكتەپ قوسىلىپ وتىر.
الايدا 30 مەكتەپتەگى ينتەرنەت جىلدامدىعى 20 مبيت/س-تەن تومەن. ويتكەنى 23 ءبىلىم وشاعى وتكىزۋ مۇمكىندىگى تومەن تەحنولوگيامەن قوسىلعان. مەردىگەر كومپانيالار 7 مەكتەپتەگى ينتەرنەت جىلدامدىعىن ارتتىرۋ ءۇشىن جۇمىس ىستەپ جاتىر. 20 - 100 مبيت/س ارالىعىندا 163 مەكتەپ, 100 مبيت/س جوعارى 22 مەكتەپ بار.
بىلتىر ينتەرنەتكە وتكىزۋ مۇمكىندىگى تومەن تەحنولوگيامەن قوسىلعان 42 مەكتەپتىڭ ءتىزىمى جاساقتالعان. مۇنداي مەكتەپتەر جىلىوي, يندەر, يساتاي, قىزىلقوعا, قۇرمانعازى, ماقات اۋدانىندا بار. قازىر «قازاقتەلەكوم» اق-مەن بىرگە اتالعان اۋداندارداعى 13 ءبىلىم ورداسىنا تالشىقتى وپتيكالىق بايلانىس جەلىسى جۇرگىزىلىپ, «ۆولس» جۇيەسىنە قوسىلعان. ال 26 مەكتەپ «Starlink» جۇيەسىنە قوسىلىپ وتىر. ەندى 3 مەكتەپتى قوسۋ ءۇشىن «رەسپۋبليكالىق عارىشتىق بايلانىس ورتالىعى» اق-مەن كەلىسىمشارت جاساۋ قولعا الىنعان.
«جىل سوڭىنا دەيىن 3 مەكتەپتىڭ قۇرىلىسىن اياقتاۋ كوزدەلىپ وتىر. ال ساباق باستالعان مەكتەپتەر موديفيكاتسيالانعان كابينەتتەرمەن 100 پايىز قامتىلدى. ءار جىل سايىن 25 مەكتەپتىڭ كابينەتى جاڭارتىلادى. بيىلعى وقۋ جىلىندا 25 مەكتەپكە 64 كابينەت ساتىپ الۋ جوسپارلاندى», دەيدى مارات ءابۋوۆ.
ءبىلىم كۇنى اتىراۋ قالاسىنىڭ ماڭىنداعى اقجار-2 ەلدى مەكەنىندە №44 مەكتەپ-گيمنازيا اشىلدى. مۇندا ءبىر اۋىسىمدا 600 وقۋشى وقيدى. ونىڭ ىشىندە 1-سىنىپقا قابىلدانعان 70 وقۋشى بار.
مەكتەپ-گيمنازيا ديرەكتورى اباي اقمۇرزيەۆتىڭ ايتۋىنشا, تۇستەن كەيىن قوسىمشا ساباقتار ۇيىمداستىرۋ جوسپارلانعان. ءبىلىم ورداسىندا 30-دان استام سىنىپ, 10-نان اسا زەرتحانا كابينەتى جاساقتالعان. مۇندا اعىلشىن ءتىلى, لينگافون, العاشقى اسكەري دايىندىق كابينەتتەرىنە قوسا ەڭبەككە باۋلۋ شەبەرحانالارى, اتىس ءتيرى جابدىقتالعان.
قىزدارعا ارنالعان شەبەرحاناعا اسحانا جابدىعى مەن تىگىن ماشينكاسى قويىلعان. ال ۇلدارعا لايىقتالعان شەبەرحانا اعاش ۇستاسى مەن توكار ماماندىعىن مەڭگەرۋ ءۇشىن ارنايى ستانوكتار الىنعان.
ال بەرەكە اۋىلىنداعى ورتا مەكتەپتە پوليتسيا سەرجانتى شالقار اقىمعاليەۆ اتىنداعى كادەت سىنىبى اشىلدى. وسى ءبىلىم ورداسىندا وقىعان ول 5 جىل بۇرىن جايىق وزەنىنە باتقان قىزدى قۇتقارۋ كەزىندە قازا تاپقان ەدى. اناسى ءلاززات مۇقانوۆانىڭ ايتۋىنشا, شالقار بالا كۇنىنەن پوليتسيا قىزمەتكەرى بولۋدى ارمانداعان. اسكەردەن ورالعاننان سوڭ اتىراۋ قالالىق پوليتسيا باسقارماسىندا 5 جىل جۇمىس ىستەگەن.
«دوسىڭا, قىزمەتىڭە ادال بول. ۋادەڭە بەرىك بول, اماناتقا قيانات جاساما» دەۋشى ەدىم. «اناشىم, الاڭداماڭىز, ايتقانىڭىزدىڭ ءبارىن ورىندايمىن, ءبارى ءسىز ايتقانداي بولادى», دەپ ەركەلەيتىن ەدى. جۇمىسىن ادال اتقاردى», دەيدى اناسى ءلاززات مۇقانوۆا.
ۇستازدارىنىڭ ايتۋىنشا, مەكتەپتە العىرلىعىمەن تانىلىپ, ساباقتى جاقسى وقىعان. اسىرەسە جاراتىلىستانۋ باعىتىنداعى پاندەرگە قىزىعۋشىلىعى باسىم بولعان. كادەت سىنىبىندا شالقار اقىمعاليەۆتىڭ ءومىربايانى, ءار كەزەڭدەگى سۋرەتتەرى, قىزمەتتىك كۋالىگى مەن ماراپاتتارى تۋرالى مالىمەتتەر قويىلعان. مۇندا پوليتسەيدىڭ كوزى تىرىسىندە تۇتىنعان بۇيىمدارى دا بار.
كادەت سىنىبىنداعى العاشقى ءدارىستى پوليتسيا كاپيتانى رۇستەمبەك سۇندەتوۆ وتكىزىپ, ارىپتەسى شالقار اقىمعاليەۆتىڭ ءومىر جولى مەن ادامي قاسيەتتەرى, باتىرعا ءتان باتىلدىعى, بىرگە قىزمەت اتقارعان جىلدارى تۋرالى ەستەلىگىمەن ءبولىستى. سونداي-اق پوليتسيا قىزمەتكەرىنىڭ قوعامدىق ءتارتىپتى ساقتاۋداعى مىندەتتەرى تۋرالى اڭگىمەلەدى. ول شالقار اقىمعاليەۆپەن بىرگە جايىق وزەنىنە باتقان ايەلدى قۇتقارۋعا اتسالىسقان.
اتىراۋ وبلىستىق پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي, بۇرىن شالقار اقىمعاليەۆ اتىنداعى كادەت سىنىبى يندەر اۋدانىندا اشىلعان. ال بۇگىن جىلىوي اۋدانىنىڭ ورتالىعى – قۇلسارى قالاسىنداعى №9 مەكتەپتە, يساتاي اۋدانىنداعى ءبىر ءبىلىم ورداسىندا اشىلىپ وتىر.
اتىراۋ وبلىسى
