«بەس بوتەلكەگە – ءبىر بالمۇزداق» دەپ اتالعان اكتسيا بارىسىندا ەگەر كىمدە-كىم بەس بوتەلكە جيناپ, ارنايى ورىنعا اكەلىپ وتكىزسە, وعان سىيلىققا ءبىر بالمۇزداق بەرىلدى.
– بۇل ءىس-شارا «تازا قازاقستان» اكتسياسى اياسىندا ۇيىمداستىرىلدى. ءبىز شاشىلىپ جاتاتىن شىنى جانە پلاستيك بوتەلكەلەردى, قاۋاشاقتاردى جيناۋدىڭ وسىنداي ءادىسى ارقىلى كوپشىلىكتى ورتاق ىسكە تارتۋدى كوزدەدىك. ەكى كۇنگە سوزىلعان اكتسيا ماقساتىنا جەتتى, – دەيدى ساتباەۆ قالالىق ىشكى ساياسات ءبولىمىنىڭ باسشىسى امانكەلدى قۇراقباي.
ەكى كۇن بويى قالا ورتالىعىنداعى الاڭعا جان-جاقتان جيعاندارىن وتكىزىپ, تاتتىگە قول جەتكىزۋدى ماقسات ەتكەندەردىڭ قاراسى كوپ بولدى. الەۋمەت تاراپىنان اتالعان اكتسياعا نەگىزىنەن وڭ پىكىر ءبىلدىرىلدى. ارينە, ارا-اراسىندا «بالالار بوتەلكە ىزدەپ اۋلالاردىڭ اراسىن ارالاپ كەتتى, سونىڭ كەرەگى بار ما ەدى؟» دەگەندەي پىكىر دە ايتىلدى.
– «تاربيە – تال بەسىكتەن» دەگەندەي, بالالارىمىزدى كىشكەنتايىنان ەڭبەككە جانە وزگەنىڭ ەڭبەگىن قۇرمەتتەۋگە تاربيەلەي بىلگەنىمىز دۇرىس. اكتسيا بارىسىندا قانشاما بالا بوتەلكە جيناپ ءجۇرىپ, سوعان الىپ جەگەن بالمۇزداقتىڭ بالداي تاتىعانىنا كۇمانىم جوق. مۇنداي ءىس-شارانى باستاعاندارعا دا, قوستاعاندارعا دا راحمەت. الداعى ۋاقىتتا دا جالعاسىن تاۋىپ تۇرسا ەكەن, – دەيدى قالالىق اقساقالدار القاسىنىڭ توراعاسى وتەش احمەتوۆ.
ەكى كۇندە بارلىعى 51 500 بوتەلكە جينالىپ, 10 مىڭنان اسا بالمۇزداق تاراتىلدى. اكتسياعا بارلىعى 2 مىڭنان اسا بالا قاتىستى.
اكتسياعا قاتىسۋشىلاردى بالمۇزداقپەن قامتاماسىز ەتكەن – «قازاقمىس» كورپوراتسياسى. ال جينالعان بوتەلكەلەر جەرگىلىكتى سۇرىپتاۋ كومپانياسىنا وتكىزىلدى.
ۇلىتاۋ وبلىسى,
ساتباەۆ قالاسى
